Kāinga ʻia Kalaisi
Ngaahi Konga Fakamatala
ʻOku akoʻi mai ʻe he ongoongolelei ʻo Sīsū Kalaisí ko kitautolu kotoa ko e ngaahi foha mo e ngaahi ʻofefine fakalaumālie ʻo ha ongomātuʻa fakakalangi ʻokú na ʻofa moʻoni ʻiate kitautolu pea naʻa tau nofo ko ha fāmili ʻi he ʻao ʻo e ʻOtuá kimuʻa pea toki fanauʻi mai kitautolu ki māmaní. ʻOku toe akoʻi mai foki ʻe he ongoongoleleí naʻe fakatupu kitautolu kotoa ʻi he tatau ʻo e ʻOtuá. Ko ia ai, ʻoku tau tuʻunga tatau ʻi Hono ʻaó. …
ʻI heʻetau hoko ko e kau ākonga ʻo Kalaisí, ʻoku fakaafeʻi kitautolu ke fakalahi ʻetau tui, mo e ʻofa ki hotau ngaahi tokoua mo e tuofāfine/tuongaʻane fakalaumālié ʻaki hono ʻai ke taha moʻoni hotau lotó ʻi he uouangataha mo e ʻofa, neongo hotau ngaahifaikehekehé, ke fakatupulaki ai ʻetau malava ʻo fakaʻapaʻapaʻi ʻa e ngeia ʻo e ngaahi foha mo e ʻofefine kotoa ʻo e ʻOtuá. …
… ʻOku ʻikai ha feituʻu ia ki ha fakakaukau pe tōʻonga siolalo ʻi he kolo ʻo e Kau Māʻoniʻoní. …
ʻOfa te tau fakafenāpasi hotau lotó mo e ʻatamaí ki he ʻilo mo e fakamoʻoni ko ia ʻoku tau tatau kotoa ʻi he ʻao ʻo e ʻOtuá, kuo fakakoloaʻi kakato kitautolu ʻaki ʻa e tuʻunga malava mo e tofiʻa taʻengata tatau. ʻOfa ke tau maʻu lahi ange ʻa e fehokotaki fakalaumālie ʻoku ʻiate kitautolú pea mo fakamahuʻingaʻi ʻa e ngaahi ʻulungaanga mo e meʻafoaki kehekehe ʻoku tau maʻú. …
ʻOku ou fakamoʻoni atu ka hoko atu ʻetau moʻui ʻi he foungá ni ʻi he lolotonga ʻetau moʻui fakamatelié, ʻe hoko ha ʻaho foʻou mo ha maama foʻou te ne fakamāmaʻi ʻetau moʻuí mo hulungia ʻa e ngaahi faingamālie fakaʻofoʻofa ke fakamahuʻingaʻi lahi angé, pea mo tāpuekina kakato ange ʻi he tuʻunga kehekehe naʻe faʻu ʻe he ʻOtuá ki Heʻene fānaú. Te tau hoko moʻoni ko ha ngaahi meʻangāue ʻi Hono toʻukupú ke pouaki ʻa e fakaʻapaʻapá mo e anga fakaʻeiʻeikí ʻi he lotolotonga ʻo Hono ngaahi fohá mo e ngaahi ʻofefiné kotoa.