« ’Imi i tō ’outou pūai i roto ia Iesu Mesia », Nō te pūai o te feiā ’āpī, Māti 2024.
’Imi i tōna pūai
’Imi i tō ’outou pūai i roto ia Iesu Mesia
Iesu Mesia ’o te pūai ïa o te feiā ’āpī—te feiā ’āpī ato’a i ni’a i te fenua nei—’e ’o ’outou ato’a ho’i te reira !
Fa’aro’o iāna, nā Haley Miller
Tē ’oa’oa nei au i te vauvau atu i teie ve’a ta’a ’ē Nō te pūai o te feiā ’āpī. E tauturu te mau parau pāpa’i, te mau ’ātivite, ’e te mau ’ā’amu nō roto mai i te feiā ’āpī ’ati a’e i te ao nei ’ia ha’apūai i tō ’outou ’itera’a pāpū nō te hō’ē parau mau hōhonu ’e te mure ore tei fa’ahitihia e te Peresidenira’a Mātāmua. Tē parau pūai nei rātou nō Iesu Mesia ē, « ’o ’oia te ‘pūai o te feiā ’āpī’ ».1 Tē aura’a ra ’o Iesu Mesia tō ’outou pūai. Tē pure nei au ’ia tauahi ’outou i teie parau mau ma te ’oa’oa i teie taime faufa’a rahi o tō ’outou orara’a, i teienei ’e a muri noa atu.
E hina’aro te mau ta’ata ato’a i te pūai i roto i te Mesia
’Aita ’outou i mahoihia mai ’ī’o nei ’aore rā ma te hape. ’Ua mā’itihia ’outou ’ia haere mai i te fenua nei nō te ha’api’i mai, nō te tupu i te rahi, nō te rave i te mau ’ohipa fa’ahiahia, ’e nō te riro hau atu mai tō ’outou Metua i te ao ra te huru. I roto i teie tere, e fa’aruru ’outou i te mau taime fifi, te mau tāmatara’a ta’ata hō’ē, te mana’o paruparu, ’e te hepohepo ’o te nehenehe e riro ’ei mea teimaha. Penei a’e tē ’ite ra ’outou ’ua māreihia ’outou i roto i teie tau i teienei.
I roto i taua mau taime ra, ’a ha’amana’o ē ’ua here tō ’outou Metua i te ao ra ia ’outou. ’Ua nā reira noa ’oia, ’e e nā reira noa ā ’oia. Maoti tōna here fāito ’ore ’e te maita’i roa, ’ua tono mai ’oia i tāna Tamaiti, ’o Iesu Mesia, nō te ha’apūai ’e nō te tauturu ia ’outou ’ia haere i mua. ’E ’ua haere mai Iesu nō te mea ’ua here roa ’oia ia ’outou.
Te vāhi ’oto rā, ’aita te tahi mau ta’ata e ’ite ra i tō rātou hina’aro i te hō’ē Fa’aora. ’Aita rātou i māramarama ē, mai te mau ta’ata ato’a, e rave rātou i te mau hapehape ’o tā rātou e ’ore e nehenehe e tātā’ī, e fa’aruru rātou i te ’erera’a ’o tā rātou ’ore e nehenehe e ora mai, ’e e fārerei atu rātou i te mau pe’ape’a ’e te mau ’ati o tā rātou iho e ’ore e nehenehe e fa’a’oroma’i. E’ita ato’a e nehenehe ia rātou ’ia upo’oti’a i ni’a i te hara ’e te pohe nā roto ia rātou iho. Te aura’a ra ’o rātou—’e te mau ta’ata ato’a—e hina’aro ïa i te tāra’ehara a Iesu Mesia, ma te pūai ’o tā te reira e nehenehe e hōro’a mai.
