« Te temeio ’o tā tātou e hina’aro i te mau mahana ato’a », Nō te pūai o te feiā ’āpī, Māti 2024.
Te pūai nō te upo’oti’a i ni’a i te hara
Te temeio ’o tā tātou e hina’aro i te mau mahana ato’a
Mai te mea ’ua here te Atua ia tātou, nō te aha ’oia e ani mai ai ia tātou ’ia taui ’e ’ia tātarahapa ? Teie te tahi mau parau mau nō ni’a i te hara ’e te tusia tāra’ehara a Iesu Mesia.
Fa’ahōho’ara’a nā Adam Howling
’Āhani pai e nehenehe ’outou e riro ’ei ’ite i te mau temeio tā Iesu Mesia i rave i roto i tōna orara’a i ni’a i te fenua nei ? Tē hi’ora’a iāna ’ia fa’aora i tei ma’ihia ’e ’ia fa’ati’a mai i tei pohe ? Noa atu e’ita tā tātou e nehenehe e fa’aho’i i te tau i muri nō te hi’o i teie mau temeio, tē vai ra te hō’ē temeio a Iesu Mesia ’o tā tātou e nehenehe e hi’o i te mau mahana ato’a. ’E ’o te hō’ē teie e mea faufa’a roa a’e i te tā’āto’ara’a : ’Ua upo’oti’a ’oia i ni’a i te hara.
Te parau mau nō ni’a i te hara
E nehenehe vetahi i te uiui ē, nō te aha e ’ohipa ’ino roa te reira. Inaha ho’i, noa atu e rave tātou i te hapee i’ō nei ’e i’ō, e here noa te Atua ia tātou, e ’ere ānei ? ’Oia ïa, e ’oia mau, ’ua here roa te Metua i te ao ra ’e o Iesu Mesia ia tātou. Terā ra nō te mea ’ua here rahi mau rāua ia tātou, ’aita te ’ā’amu e fa’aea noa i reira.
I tōna fārereira’a i te mau ’āti Nephi, ’ua ha’api’i te Fa’aora ia tātou nō te aha e mea faufa’a rahi ’ia upo’oti’a i ni’a i te hara : « ’Aita roa te hō’ē mea vi’ivi’i e ō i te bāsileia [o te Atua] » (3 Nephi 27:19).
’Aita ’oia i parau « ’aita roa te hō’ē mea vi’ivi’i maori rā te tahi mau hape ri’iri’i » ’Ua ha’api’i oia ē, noa atu te huru o te hara (te ha’apa’o ’ore i te mau fa’auera’a a te Atua ma te ’ite) e tāpe’a ia tātou ’ia ora fa’ahou i pīha’i iho iāna.
E mea fifi te reira. ’Aita ā tā tātou e nehenehe e pe’e maita’i roa i te mau fa’auera’a a te Atua. E parau mau te reira nō te ta’ata ato’a—te peropheta parauti’a roa a’e, te ta’ata hara ’ino roa a’e, ’e te mau ta’ata ato’a i rōpū i nā e piti. Nō te mea ho’i ē, e’ita tātou e nehenehe e tūmā i tā tātou mau hape nā roto ia tātou iho, e pāto’i te hara ia tātou ’ia tomo i roto i te bāsileia o te Atua.
Te temeio o te Tāra’ehara a te Mesia
Maoti pai, ’ua ’ite te Metua i te ao ra ’e ’o Iesu Mesia ē, e hina’aro tātou i te tauturu. I roto i te ’ō nō Getesemane ’e i ni’a i te sātauro, ’ua rave Iesu Mesia i ni’a iāna i tō tātou mau māuiui ato’a, te mau ma’i, te mau ’ati, te mau paruparu ’e te mau hara (hi’o Alama 7:11–13). Nō te mea ho’i ē, ’o ’oia te Tamaiti parauti’a roa a’e a te Atua ’e te tamaiti tāhuti a Maria, e nehenehe iāna e ’aufau i te ho’o o te hara ’o te ’ore roa e ti’a i te tahi ’ē atu ta’ata e ’aufau.
Nō reira e ti’a iāna e parau i te mau ’āti Nephi, « nō reira ’aita roa te hō’ē mea e ō atu i roto i te fa’aeara’a o te [Atua], maori rā ’o rātou ’o tei tāmā i tō rātou mau ’ahu i roto i tō’u ra toto, ’e nō tō rātou fa’aro’o, ’e te tātarahapara’a i tā rātou mau hara ato’a, ’e tō rātou ha’apa’o maita’i ē tae noa atu i te hope’a » (3 Nephi 27:19).
’Auē ïa temeio ē, maoti Iesu Mesia, e nehenehe tātou e tāmāhia i tā tātou mau hara ! I te taime ’a ’ite ai tātou ē, e tītauhia te tusia tāra’ehara a te Fa’aora nō tātou, e nehenehe tātou e tūru’i i ni’a i tōna pūai mai te mea e fa’aro’o tō tātou iāna, e tātarahapa i tā tātou mau hara, ’e e tāmau noa i te pe’e iāna ma te ha’apa’o maita’i ē tae noa atu i te hope’a. E temeio teie ’o te tupu i te mau mahana ato’a, ’ia ti’aturi ana’e ’outou i tōna mana ’e ’a ’ohipa ai ma te fa’aro’o !