« ’Outou ’e te Fa’aora i mua i te ao nei », Nō te pūai o te feiā ’āpī, Māti 2024.
Te pūai nō te upo’oti’a i ni’a i te ao nei
’Outou ’e te Fa’aora i mua i te ao nei
Te mau fa’anevanevara’a, te mau fa’ahemara’a, te hāmani-’ino-ra’a—’Ua upo’oti’a Iesu Mesia i te mau mea o teie nei ao ’e e nehenehe ’oia e ha’apūai ia ’outou nō te upo’oti’a ato’a i ni’a i te reira.
Fa’ahōho’ara’a nā Alex Nabaum
’Ua upo’oti’a Iesu Mesia i ni’a i te ao nei, ’e tē ani nei ’oia ia tātou ’ia nā reira ato’a. E aha rā « te ao nei », ’e e aha te aura’a nō tātou ’ia upo’oti’a i ni’a i te reira ?
Teie tā te peresideni Russell M. Nelson i parau : « Te aura’a [te upo’oti’ara’a i ni’a i te ao nei], te upo’oti’ara’a ïa i ni’a i te fa’ahemara’a, te ha’ape’ape’ara’a i te mau mea o teie nei ao hau atu i te mau mea a te Atua ».1
E nehenehe « te mau mea o teie nei ao » e vai i roto te mau faufa’a, te tu’iro’o, te mana, te ’āruera’a, te ’āreareara’a, ’aore rā te mau mea tā te ta’ata tino nei e fāna’o i te tāhuti nei. Noa atu ē, e ’ere te tahi o teie mau mea i te mea ’ino noa, ’ia mo’e ana’e ia tātou i te rōtahi i ni’a i te Atua, nō te mea tē ha’ape’ape’a rahi nei tātou nō te mau mea o te ao nei, e ū atu tātou i ni’a i te mau fifi tau maoro.
’Ua ha’api’i Iesu Mesia ē, e fa’aruru tātou i te pāto’ira’a ’e te hāmani-’ino-ra’a ’a upo’oti’a ai tātou i ni’a i te ao nei (hi’o Ioane 15:18–21). Terā rā, e nehenehe noa tātou e ’ite mai i te hau ’e « ’ia hauhia tō ’outou » nō te mea ’ua upo’oti’a ’oia i ni’a i te ao nei nā mua (Ioane 16:33).
’Ua ’ite mai teie feiā ’āpī i te pūai i roto ia Iesu Mesia, nō te upo’oti’a i ni’a i te mau ha’afifira’a o te ao nei, ’e ’outou ato’a !
Te mau fa’anevanevara’a o te ao nei
’Ua rave au e rave rahi hora nō te ha’uti i te mau ha’uti rorouira i te mau mahana ato’a e rave rahi matahiti. ’Ua ’itehia mai iā’u te mau hoa, ’e ’ua ’ite au i tō’u faufa’a rahi. I muri a’e rā i te ha’utira’a, ’ua ’ite a’era vau i tō’u pau, mai te huru ra tē vai ra hō’ē mea e mo’e ra. ’Aita vau i ’oa’oa hope roa.
’Ua hina’aro vau e rōtahi i ni’a i te mau mea ’o te fa’a’oa’oa mau mai iā’u ’e ’o te tauturu mai iā’u ’ia maita’i atu ā. ’Ua ha’amata vau i te pure pinepine. I tō’u fa’a’itera’a i te mea e vai ra i roto i tō’u ’ā’au i te Metua i te ao ra, ’ua putapū vau i te hō’ē nino’a mana’o pūai o te here.
’Ua hina’aro vau e rave i te mau mea ’o te ha’afātata atu ā iā’u i te Mesia, nō reira ’ua fa’atumu atu vau i ni’a i te mau mea ’ōhie mai te tai’ora’a i te pāpa’ira’a mo’a ’e te pure i te mau mahana ato’a, te pārahira’a i pīha’i iho i te mau ta’ata e mau nei i te Vārua ’e i te tāmatara’a ’eiaha ’ia fa’anevanevahia e te mau mea e haere ’ē ai te Vārua Maita’i. ’Ua tauihia tō’u orara’a. E mea ’oa’oa a’e nō’u.
’Ia ha’afātata ana’e au i te Mesia, ’ua ’ite au ē, tē vai ra te mau mea faufa’a a’e i te mau ha’uti rorouira, mai te peu e hina’aro vau ’ia ’oa’oa mau. Tē vai ra te mau mea e mea mure ’ore.
Alina U., 18 matahiti, Lithuania
Te mau tupura’a o te ao nei
I te fare ha’api’ira’a, ’ua fa’aruru vau i te fa’ari’ari’ara’a ’e ’ua fa’ao’oo’ohia nō tō’u mau ti’aturira’a. Nō te reira ’e nō te tahi atu mau tāmatara’a, e au ra iā’u tē ma’iri mai ra te ao nei i ni’a iā’u. ’Ua fa’aitoito mai rā tō’u metua vahine iā’u ’ia tūru’i i ni’a i te tāra’ehara a Iesu Mesia, nō te mea tē hāro’aro’a nei ’oia i tō’u māuiui ’e e nehenehe ’oia e hōpoi mai iā’u te hau ’e te tāmāhanahanara’a (hi’o Te Ha’api’ira’a Tumu ’e te mau Fafaura’a 19:23).
’Ua fa’aoti a’era vau e fafau i te Metua i te ao ra ē, e ha’apae tāmau vau i te mā’a. ’Ua ani vau iāna ’ia tauturu mai iā’u ma tō’u mau paruparu ’e mau ’arora’a, ’e ’ua nā reira noa ’oia mai taua taime ra.
’Ua ha’afātata te ha’apaera’a mā’a iā’u i te Metua i te ao ra ’e ia Iesu Mesia. ’Ua ’ite au ē, tei pīha’i iho noa rāua iā’u, ma te hōro’ara’a mai iā’u i te pūai nō te upo’oti’a i ni’a i tō’u mau tāmatara’a ’e ’ia ’ite mai i te ’oa’oa mau. E fa’aora Iesu Mesia i tō’u mau pēpē ’e e tauturu iā’u ’ia ho’i i pīha’i iho i tō’u Metua i te ao ra.
Vera R., 17 matahiti, Brasília, Peretīria