« Fa’ari’i i tōna pūai—i teienei ’e i te mau taime ato’a », Nō te pūai o te feiā ’āpī, Māti 2024.
Te pūai i te mau taime ato’a
Fa’ari’i i tōna pūai—i teienei ’e i te mau taime ato’a
Mea ti’amā ānei ’outou i te pūai o Iesu Mesia ’e i te tauturu.
Fa’ahōho’ara’a nā Alex Nabaum
’A feruri na, tē ori haere ra ’outou nā roto te uru rā’au ’e e fārerei atu ra i te hō’ē tamaiti e peretete ra ’e topa atu ra i roto i te tāfifira’a o te mau ’āma’a rā’au maro. Hō’ē o te mau ’āma’a e mea teiaha roa nō te fa’aātea ’ōna ana’e.
E tauturu ānei ’outou ? ’Aore rā e pārahi ’outou nā mua, e feruri atu ai ’e e fa’aoti e tauturu ānei iāna ?
’Oia mau e tauturu ’outou ! Te mana’o e pāto’i i tā ’outou tauturu e tae roa atu e ti’a ānei i te tamaiti ’ia fa’ari’i i te reira, e riro ’ei mea ma’ama’a nō ’outou. ’E nō reira, e mana’o tātou mai te reira nō tātou iho—’eiaha ra, i roto i te reira tupura’a, ’o tātou te tamari’i i roto i te fifi.
E mea faufa’a ’outou ’ia fa’aorahia.
Noa atu tō ’outou fāito matahiti, e tamari’i ’outou ’ia fa’aauhia i tō tātou Metua i te ao ra ’e ia Iesu Mesia. (’Oia mau, e tamari’i mau ’outou nā te Metua i te ao ra.) ’E tō ’outou pūai—i te pae tino, i te pae ferurira’a, i te pae vārua ’aore rā i te pae manava—’aita ïa e nehenehe e fa’aau i tō Rāua. Te rahira’a o tātou ’ua ’ite maita’i i teie huru. Terā rā, ’ia peretete ana’e tātou nō terā e terā tumu, pinepine tātou pā’āto’a i te mana’o ē, e’ita tātou e nehenehe e ani i te tauturu e tae roa atu ’ua ti’a ia tātou i te reira. E ’ere roa atu ra te reira i te parau mau.
’Ua fa’ati’a mai te peresideni Dieter F. Uchtdorf, e tauturu piti ïa i roto i te Peresidenira’a Mātāmua i te reira taime, i te parabole nō te māmoe tei mo’e i roto te Luka 15.
’Ua ani ’oia, « e tītauhia ānei i te māmoe ’ia ’ite nāhea ’ia fa’a’ohipa i te hō’ē ’āvei’a nō te nūmera i tōna mau rēni fenua ? » « Tītauhia ānei iāna ’ia ’ite i te fa’a’ohipa i te [Rāve’a Arata’i Tape’e’utari] GPS nō te fa’ata’a i te vāhi tei reira ’oia ? Tītauhia ānei iāna ’ia roa’a te ’aravihi nō te hāmani i te hō’ē fa’aaura’a rorouira ’o te tuō i te tauturu ? Tītauhia ānei i te māmoe ’ia fa’ari’i i te parau mana a te hō’ē ti’a mana hou te tīa’i māmoe maita’i e haere mai ai e fa’aora iāna ?
« ’Aita. Pāpū roa ē, ’aita ! E nehenehe te māmoe e fāri’i i te fa’aorara’a nō ’ō mai i te Atua ra nō te mea ’ua herehia ’oia e te tia’i māmoe maita’i.
« Nō’u nei, ’ua riro te parabole nō te māmoe tei mo’e ’ei hō’ē o te mau [tia’ira’a] rahi roa a’e i roto i te tā’āto’ara’a o te pāpa’ira’a mo’a ».1
E nehenehe tātou pā’āto’a e mo’e nō te tumu ta’a ’ē e rave rahi. ’E nō tātou tāta’itahi, e nehenehe te tauturu a te ra’i i haere a’ena mai e ’imi ia tātou.
Tē vai noa ra te tauturu
E roa’a te tauturu ia tātou ’eiaha noa i te taime e hara ai tātou, i te taime ato’a rā ’a tāmata ai tātou ’ia ora maita’i noa, mai tā tātou e nehenehe. ’Ua ha’api’i Elder David A. Bednar nō te Pupu nō te Tino ’Ahuru ma Piti ’āpōsetolo :
« Tē uiui nei tō’u mana’o ē, te manuia ’ore rā ānei tātou i te ’ite hope i teie huru fa’aitoito tō te Tāra’ehara i roto i tō tātou orara’a, ’e ’aita ānei tātou e ti’aturi hape noa nei ē, nā tātou iho e amo i tā tātou hopoi’a ’o tātou ana’e—nā roto i tō tātou iho itoito, tō tātou iho pūai, ’e tō tātou ha’apa’o ’e tō tātou iho mau ’aravihi ’iti.
« E mea maita’i ’ia ’ite ē, ’ua haere mai Iesu Mesia i te fenua nei ’ia pohe nō tātou. Terā rā, e tītau-ato’a-hia ia tātou ’ia māuruuru i te mea ē, tē hina’aro nei te Fatu, nā roto i tāna Tāra’ehara ’e nā roto i te mana o te Vārua Maita’i, ’ia hōro’a i te ora ia tātou—’eiaha i te arata’i noa ia tātou, ’ia ha’apūai ato’a rā ’e ’ia fa’aora i tō tātou māuiui ».2
Mea ti’amā ’outou nō te fa’ari’i i tāna tauturu ! Noa atu te ’ē’a tā ’outou i haere nā mua a’enei, ’ua ineine Iesu Mesia nō te haere ’e o ’outou nō te toe’a o te haere’a.