Pūai i roto i te paruparu

Tē ha’ara’a ma te paruparu ’o te ’ohipa ta’a ’ē ïa a te Fa’aora

Nā Tyler ’e Kiplin Griffin

E nehenehe Iesu Mesia e tauturu ia tātou ’ia tupu i te rahi nā roto i te mau tāfifira’a, ’eiaha noa nō te fa’arurura’a i te reira.

Fa’ahōho’ara’a nā Uran Duo

’Aita roa Mason e putapū ra i te here o te Atua mai mūta’a ra. Tē aro nei ’oia e rave rahi matahiti i teienei, i te ’aravīra’a pūai [depression] ma te manuia ’ore, ’e tē pe’ape’a nei ’oia ē, e’ita roa atu tōna mau moemoeāra’a e tupu.

Tē fa’aro’oro’o nei Anna i te tahi mau feiā ’āpī ’ia paraparau nō ni’a i te mau ’itera’a o te heheura’a ’e te mau temeio. Noa atu tē tāmata nei ’oia, ’aita ’oia e ’ite ra i te fa’ari’ira’a i te mau pāhonora’a ’aore rā i te orara’a i te mau ’itera’a pae vārua mai ia vetahi ’ē.

Tē uiui noa nei Ethan, e putapū fa’ahou ānei ’oia e mea mā ’oia ’aore rā e mea ti’amā fa’ahou ’oia. E rave rahi taime tōna topara’a nō te tahi mau fa’ahemara’a tāna i mana’o ’ua riro ’ei ha’avīra’a faufa’a ’ore ’e tē uiui nei ’ua mo’e roa paha tōna mau ha’amaita’ira’a i fafauhia nōna. Tē uiui nei ’oia ē, e nehenehe ānei tāna mau hara e fa’a’orehia ’e tē mana’o rahi nei ’ua hapa ’oia i te ’Ēkālesia.

Tē fifi nei Madison i te ’āehuehura’a i te pae o te mā’a. Tē fifi nei Olivia i te ’āehuehura’a i te pae o te ha’api’ipi’ira’a. Tē aro nei Conner i te ma’i hirahira (te mana’o fa’ahapa iāna iho i te pae mōrare). ’Ua māferahia Abigail ’e tē mana’o nei ’oia ē, ’aita tōna e faufa’a fa’ahou. Tei roto nā metua o Jake i te fa’ata’ara’a, ’e tē māuiui nei ’oia ’e tē ta’a ’ore nei. ’Ua ha’avarehia Jayden ’e tē mana’o nei ’oia e’ita e nehenehe iāna e fa’a’ore i te hapa.

E mea rahi mau tō te ta’ata fifi, tē vai nei rā te hō’ē rāve’a. E i’oa tō taua rāve’a ra—’o Iesu Mesia. E hina’aro teie mau ta’ata ato’a ’ia putapū fa’ahou mai i te pūai, te mā, te ’oa’oa ’e te ’īra’a, e’ita rā tā rātou e nehenehe e fa’a’āfaro i tō rātou mau fifi nā roto ia rātou ana’e. Tē pūpū nei rā Iesu Mesia i te tauturu. Nō te mea, te ha’ara’a ma te paruparu ’o tāna ïa ’ohipa ta’a ’ē. E’ita tāna tauturu e tae noa mai ’ia au i te huru mau ’e i te taime tā tātou e hina’aro, e tae mai iho ā rā.

Teie te tahi mau parau tumu nō te tauturu ia tātou ’ia fa’ari’i i te anira’a a te Fa’aora ’ia haere nā muri iāna (hi’o Mose 6:34), i te taime iho ā rā ’a ’aro ai tātou ma te paruparu.

Mai te mea ra ’ua riro te orara’a ’ei tāmatara’a

’Ua here te Atua ia ’outou hau atu i tō ’outou mana’o tāmāhanahana ’e tō ’outou hau maita’i. E hia mau ’aito tā ’outou tei ’ite noa i te au maita’i ’e te manuia ? Pāpū roa ’ua ’aro pinepine na rātou i te pāto’ira’a ’ū’ana ’e i te mau fifi rahi. I roto i tō tātou mau tāmatara’a o te orara’a nei, « ’ua ti’a i te Fatu ’ia ’avau mai i tōna ra mau ta’ata ; ’oia ïa, tē tāmata mai ra ’oia i tō rātou fa’a’oroma’i ’e tō rātou fa’aro’o ho’i » (Mosia 23:21). E’ita paha tātou e au maita’i i te reira, pinepine rā tō tātou mau tāmatara’a fifi roa a’e, i te hōro’a mai i te mau rāve’a fa’ahiahia ’ia tupu tātou i te rahi.

