« 12 pāpa’ira’a mo’a i te taime ’a putapū ai ’outou… », Nō te pūai o te feiā ’āpī, Māti 2024, ’api–’api.
Te pūai nō roto mai i te mau pāpa’ira’a mo’a
12 pāpa’ira’a mo’a i te taime ’a putapū ai ’outou…
’Ua ’ī te mau pāpa’ira’a mo’a i te fa’aurura’a, noa atu te mea tā tātou e putapū nei.
Fa’ahōho’ara’a nā Toby Newsome
E rave rahi matahiti i teienei, ’ua ha’amata Elisabeth A., 17 matahiti, nō Arizona, Marite, tei putapū i te hepohepo, ’e te rahi noa atu ra te reira. Tē nā ’ō ra ’oia : « E putapū vau i te reira i te mahana tā’āto’a ’e i te mau mahana ato’a ». « E mea fifi roa nō’u ’ia rātere i te reira mahana tā’āto’a ».
Nō te ’ite mai i te tāmāhanahanara’a, ’ua fa’aoti Elisabeth e tai’o i te mau pāpa’ira’a mo’a i te mau pō ato’a. I te roara’a o te tau, ’ua ha’amata ’oia i te putapū i te ’oa’oa.
Tē parau ra ’oia : « ’Ua ’ite au ’aita vau i vai ’ōtahi noa ». « ’Ua ’ite au ē, ’ua here te Atua iā’u ’e ’ua tono mai i tāna Tamaiti, ’o Iesu Mesia, tei ’ite i tō tātou mamae, tō tātou ’ā’au māuiui, tō tātou ’oto ’e tō tātou hepohepo. Nā roto i te mau pāpa’ira’a mo’a, e aura’a pūai tō’u ’e te Mesia ’e te hō’ē hi’ora’a pāpū maita’i a’e nō te orara’a nei ! »
’Ua ha’api’i mai Elisabeth ē, ’ua ’ī te mau pāpa’ira’a mo’a i te mau ’īrava ’e te mau ’ā’amu nō ni’a e mea nāhea te tīa’ira’a, te hau ’e te pūai e ’itehia ai i roto ia Iesu Mesia. E rave rahi ’aito au-roa-hia e tātou i roto i te pāpa’ira’a mo’a tei fa’aruru i te mau tupura’a fifi ato’a. ’E i roto i te mau huru ato’a, ’ua ’itehia mai ia rātou te tīa’ira’a, te hau ’e te pūai ’a fāriu ai rātou i ni’a ia Iesu Mesia.
E’ita paha te tai’ora’a i te mau pāpa’ira’a mo’a e pāhono i te mea tā ’outou e ora nei, e nehenehe rā te mau parau mau i ha’api’ihia i roto i te mau pāpa’ira’a mo’a e hōro’a ia ’outou i te pūai ’e te tāmārura’a. Teie te tahi mau ’īrava tā ’outou e nehenehe e hi’o atu, ’ia hina’aro noa atu ’outou i te hō’ē mana’o fa’auru nō ’outou iho ’aore rā nō te hō’ē hoa. Tē vai ra ānei te tahi i tā ’outou iho ?
I te taime ’ia putapū ana’e ’outou…
’Oto : Te Ha’api’ira’a Tumu ’e te mau Fafaura’a 68:6
Nō reira, ’a fa’aitoito ’e ’eiaha e mata’u, nō te mea tei pīha’i iho vau ’o te Fatu, ia ’outou na, ’e e ti’a noa ho’i au i pīha’i iho ia ’outou na.
Tano ’ore : Luka 12:6–7
E ’ua hope ato’a te rouru ’o tō ’outou mau upo’o na i te tai’ohia. ’Eiaha ho’i ’outou e mata’u ; e rahi tō ’outou maita’i i tō te manu.
Ha’amā : Isaia 54:8
’Ei aroha mure ’ore rā tō’u aroha ia ’oe.
’Aravī : Alama 26:27
’E ’a fa’a’oroma’i tō ’outou mau ’ati, ’e nā’u ’outou e ha’amanuia i reira.
Ti’aturi-’ore-ra’a : Moroni 7:41
E roa’a te tīa’ira’a ia ’outou maoti te tāra’ehara a te Mesia ’e i te mana o tōna ti’afa’ahoura’a.
Paruparu : Etera 12:27
’Ia fa’aha’eha’a rātou ia rātou iho i mua iā’u nei, ’e ’ia vai te fa’aro’o i roto iā’u nei ; ’ei reira vau e fa’ariro ai i te mau mea paruparu ’ei mea pūai nō rātou.
Hitahita : Te Ha’api’ira’a Tumu ’e te mau Fafaura’a 84:88
E vai au i tō ’outou pae ’atau ’e i tō ’outou pae ’aui, e vai ho’i tō’u Vārua i roto i tō ’outou ’ā’au, ’e e fa’a’ati ho’i tā’u mau melahi ia ’outou na, nō te pāturu ia ’outou na.
Pēpē : Salamo 30:2
E Iehova e tā’u Atua, i ti’aoro noa na vau ia ’oe, e ’ua fa’aora ’oe iā’u !
Mata’u : Iosua 1:9
E fa’a’eta’eta ’e ’ia itoito roa […] tei pīha’i-ato’a-iho ho’i tō Atua o Iehova ia ’oe i tō mau haere’a ato’a ra.
Mo’emo’e : Ioane 14:18
E’ita vau e vaiiho ’ōtare noa ia ’outou : e ho’i mai ā vau ia ’outou nei.
Riri : Moroni 7:48
’A pure atu i te Metua ma te pūai hope roa o te ’ā’au ’ia ’ī ’outou i teie nei here.
Fa’a’oroma’i ’ore : Te Ha’api’ira’a Tumu ’e te mau Fafaura’a 100:15
Nō reira, ’ia tāmāhanahanahia tō ’ōrua ’ā’au ; nō te mea e tāhō’ēhia te mau mea ato’a nō te maita’i o te feiā ’o tē haere parauti’a noa.