« E mea fa’ahiahia roa e Elder Holland », tē feruri rā paha ’outou, « nāhea pai e ti’a ai iā’u ’ia rave ia Iesu Mesia ’ei pūai nō’u ? » Nō te tauturu i te pāhono i teie uira’a, e fa’ati’a mai iā’u ’ia fa’a’ite atu i te tahi o te mau rāve’a rave rahi tā Iesu Mesia i te ha’apūaira’a ia ’outou i te mau mahana ato’a.
’Ua fātata te fa’aorara’a, nā David McClellan
E mana tōna nō te ha’apūai ia ’outou
I tōna pō hope’a i te tāhuti nei, ’ua tomo atu Iesu Mesia i roto i te ’ō nō Getesemane. I reira, ’ua tūturi atu ’oia i rotopū i te mau tumu ’ōlive ’e ’ua ha’amata i te rave i ni’a iho iāna te mau hara a tō te ao nei. Teie mamae rahi ’e te mure ’ore ’ua « fa’atupu i roto [iāna…] ’o tei hau a’e i te mau mea ato’a ra, i te rurutaina nō te māuiui, ’e ’ua tahe mai ra te toto nā te mau poa ato’a » (Te Ha’api’ira’a Tumu ’e te mau Fafaura’a 19:18).
I muri iho’ ’ua ’āfa’ihia atu Iesu i Kalavaria ’e ’ua fa’asātaurohia. I reira, ’ua rave fa’aoti ’oia i tāna tusia tāra’ehara. ’Ua hōro’a ihotae mau ’oia i tōna ora, ’e i muri iho ’ua ti’a upo’oti’a mai ’oia mai te pohe mai. I teie tau Pāsa, tē ’oa’oa nei au i te paraura’a ē, tē ora nei Iesu Mesia ! Tē fa’a’ite ato’a nei au ē, ’aita ’oia e ha’amāmā noa i te hōpoi’a nō te hara, e « fa’a’oroma’i ato’a rā i te māuiui ’e te ’ati ’e te mau huru fa’ahemara’a atoa » ’ua nā reira ’oia (Alama 7:11 ; tu’uhia te ha’apāpūra’a).
’Ua putapū te Fa’aora i te mau ’oto ato’a ’e te mau mamae ato’a ’e ’ua fa’a’oroma’i ’oia iho i te mau hepohepo ’e te mau māuiui ato’a tei orahia mai e ’outou, e au, ’e e te mau vaerua ato’a tei ora mai nā ’aore rā o tē ora mai. Maoti te mea tāna i ora mai i roto i te tino nei, i te pae ferurira’a, ’e i te pae vārua nō ’outou, ’ua ’ite ’oia nāhea i te ha’apūai ia ’outou.
Penei a’e e mea fifi nō ’outou ’ia ti’aturi ē, e riro Iesu i te ’ana’anatae i te tauturu ia ’outou ’ei hō’ē i roto e mirioni ta’ata nō te hō’ē ā fāito matahiti. Mai te peu tē mana’o nei ’outou ē, e mea maita’i a’e tāna mau ’ohipa e rave ra i te ha’apūai ia ’outou i roto i tō ’outou mau taime ’ati, ’a feruri iāna i roto i taua ’ō ra, ’a feruri iāna i ni’a i taua sātauro ra. « ’Ua māuiui ’oia, ’ua tahe te toto ’e ’ua pohe »2 nō ’outou, nō te mea ’ua ’ite ’oia e mea faufa’a ’outou. ’Ua ’ite noa ’oia i te reira. ’Ua ’ana’anatae rahi mau ’oia, ’ua ineine ’e ’ua ti’a roa iāna e tauturu ia ’outou—i teie iho ā taime ’e a muri noa atu. ’Ua hōro’a ’oia i tōna ora ’ia ti’a iāna ’ia ha’apūai ia ’outou, ’a fa’ari’i ai ’outou i tāna anira’a ’o te taui i tō ’outou orara’a : « E haere mai ’outou iā’u nei » (Mataio 11:28).
