Te pūai nō te fa’aineine ’e nō te riro mai

Manuia ’e te Fa’aora

Nā David A. Edwards

Te mau Ve’a a te ’Ēkālesia

Tē tauturu nei te Fa’aora ia ’outou ’ia fa’atupu i tō ’outou mau hina’aro parauti’a nō tō ’outou ananahi.

Iesu Mesia e tauahi ra hō’ē tamāhine

« Fa’aineine i tō ’outou ananahi ». E au ra ē, ’o te reira te parau poro’i i muri mai i te orara’a o te feiā ’āpī—i te fare ha’api’ira’a, i te fare purera’a, i te ’ohipa, i te fare. E ha’amata paha ’outou i te feruri, « ’ē, ’oia mau. Tē ta’a ra iā’u ». ’Oia ïa, ’ua ’ite ’outou ē, tē tae mai ra te ananahi ’e e ti’a ia ’outou e fa’aineine nō te reira. ’E i roto ia ’outou, tē hina’aro nei ’outou e fa’ariro i tō ’outou ananahi ’ei mea fa’ahiahia.

E ha’api’i mai ’outou i te hāro’aro’a i tō ’outou iho ’ā’au. E ha’api’i mai ’outou i te mea tā ’outou e hina’aro mau nei. Tē hina’aro nei ’outou e rave i te mau ’ohipa maita’i ’e te mea faufa’a i roto i tō ’outou orara’a—’ia vaiiho i tō ’outou tāpa’o i roto i te ao nei ’e i roto i te orara’a o vētahi ’ē, nō te tāvini i te Atua ’e i tō ’outou ta’ata tupu. E ha’api’i mai ’outou ē, e ’ohipa ti’a te reira ’e e fa’a’oa’oa mau te reira ia ’outou.

Nō reira, teie te tahi atu mau ’ohipa faufa’a rahi ’oia ho’i, nō te tupu i te rahi ’e nō te fa’aineine i te ananahi :

• ’Ua ’ite ato’a te Fatu i tō ’outou ’ā’au (hi’o Te Ha’api’ira’a Tumu ’e te mau Fafaura’a 6:16). Nō te mea tō ’outou mau hina’aro hōhonu ’e te ha’avare ’ore nō tō ’outou orara’a e mea maita’i ’e te parauti’a, tei reira Iesu Mesia nō ’outou nō te ha’apūai ia ’outou ’a fa’aineine ai ’outou ia ’outou iho.

• ’Eiaha e fa’aineine noa ia ’outou nō te rave i te mau ’ohipa ; e riro mai ’outou mai tā te Metua i te ao ra ’e tā te Fa’aora i ’ite ē, e nehenehe ’outou e riro mai.

• E nehenehe ’outou e ’oa’oa i teie mahana ’a fa’aineine noa ai ’outou i te ananahi. E mea ta’a ’ē roa teie taime o tō ’outou orara’a, ’e te mau mā’itira’a maita’i tā ’outou e rave, e fa’aineine ïa ia ’outou nō te hō’ē ananahi maita’i.

’A feruri ai ’outou i te mea ’o tā ’outou e fa’aineine ra, ’a feruri ato’a e nāhea te Fa’aora i te ha’apūai ia ’outou i te roara’a o te ’ē’a. ’E ’a feruri i te mea tāna e tauturu ia ’outou ’ia riro mai.

I te aha ’outou e fa’aineine ai ?

Teie te tahi ma’a hi’ora’a :

• Ha’api’ira’a hau atu ā

• Mau fafaura’a o te hiero

• Misiōni

• Fa’aipoipora’a

• ’Ohipa ’e te tōro’a ’ohipa

• ’Utuāfare ’e te ti’ara’a metua

• Ti’ara’a pipi nō te orara’a tā’āto’a

Nāhea te Metua i te ao ra ’e ’o Iesu Mesia i te ha’apūai ia ’outou, ’a fa’aineine ai ’outou ia ’outou iho ?

Teie te tahi ma’a hi’ora’a :

1. E tono mai Rāua i te Vārua Maita’i, ’o te nehenehe e :

   1. Tāmāhanahana ia ’outou.

   2. Arata’i ia ’outou.

   3. Fa’auru ia ’outou.

   4. Fa’aha’amana’o ia ’outou i te mau mea tā ’outou i ha’api’i mai.

   5. Hōro’a i te ti’aturira’a i roto ia ’outou.

   6. Hōpoi mai i te hau i roto ia ’outou.

   7. Tāmarū i tō ’outou mau mata’u.

2. Tē fa’auru nei Rāua i te mau peropheta ’ia ha’api’i ia ’outou nā roto i te :

   1. ’Āmuira’a rahi.

   2. Mau ve’a a te ’Ēkālesia.

   3. Mau ha’apurorora’a ta’a ’ē.

   4. Mau tahua ’itenati a te ’Ēkālēsia ’e te mau rāve’a ha’apararera’a tōtiare.

   5. Nō te pūai o te feiā ’āpī : E arata’i nō te rave i te mau mā’itira’a.

3. Tē fa’auru nei Rāua ia vetahi ’ē ’ia tauturu ’e ’ia pāturu ia ’outou, mai :

   1. Te mau metua.

   2. Te mau hoa.

   3. Te feiā fa’atere.

   4. Te mau ’orometua ha’api’i.

’O vai tā Iesu Mesia e tauturu nei ia ’outou ’ia riro mai ?

