« ’Ia tupu ana’e mai te ’oto », Nō te pūai o te feiā ’āpī, Māti 2024.
Te pūai i roto i te mau taime o te ’oto
’Ia tupu ana’e mai te ’oto
’Ia fa’aturuma ana’e mai te orara’a ia ’outou, e nehenehe Iesu Mesia e fa’ati’a mai ia ’outou ma te tīa’ira’a.
Fa’ahōho’ara’a nā Dean MacAdam
E nehenehe ’outou e haere ātea i roto i te orara’a maoti te ’ohipa itoito ’e te hina’aro pāpū. E nehenehe ’outou e ta’oto ’oi’oi, ’ia ti’a ’oi’oi i ni’a (hi’o Te Ha’api’ira’a Tumu ’e te mau Fafaura’a 88:124), ’e e fa’a’ī i te mahana tāta’itahi i te mau peu parauti’a ’e te ha’avīra’a iāna iho.
E teienei rā, e riro e mea fifi te tahi mau mahana i te tahi atu.
’E i muri iho te tahi atu mau mahana […] ’oia mau, e mea fifi roa atu e ha’amata ’outou i te feruri ē, ’ua reva ’ē te mau mahana maita’i e a muri noa atu.
E aha tā ’outou e rave i taua mau mahana ra ? E aha tā ’outou e rave ’aita ana’e tā ’outou mau tauto’ora’a maita’i a’e, ’oia ato’a tā ’outou mau tauto’ora’a maita’i roa a’e nō te ora i te hō’ē orara’a parauti’a (te pure, te ha’apaera’a i te mā’a, te tuatāpapara’a i te pāpa’ira’a mo’a, te haere-tāmau-ra’a i te purera’a ’e te hiero, e tē vai atu ra), i nava’i ? ’Ia ’aro ana’e ’e ’ia ’aro fa’ahou ana’e ’outou i te tapineva, e au rā ē, e aro pūai atu ā mai te reira ?
’Oia mau, e fāriu atu ’outou i ni’a ia Iesu Mesia. Te tīa’ira’a ’o te hō’ē ïa hōro’a pae vārua (hi’o Moroni 8:26). ’E te mau hōro’a pae vārua ato’a nō ’ō mai ïa ia Iesu Mesia ra (hi’o Moroni 10:17).
’Ia tae ana’e mai te mau fifi o te orara’a i ni’a ia ’outou mai te hō’ē mou’a e topa mai nā ni’a mai i te ra’i, e nehenehe te hōro’a pae vārua o te tīa’ira’a e riro ia ’outou, mai te mea e rōtahi hau atu ā ’outou i ni’a ia Iesu Mesia.
« E ha’amāmā te Fatu i tā’u mau hōpoi’a »
E mea fifi a’ena te orara’a nō e rave rahi ta’ata nō Venezuela hou te taera’a mai te ma’i pe’e COVID-19 i te matahiti 2020, ’oia atoa rā nō te oraora mai i muri a’e e mea fifi roa. Nō Sebastian, 11 matahiti ’e tōna ’utuāfare, e tītauhia te pūai nō ’ō mai ia Iesu Mesia ra nō te vai ’ana’anatae noa ’e te ’oa’oa i roto i te mau taime ’oto. « E ’oto vau ’ia ’ore ana’e mātou e nehenehe e ho’o mai i te mau tauiha’a faufa’a mai te mā’a, te ’ahu ’e te rā’au, » tē parau ra Sebastian. « E fa’aro’o rā tō’u ē e tāmau noa te Fatu i te ha’amaita’i ia mātou. E ’ite au ’ua ha’amaita’ihia vau i te roa’ara’a tō’u ha’amaita’ira’a pātereāreha. Tē fa’ahiti nei te reira iā’u i te mau mea tei fafauhia mai iā’u hou vau ’a haere mai ai i te fenua nei ».
’Ua riro te fa’atumura’a i ni’a ia Iesu Mesia ’ei tuha’a nō te tumu parau a te feiā ’āpī nō te matahiti i ma’iri a’enei (« E ti’a iā’u te mau mea ato’a nei i te Mesia » [Philipi 4:13]) ’ei tauturu rahi. « Nō te mau fifi ’o tā tō’u fenua e fa’aruru nei, ’ua fa’aha’amana’o mai te tumu parau a te feiā ’āpī i te matahiti i ma’iri iho nei ē, e tauturu mai te Mesia iā’u ’ia upo’oti’a ’e ’ia rave i te mau mea ato’a nā roto iāna », tē nā reira ra ’o Sebastian.
’Ua riro ’ei tere roa, ’ua ’ite rā Sebastian ’e tōna ’utuāfare i te mau ha’amaita’ira’a ’e te tīa’ira’a i te roara’a o te ’ē’a. « E ha’amāmā te Fatu i tā’u mau hōpoi’a », tē nā reira ra ’oia. « ’Ia ’oto ana’e au, e pure au, e tuatāpapa vau i te mau pāpa’ira’a mo’a, ’e e tai’o vau i tō’u ha’amaita’ira’a pātereāreha. Maoti ’oia, ’ua manuia maita’i tā mātou taiete ’utuāfare nō te tauiha’a pāpa’ira’a i teie matahiti, ’o tā mātou i ha’amata mai a toru matahiti i teie nei. Tē hina’aro nei au e parau i te tahi atu feiā ’āpī ē, e ti’a ia rātou ’ia vai ineine noa nō te tūru’i i ni’a ia Iesu Mesia. ’Ia nā reira ana’e au, e ti’a roa iā’u ’ia upo’oti’a i ni’a i tō’u mau tāmatara’a ».
Te pūai maoti te hō’ē fa’atumura’a maita’i a’e
’Ua ha’api’i te peropheta Nephi, tei fa’a’oroma’i i te mau fifi rahi i te roara’a o tōna orara’a tā’āto’a, i teie parau mau nehenehe :
« ’Ia haere māite ’outou i mua i te ti’a-māite-ra’a i te Mesia, ma te ti’aturi pāpū roa, ’e te here i te Atua ’e te ta’ata ato’a. Nō reira, mai te mea e haere māite ’outou i mua ma te rave i te fa’a’amu’a i te parau a te Mesia, ’e ma te fa’aitoito ē tae noa atu i te hope’a ra, inaha, tē nā ’ō mai ra te Metua : E fa’ari’i ’outou i te ora mure ’ore » (2 Nephi 31:20).
Te tīa’ira’a, hō’ē puna mana nō te pūai i mua i te ’oto, e tae mai ïa ’ia rōtahi ana’e tātou i ni’a ia Iesu Mesia. ’Ua tae ānei te taime nō ’outou ’ia rōtahi hau atu ā i ni’a iāna ?