Mā’iti i te haere nā muri iāna
Nā ’outou e mā’iti ’ia pe’e ia Iesu Mesia ’e te ravera’a iāna ’ei pūai nō ’outou. ’Ua « tāpa’o ’e ’ua fa’a’ite ’oia i te ’ē’a »3 nō te ho’i i te Metua i te ao ra ra. Nō reira, ’o ’oia « te ’ē’a, ’e te parau mau, ’e te ora » (Ioane 14:6).
E ’ite mai ’outou i te ’ē’a ma te tauahira’a i te ’evanelia a Iesu Mesia i te fa’a’ohipara’a i tō ’outou fa’aro’o iāna ’e ma te tātarahapara’a i tā ’outou mau hara. E fa’ahōhonu ’outou i tō ’outou tā’amura’a ’e ’ōna ’ia mā’iti ana’e ’outou ’ia bāpetizohia i tōna ra i’oa ’e ’ia fa’ari’i i te hōro’a o te Vārua Maita’i. I muri iho e tāmau noa ’outou i ni’a i tōna ’ē’a nō te ’evanelia nā roto i te ha’apa’ora’a i te mau fa’auera’a, te fa’ari’ira’a i te mau ’ōro’a, te fa’aturara’a i te mau fafaura’a ’e te orara’a ’ei pipi nāna.
E ha’apūai teie mau ’ohipa i te hō’ē tū’atira’a pūai—te hō’ē tū’atira’a o te fafaura’a—’o tē tū’ati pāpū ia ’outou i te Mesia—’e iāna ato’a. ’A haere ai ’outou nā muri iāna, e riro mai ’oia ’e te Metua ’ei mau puna hope roa nō te arata’ira’a ’e te pūai pae vārua. I reira ’outou e nehenehe ai e haere i mua ma te hau ’e te ’oa’oa i te mau mahana ato’a, ’ia riro hau atu ā mai ia rāua ra te huru, ’e ’ia ho’i i te hō’ē mahana nō te ora i pīha’i iho ia rāua ’e ’ia fa’ari’i i te huru orara’a tā rāua e ora nei.
’A hi’o mai iā’u, nā Eva Koleva Timothy
’A haere i mua ma tōna pūai
Ma tō’u ’ā’au ato’a, tē fa’a’ite pāpū nei au ē ’o Iesu te Mesia. ’Ia rave ana’e ’outou i te mau ta’ahira’a e haere iāna ra, ’ia toro ai i te rima iāna, ’e ’ia ani iāna ’ia riro ’ei pūai nō ’outou, e haere mai ’oia ia ’outou ’e e ’ite mai ’outou iāna.4 ’Aita e mā’itira’a tā ’outou e nehenehe e rave mai te reira te huru, e’ita ’oia e ha’amaita’i ia ’outou. Tē ti’aturi nei au ma tō’u ā’au ato’a i te mea tā’u i parau nā mua atu : « E’ita e ti’a ia ’outou [’aore rā i te hō’ē ta’ata] ’ia pou i te fāito raro o te māramarama mure ’ore o te tāra’ehara a te Mesia ».5
Mai te peu e haere ’outou i te Mesia ra, ma te ha’apa’o na mua roa ’e te tāmau i tāna mau fa’auera’a, ma « te ’ā’au hina’aro mau » (3 Nephi 18:32), e haere ’oia nā muri ia ’outou nā roto i te tere o te orara’a nei. E rave mai ’oia i tō ’outou rima ’e e riro ’oia ’ei tīa’ira’a nō ’outou. E riro ’oia ’ei pūai nō ’outou. ’E e hōpoi mai ’oia ia ’outou i te ’oa’oa vai maoro, te hau mau ’e te ’oa’oa rahi.
’Ei hō’ē o tōna mau ’ite ta’a ’ē, tē fa’a’ite pāpū nei au ’e tē fafau nei au ē e parau mau te reira.