Tē tauturu nei Iesu Mesia ’ia riro hau atu ā mai ’outou mai te huru ta’ata tāna e riro nei—hau atu ā i te i tō ’outou Metua i te ao ra.

Tē ’oa’oa nei Rāua nō te mau ta’ahira’a na’ina’i ato’a tā ’outou e rave nei—nō te mau pāpa’ira’a mo’a ato’a tā ’outou e tai’o nei, nō te mau fa’auera’a ato’a a te ’Ēkālesia tā ’outou e rave fa’aoti nei, nō te mau ’ohipa ha’api’ira’a ato’a tā ’outou e rave itoito nei, nō te mau hi’opo’ara’a ha’api’ira’a ato’a ’o tā ’outou e tuatāpapa nei, nō te mau ha’api’ipi’ira’a ato’a ’o tā ’outou e haere nei, nō te mau parau maita’i ato’a ’o tā ’outou parau nei, nō te mau ’ohipa tāvinira’a ato’a tā ’outou e hōro’a nei, ’e hau atu ā.

Ma te pūai o te Fa’aora, e ineine maita’i a’e ’outou nō tō ’outou ananahi ’o te ’ore roa e tupu mai te mea ’aita ’ōna. ’E e riro mai ’outou ’ei ’ohipa rahi roa atu ā.

’Ua riro te fa’aineinera’a ’ei tuha’a nō te fā a te Nō te pūai o te feiā ’āpī : E arata’i nō te rave i te mau mā’itira’a. Te tai’ora’a i te reira « e tauturu ïa ia ’outou ’ia fa’aineine nō te rave i te mau fafaura’a mo’a i roto i te hiero, ’ia fa’aineine nō te tāvini i te hō’ē misiōni, ’e ’ia ’ite i te ’oa’oa i te pe’era’a ia Iesu Mesia i te roara’a o tō ’outou orara’a ». I muri iho e nehenehe ’outou « e fāri’i i te mana nō ’ō mai iāna ra nō te fa’atupu i tāna mau ’ōpuara’a nō ’outou » ([2022], 2).

Te ’Evanelia a Iesu Mesia : Hō’ē fa’anahora’a nō te rirora’a mai

« E ’ere te mau fa’auera’a, te mau ’ōro’a, ’e te mau fafaura’a o te ’evanelia i te hō’ē tāpura ha’aputura’a tauiha’a e tītauhia ’ia rave i roto i te tahi ’āfata i te ra’i ra. Te ’evanelia a Iesu Mesia ’o te hō’ē ïa fa’anahora’a ’o te fa’a’ite mai ia tātou nāhea ’ia riro mai i te mea tā tō tātou Metua i te ao ra e hina’aro ’ia riro mai tātou ».

Peresideni Dallin H. Oaks, tauturu hō’ē i roto i te Peresidenira’a Mātāmua, ’āmuira’a rahi nō ’Ātopa 2000 (Ensign, Novema 2000, 32).

Tāmau noa i te fa’aineine

« E riro te ananahi ’ei mea hanahana nō rātou tei ineine ’e ’o tē tāmau noa nei i te fa’aineine ’ia riro ’ei mau mauiha’a i roto i te rima o te Fatu ».

Peresideni Russell M. Nelson, « ’A fāri’i i te ananahi ma te fa’aro’o », ’āmuira’a rahi nō ’Ātopa 2020 (Liahona, Novema 2020, 75–76).

tamāhine

« ’Aita vau i ha’apa’o maita’i roa i te Feiā ’Āpī Tamāhine i tō’u ’āpīra’a. I te hō’ē rā mahana, ’ua ’ite atu vau i tō’u māmā (e tuāhine fa’atere nō te Feiā ’Āpī Tamāhine) i te ha’ara’a i ni’a i te mau ’ōpuara’a nō te fa’anahora’a a te feiā ’āpī. Tē ha’amana’o nei au i te fa’aurura’ahia e tōna hi’ora’a ’ia nu’u i mua i te pae vārua, nō reira ’ua tāmata vau i te taui i tō’u huru.

« ’Ua ha’amata vau i te ha’api’i pāpū mai i te aura’a o te ’evanelia a Iesu Mesia nō tō’u orara’a. I te roara’a o te mau matahiti, ’ua ’ite pāpū mai au e parau mau te ’evanelia a Iesu Mesia ’Oia ato’a noa atu ē, e mea fifi roa te orara’a ’a feruri noa ai au i tō’u orara’a i muri a’e i tō’u taure’are’ara’a, ’a tāmau noa ai au i te tāpe’a pāpū i taua mau mea ra ’o tā’u i ’ite e parau mau ’ei tamāhine ’āpī, ’ua roa’a iā’u e rave rahi mau ’itera’a pae vārua tei fa’ariro i tō’u ’itera’a pāpū i te mea tei riro mai i teie mahana ».

Sundae I., Misamis Oriental, Firipino