« Ahea vau e fa’aea ai i te putapū i te mana’o hapa ’e te ha’amā ? », Nō te pūai o te feiā ’āpī, Māti 2024.
Te pūai nō te upo’oti’a i ni’a i te hara
Ahea vau e fa’aea ai i te putapū i te mana’o hapa ’e te ha’amā ?
I te tahi taime e au ra ē, e mea ’ōhie a’e ’ia fa’atupu i te mana’o ti’aturi ’ore nō ni’a ia ’outou iho, ’eiaha rā ’ia putapū i te here o te Fa’aora nō ’outou—mai tā Nephi rā i ’ite, ’aita ïa i tītauhia ’ia riro mai te reira te huru.
’Ia rave ana’e ’outou i te hō’ē ’ohipa hape, e nehenehe ’outou e mana’o ē ’ua riro ’outou ’ei mea manuia ’ore. Te reira, e ti’a ïa ia ’outou ’ia ’ite maita’i a’e. Ē ’aita e faufa’a ’ia herehia ’outou.
I te hōhonura’a, ’ua ’ite ’outou ē, e ’ere teie mau mea i te parau mau. ’Ua ha’api’i mai ’outou i tō ’outou faufa’a ’ei tamaiti ’e ’ei tamāhine nā te Atua, ’e ’ua ’ite ’outou ē, te tātarahapa e ’ohipa mau ïa ’e te ti’a. Noa atu rā te reira, i muri a’e i tō ’outou harara’a ’aore rā i te hapera’a, e nehenehe ’outou e fa’ahemahia ’ia fa’autu’a ia ’outou iho hau atu i te tahi atu ta’ata ma te mau mana’o hapa ’e te ha’amā.
Terā rā vetahi o tā tātou mau ta’ata o te pāpa’ira’a mo’a au roa a’e, ’ua putapū i te tahi taime i te reira.
’O Nephi ato’a ?
I muri a’e i tōna pāpa’ira’a nō ni’a i te pohera’a o tōna metua tāne, ’ua pāpa’i Nephi : « ’Āre’a rā, noa atu ā te maita’i rahi o te Fatu i te fa’a’itera’a mai iā’u i tāna mau ’ohipa rahi ’e te māere, ’ua fa’ahiti pūai atu tō’u ’ā’au i teie mau parau : ’Auē ho’i au ’o te ta’ata ’ati rahi ē ! ’Oia ïa, tē ’oto nei tō’u ’ā’au nō tō’u nei tino ; tē mihi nei ho’i tō’u nei vārua nō tā’u mau ’ohipa ’ī’ino. ’Ua ha’a’ati-haere-hia vau, nā roto i te mau fa’ahemara’a ’e te mau hara ’o tē ha’afifi-’ōhie-nei iā’u. ’E ’ia hina’aro vau ’ia ’oa’oa, tē autā ra tō’u ’ā’au nō tā’u mau hara » (2 Nephi 4:17–19).
’O Nephi teie tā tātou e parau nei—te ta’ata ā tei fa’aora i te mau ’api veo ia Labana ra, tei hāmani i te hō’ē fana i roto i te medebara, ’e tei hāmani i te hō’ē pahī ma te ’ore roa i hāmani i te hō’ē nā mua a’e nei. E ’itera’a pāpū tōna nō ni’a i te maita’i o te Fatu ; noa atu rā te reira, ’ua ’ite ’oia i roto iāna ē e’ita e ti’a iāna nō tāna mau hara ’e tōna mau paruparu.
Nō reira e aha tā tātou e ti’a e rave ? Mai te mea, tē putapū nei tā tātou ’aito nō te Buka a Moromona i te mana’o fa’ahapa ’e te ti’a ’ore, e aha ïa tā tātou e rave ’ia putapū ana’e tātou i te hō’ē ā huru ?
Te tāviri ’o te rōtahira’a ïa i ni’a ia Iesu Mesia
’Aita te ’ā’amu o Nephi i hope i reira. Te tāviri nō Nephi ’o te rōtahira’a ïa i ni’a ia Iesu Mesia ’eiaha rā i ni’a iāna iho.
’A ’oto ai Nephi, tē nā ’ō ra ’oia : « ’Āre’a rā, ’ua ’ite au iāna tā’u i ti’aturi. ’O tō’u Atua tō’u tauturu » (2 Nephi 4:19–20).
I muri a’e i teie tauira’a o te ferurira’a, ’aita tā tātou ’aito o te pāpa’ira’a mo’a e rōtahi fa’ahou i ni’a i te ahoaho ’o tāna i putapū nō tāna mau hape. ’Āhani i te reira, ’ua ’oa’oa ’oia i tōna Fa’aora ! ’Ua parau Nephi, « ’a ’oa’oa, e tō’u ’ā’au, ’e ’a ti’aoro atu i te Fatu, ’e ’a parau atu ē : E te Fatu, e ’ārue au ia ’oe ē a muri noa atu ; ’oia ïa, e ’oa’oa tō’u vārua ia ’oe, e tō’u Atua, ’e te papa nō tō’u ra fa’aorara’a » (2 Nephi 4:30).
Mai ia Nephi, e nehenehe ’outou e ’ite i te aroha, te fa’a’orera’a hara, ’e te hau maoti Iesu Mesia. ’Aita paha ’outou e nino’a mana’o nei ē, e nehenehe ’outou e hōro’a i te aroha ia ’outou iho, tē vai ra rā te hō’ē ta’ata ’o te nā reira. ’Ua parau Elder Jeffery R. Holland nō te pupu nō te Tino ’Ahuru ma Piti ’āpōsetolo, « e’ita te aroha mau o te Mesia e hōro’a noa mai i te fa’aorara’a ia tātou i te ’oto, te hara ’e te pohe, i te fa’aorara’a ato’a rā i te hitahita ’ore ».1
Nō reira, ’ia ’ite ana’e ’outou i te fa’aturumara’a rahi, e ’aita ’outou e ’ite ra i te hō’ē rāve’a nō te upo’oti’a i ni’a i tā ’outou mau hara ’e tā ’outou mau hape, ’ia ’ite mai ’outou ē, ’aita roa atu te Metua i te ao ra ’e o Iesu Mesia i fa’aea i te here ia ’outou. ’A rōtahi ia ’outou i ni’a i tō ’outou Fa’aora, ’e e nehenehe tāna e tauturu ia ’outou ’ia upo’oti’a i ni’a i tā ’outou mau hara ’e tā ’outou mau hapa.