Ko Sīsū Kalaisi ʻa e Koloa Mahuʻingá
Ngaahi Konga Fakamatala
Māʻolunga Taha Pē, tā fakatātaaʻi ʻe Kelsy mo Jesse Lightweave
Naʻe ʻuhinga ʻa e palōfita ko Sēkopé ʻi he Tohi ʻa Molomoná ko e ʻaiʻainoaʻiá pe ʻikai fakamahuʻingaʻi ʻa e meʻa ʻoku ofi maí ko e “tokanga [ia] ki he ngaahi meʻa naʻe ʻikai mahuʻingá” [Sēkope 4:14]. …
… ʻOku fiemaʻu ke tau tokanga ʻi he fakahehema ko ʻení telia naʻa mole ʻa Sīsū Kalaisi mei heʻetau moʻuí pea ʻikai ke tau fakatokangaʻi ʻa e ngaahi tāpuaki lahi ʻokú Ne foaki maí. ʻOku tau fiemaʻu Ia. … Kapau te tau fakakaukau hala ʻoku ʻi ai ha fiemaʻu ki ha meʻa mavahe mei he meʻa ʻokú Ne foakí, ʻoku tau fakaʻikaiʻi pe holoki ai ʻa e taumuʻa mo e mālohi ʻe lava ke Ne maʻu ʻi heʻetau moʻuí. … Ko Sīsū Kalaisi ʻa ʻetau koloa mahuʻingá.
Kuo foaki mai ʻe he Fakamoʻuí ha ngaahi founga ke tau tokanga moʻoni ai kiate Ia, kau ai ʻa e faingamālie fakaʻaho ke fakatomalá. Ko e taimi ʻe niʻihi ʻoku ʻikai ke tau fakamahuʻingaʻi ʻa e maʻongoʻonga ʻo e tāpuaki kuo foaki ko ʻení. …
… ʻOku ʻatā kiate kitautolu ʻa e ngaahi tāpuaki mahuʻinga ʻo e sākalamēnití ʻi he taimi kotoa pē ʻoku tau ʻalu ai ki he houalotu sākalamēnití. … ʻOku tāpuakiʻi kitautolu ʻe he Laumālie Māʻoniʻoní ʻaki Hono mālohi fakamāʻoniʻoniʻí ke tau lava maʻu pē ʻo tauhi maʻu ha fakamolemole ʻo ʻetau ngaahi angahalá, ʻi he uike kotoa pē. …
ʻI he taimi ʻoku ʻiate kitautolu ai ʻa e Laumālie Māʻoniʻoní, ʻe ueʻi mo fakahinohinoʻi kitautolu ke tau fakahoko mo tauhi ha ngaahi fuakava kehe, hangē ko ia ʻoku tau fakahoko ʻi he ngaahi temipalé. ‘Oku fakaloloto ʻetau fetuʻutaki mo e ʻOtuá, ‘i hono fai iá. … Ko ʻetau tukupā ke ʻalu ki he temipalé ʻoku totonu ke mālohi tatau pē ia ʻi he taimi ʻoku ofi aí mo ʻene mamaʻó.
… Ko e taimi ʻoku tau falala ai ki he palōfita ʻa e ʻOtuá ʻi he ʻahó ni ʻi māmaní, te tau maʻu ʻa e fiefia, pea ʻe lava foki ke fakamoʻui mo kitautolu. ʻOku ʻikai fiemaʻu ia ke tau toe kumi ʻi ha feituʻu kehe.