E ’ere te paruparu i te hō’ē tāpa’o nō te pāto’ira’a a te Atua

E rave rahi nūna’a i tahito ra tei ti’aturi ē, e tāpa’o fa’autu’ara’a te mau ma’i pae tino ’aore rā pae ferurira’a nā te Atua (hi’o Ioane 9:2). E tuha’a rā te paruparu nō te orara’a tei fa’atupuhia e te hi’ara’a. Noa atu e tuha’a mātarohia ’e te faufa’a rahi te ’arora’a i te mau fifi nō te fa’anahora’a a tō tātou Metua i te ao ra, tē fa’arurura’a teie mau arora’a ’ōtahi noa, e ’ere ïa i te reira. ’Aita Iesu Mesia i tonohia mai nō te fa’ahapa ia tātou ; ’ua tonohia mai ’oia nō te here ’e nō te tauturu i te fa’aho’ira’a i te feiā i tei mo’e, tei paruparu, ’aore rā tei ’ōtahi noa—’oia ho’i ’o tātou pā’āto’a (hi’o Ioane 3:16–17 ; Luka 15).

E fa’a’eta’etahia te mau mea paruparu nā roto i te Mesia

E mea faufa’a roa ’ia fa’ata’a tātou ia tātou iho nā roto i tō tātou tū’atira’a i te mau fafaura’a ’e te Mesia ’e tō tātou ti’aturira’a i ni’a i tōna parauti’a ’eiaha rā nā roto i tō tātou parauti’a ’ore. ’Aita roa atu Iesu Mesia i huri tua i te feiā paruparu tei ’imi itoito iāna ma te fa’aro’o. E hōro’a te Atua « i te paruparu i te ta’ata nei ’ia tupu tō rātou ha’eha’a ; ’e e nava’i ho’i [tōna] maita’i nō te feiā ato’a i fa’aha’eha’a ia rātou iho i mua [iāna…] ’e ’ia vai ho’i tō rātou fa’aro’o [iāna] », ’e mai te mea e nā reira rātou, « ’ei reira e fa’ariro ai [’oia] i te mau mea paruparu ’ei mea pūai nō rātou » (Etera 12:27). ’Ia ’āfa’i ana’e tātou i tō tātou mau ’arora’a i te Fatu ra ma te ’ā’au ’oto ’e te vārua tātarahapa (hi’o 3 Nephi 9:20), e’ita paha ’oia e tātara ’ē i tē reirara’a ra taime, e tauturu rā ’oia ’e e ha’apūai ia tātou.

’A fa’a’oroma’i ia ’outou iho.

Te ’ē’a nō te fafaura’a e rāterera’a roa mau ïa, e ’ere i te horora’a vitiviti. Te pe’era’a i taua ’ē’a ra e tauturu ia tātou ’ia fa’aruru i te mau ha’atāfifira’a e rave rahi, i te mau mea maita’i ’e te mea ’ino, te mau mea ’ana’anatae ’e te mau mea ataata, te hitira’a mahana ’e te mau vero o te orara’a. E rave rahi ha’api’ira’a e nehenehe e ’apohia mai nō te mau ta’ahira’a ato’a o taua rāterera’a ra. E mea pinepine te maita’i rahi o Iesu Mesia i te heheuhia mai i te roara’a o te tau, ’eiaha noa i te mau taime mo’emo’e ’aore rā i te mau taime ana’e e tupu ai te mau temeio.

Tū’ati atu i te Mesia

Mai te mea tē ’ite ra ’outou i te paruparu ’aore rā i te fifi, ’a fa’ari’i i te anira’a a te Fa’aora : « E haere mai ’outou iā’u nei, ’e te feiā ato’a i ha’a rahi ’e tei teiaha i te hōpoi’a, e nā’u ’outou e fa’aora » (Mataio 11:28). ’A ’ite mai i te mau rāve’a nō te tauturu ia ’outou ’ia tū’ati atu iāna. ’A rae’ahia ai ’oia ia ’outou, e ’ite mai ’outou ’ua rae’ahia ’outou e āna ’e e’ita roa ’oia e fa’aru’e ia ’outou ! E’ita te orara’a e maita’i roa mai, e’ita ato’a te paruparu, te māuiui ’e te ’arora’a e ’ore. Mea maita’i a’e rā ma te Fatu Fa’aora i tō ’outou na pae nō te fa’ati’a mai ia ’outou ’ia topa ana’e, nō te rapa’au i tō ’outou mau pēpē, ’e nō te arata’i ia ’outou i ni’a i te mau ’ē’a e arata’i atu i te ’oa’oa maoro.

Te ’ohipa ta’a ’ē na Iesu Mesia i roto i te ha’ara’a ma te paruparu. E ’ohipa ta’a ’ē ’oia i roto i te ha’ara’a ’e ’o ’outou !