Te pūai nō te tāvini

E nehenehe ānei au e tāvini mai te mea ’aita vau e piri i te ta’ata ?

Nā Jessica Anne Lawrence

Te mau ve’a a te ’Ēkālesia

E nehenehe te Fa’aora e ha’apūai ia tātou, noa atu e fifi tō tātou ’ia toro i te rima i te ta’ata.

I tō’u haerera’a i te ha’api’ira’a tuarua, ’ua mana’o na vau ē, e ’ere au i te pipi faufa’a roa nā Iesu Mesia, nō te mea e fifi tō’u nō te paraparau i te ta’ata. E ’ere noa vau i te mea pae ta’ata roa—e mea māmahu roa rā vau ! Nō tō’u ho’i ha’amā haere noa, e mea fifi roa nō’u ’ia fa’ahoa mai ’e ’ia riro vau iho nō tō’u mau hoa i te fare ha’api’ira’a ’e i te fare purera’a.

Nō te reira tumu, ’ua pāto’i au i te mau pi’ira’a i roto i te Feiā ’Āpī Tamāhine ’e ’ua mana’o vau ē, e’ita vau e riro ato’a ’ei ta’ata pae vārua i tō’u mau taetaea’e tei riro ’ei ta’ata paraparau rahi a’e ’e te pae ta’ata ato’a iā’u nei.

Nō reira, i tō’u fa’ari’ira’a i tā’u parau tū’ite nō te ha’api’ira’a tuarua ’e i tō’u fa’aotira’a ’ia tāvini ’ei misiōnare, ’ua hope roa vau i te ri’ari’a !

’Ua mana’o vau ē, tē hina’aro nei te Atua iā’u ’ia tāvini, tō’u rā mana’o mātāmua roa, « nō te aha te Atua e hina’aro ai i te hō’ē ta’ata mai iā’u ’ia tāvini ? ’Aita tā’u e nehenehe e paraparau i te ta’ata ! »

Terā rā, noa atu tō’u mata’u rahi, ’ua fa’aoti au e ti’aturi i te Atua ’e ’ia tāvini i te hō’ē misiōni.

Tūru’ira’a i ni’a i te pūai o te Mesia

’A tāvini ai au, e mea fifi i te ha’amatara’a, terā rā, ’a tāmau noa ai au i te tāmata (’e ’a vaiiho ai iā’u iho ’ia iri atu), ’ua ’ite a’era vau ē, ’ua ha’apūai te Fatu iā’u nō te rave i te ’ohipa tāna i ani mai iā’u ’ia rave.

’Ua parau te Fatu i roto i te Buka a Moromona : « ’E ’ia tae mai te ta’ata iā’u nei, e fa’a’ite atu vau ia rātou i tō rātou paruparu. Tē hōro’a nei au i te paruparu i te ta’ata nei ’ia tupu tō rātou ha’eha’a ; ’e e nava’i ho’i tō’u maita’i nō te feiā ato’a i fa’aha’eha’a ia rātou iho i mua iā’u nei ; ’e ’ia fa’aha’eha’a rātou ia rātou iho i mua iā’u nei, ’e ’ia vai ho’i tō rātou fa’aro’o iā’u nei, ’ei reira vau e fa’ariro ai i te mau mea paruparu ’ei mea pūai nō rātou » (Etera 12:27).

I roto i tā’u misiōni, ’ua ’ite au ē, e nehenehe Iesu Mesia e rave i te mau mea māere nā muri iā’u, ’eiaha maoti tō’u pūai, maoti rā i tōna. ’E ’ua ’ite ato’a vau ē, ’aita tōna pūai i tae ’ōhie mai iā’u nō te mea noa e misiōnare au, nō te mea ato’a rā e nehenehe au e tūru’i i ni’a ’a haere ai au i te fare ha’api’ira’a tuarua.

Te mea fa’ahiahia mau nō ni’a ia Iesu Mesia, ’aita e tītauhia ia tātou te parau tū’ite ’aore rā te mau ti’ara’a ’ohipa roa maita’i nō te tāvini i roto i tōna bāsileia ’e nō te riro ’ei pipi pūai ! Mai te peu e mea ha’eha’a tātou ’e te ha’avare ’ore i roto i tō tātou hia’ai ’ia tāvini, e ’āfa’i māite Iesu Mesia ia tātou ’ia au i tō tātou nei huru mau, i te vāhi tei reira tātou, ’e e hōro’a mai ho’i ia tātou te tauturu ’e te pūai nō te tāvini iāna.

E ha’apūai ’oia ia ’outou ’a tāvini ai ’outou ia vetahi ’ē

« Tē vai nei te mau rāveʼa a te Fatu i pīhai iho ia ʼoutou nō te ʼite ʼe nō te faʼaʼite i tōna here […] E ’ite ʼoutou i te here o te Atua nō ʼoutou iho ʼe nō te taʼata tā ʼoutou e tāvini nei nōna. ʼA tauturu ai ʼoutou i te mau tamariʼi a te Atua i roto i tō rātou mau fifi, e au ē e mea māmā aʼe tō ʼoutou iho mau fifi. E haʼapūaihia tō ʼoutou faʼaroʼo ʼe tō ʼoutou tiʼaturiraʼa ».

Peresideni Henry B. Eyring, tauturu piti i roto i te Peresidenira’a Mātāmua, « ’A tāmata, ’a tāmata, ’a tāmata, ’āmuira’a rahi nō ’Ātopa 2008 (Ensign ’aore rā Liahona, Novema 2018, 92).

« ’Aita te here o te Atua e niuhia i ni’a i tō ’outou huru pae ta’ata, ’aore rā i ni’a i te rahira’a o tō ’outou hoa ; ’ua niuhia rā i ni’a i te mea e vai rā i roto i tō ’outou ’ā’au. Nā roto i tāna tauturu, ’e mai te peu e mea ha’eha’a ’outou ’e te fa’atura, e nehenehe ’outou e ha’api’i i te parau mau i te feiā ’ati a’e ia ’outou. Tē hina’aro nei au ’ia riro ’ei ta’ata ha’apa’o maita’i, nō te fa’a’ite i te mau mea tā te Atua e hina’aro iā’u ’ia fa’a’ite ».

Jocelyn R., 13

Hi’o i te fa’aaura’a rorouira Vivre l’Evangile i teie ’āva’e nō te tahi atu mau mana’o nō roto mai ia Jessica ’e ia vetahi ’ē, tei fa’aruru i te māmahu ’e te hepohepo tōtiare.