Ko e Mālohi Faisilá
Ngaahi Konga Fakamatala
ʻOku tau faʻa fakakaukau ko e mafai faisilá ʻoku fakaʻaongaʻi iaki ha ngaahi ouau pau pē ʻi he temipalé, ka ʻoku fiemaʻu ʻa e mafai ko iá ke malava ai ha faʻahinga ouau pē ke [ʻaonga mo pau ʻi he hili ʻo e maté]. …
Ko e mafai ʻoku ʻomi ʻe he mālohi faisila ko iá ki he ngaahi ouau ʻo e lakanga fakataulaʻeikí ʻoku kau ai ʻa e ngaahi ouau fakafofonga ʻoku fakahoko ʻi he feituʻu kuo fili ʻe he ʻEikí—ʻa Hono temipalé. … Ko e mālohi faisila ko ʻení ko hano fakahaaʻi haohaoa ia ʻo e fakamaau totonú, ʻaloʻofá mo e ʻofa ʻa e ʻOtuá.
Tuʻunga ʻi hono maʻu ʻa e mālohi ke faisilá, ʻoku fakanatula pē ʻa e tafoki hotau lotó ki he niʻihi kuo nau mole atú. Ko e tānaki fakataha ʻi he ngaahi ʻaho kimui ní ʻoku fakakau ai ʻa kinautolu ʻi he tafaʻaki ʻe taha ʻo e veilí.
Ko e fakahaaʻi māʻolunga mo māʻoniʻoni taha ʻo e mālohi faisilá, ʻoku ʻi he fakatahaʻi taʻengata ia ʻo ha tangata mo ha fefine ʻi he nofo-malí pea mo hono fakafehokotaki ʻo e faʻahinga ʻo e tangatá ʻi honau toʻu tangata kotoa pē. …
ʻOku tau lava leva ʻo sio ki he ʻuhinga ʻoku hoko ai ʻa e “mali ʻi ha vā ʻo ha tangata mo ha fefiné naʻe tuʻutuʻuni ia ʻe he ʻOtuá pea ko e fāmilí ko e uho ia ʻo e palani ʻa e Fakamoʻuí ki he ikuʻanga taʻengata ʻo ʻEne fānaú” [“Ko e Fāmilí: Ko Ha Fanongonongo ki Māmani,” Gospel Library]. ʻI he taimi tatau pē, ʻoku tau fakatokangaʻi ʻi he kuonga taʻe-haohaoa ko ʻení, ʻoku ʻikai ko e tuʻunga totonú ʻeni ia pe ko ha meʻa ʻeni ʻe malava ke hoko moʻoni ki ha niʻihi. Ka ʻoku tau maʻu ha ʻamanaki lelei ʻia Kalaisi. …
ʻOku ou fakamoʻoni ko e mālohi mo e mafai faisila naʻe fakafoki mai ki he māmaní ʻo fakafou ʻia Siosefa Sāmitá ʻoku moʻoni ia, pea ko e meʻa ko ia ʻoku haʻi ʻi māmaní ʻoku haʻi moʻoni ia ʻi he langí.