« Nō te aha vau e hina’aro ai ia Iesu Mesia », Nō te pūai o te feiā ’āpī, Māti 2024.
Te pūai i roto i tō ’outou aura’a ’e ’ōna
Nō te aha vau e hina’aro ai ia Iesu Mesia
E mea faufa’a roa te hāro’aro’ara’a i tō tātou aura’a e te Fa’aora.
Te fa’ati’a’ia a te Fatu, nā Kelsy ’e Jesse Lightweave
« Nō te aha vau e hina’aro ai ia Iesu Mesia ? » E uira’a faufa’a roa e ui ia ’outou iho—’eiaha « tā’āto’a » te ’āmuira’a ’aore rā tō ’outou ’utuāfare « tātou ». Te mea mau rā, « vau. » E aha tā’u pāhonora’a i taua uira’a ra ?
Te pāhonora’a ’ua ’ite mai au nō’u iho, ’ua tae mai nā roto i tā’u iho mau ’ohipa o te fa’aro’o ; te tūtavara’a i te mahana ato’a ’ia ora i tā’u mau fafaura’a, ’oia ato’a i tā’u fafaura’a nō te bāpetizora’a ; ’e te ha’api’ira’a mai i te fa’aro’o i te reo o te Fatu nā roto mai i tōna Vārua. ’E te mea faufa’a roa atu, ’ua fa’atumuhia te reira i ni’a i tō’u aura’a ’e tō’u Fa’aora.
Hō’ē aura’a ’e te Fa’aora
E nehenehe au e tāpura ma te ti’aturi rahi i te mau tumu e hina’aro ai au i tō’u nā metua ’aore rā i tō’u mau hoa piri roa a’e. ’Ua fa’a’amu tāmau vau i te reira mau aura’a. Tō rātou faufa’a i roto i tō’u orara’a e ’ite-pāpū-hia ’e te pa’ari mai te tau ’e te tauto’ora’a ’o tā’u e rave nō te ha’afātata atu iā’u ia rātou nā roto i te mau mea ’ōhie mai te mau ’āparaura’a tāmau, te ha’amātaura’a ia rātou, ’e te fa’ati’ara’a i tō rātou pa’ari parauti’a ’ia fa’auru i tō’u orara’a.
E nehenehe tō tātou aura’a ’e o Iesu Mesia e pe’e i te hō’ē ā hōho’a. E tītauhia te pure i te Metua i te ao ra i te mau mahana ato’a nā roto i te i’oa o Iesu Mesia. Mai te reira ato’a, nō te ha’amātaura’a i te Fa’aora ma te te ’imira’a i te mau pāpa’ira’a mo’a, te tai’ora’a i te mau parau a te mau peropheta ’e te mau ’āpōsetolo, ’e te fa’aro’ora’a i te Vārua. Tē fa’ahōhonu nei au i teie aura’a ’a fa’ati’a ai au i te mau mea ato’a tā’u e ha’api’i mai ’ia fa’auru i tō’u orara’a ’e tō’u huru.
Te feruri ato’a i te fa’anahora’a nō te fa’aorara’a. Teie upo’o parau, « fa’anahora’a nō te fa’aorara’a », tei roto ’outou ’e ’o vau—te mau ta’ata ato’a—e hina’aro tātou i te fa’aorara’a ’e ’ua riro te fa’aorara’a ’ei tuha’a o te ’ōpuara’a nō teie orara’a. E hina’aro tātou i te tauturu ’e e’ita e ti’a ia tātou ’ia fa’aora ia tātou iho.
’Ua ’āfa’i mai rā te Atua ia tātou i te fenua nei ma te hō’ē fafaura’a mure ’ore ē e hōro’a mai ’oia i te hō’ē Fa’aora, ’o Iesu Mesia, ’o tē upo’oti’a i ni’a i te mau fifi e fa’ata’a ’ē nei ia tātou i te aro o te Atua.1 ’E ’ia rave ana’e tātou i te hō’ē fafaura’a ’e te Atua, e fafau mai ’oia e rave i te mau mea ato’a e ti’a iāna, ma te ’ore e ’ōpani i tō tātou ’aravihi ’ia mā’iti, nō te tauturu ia tātou ’ia tāpe’a i tā tātou mau fafaura’a mo’a iāna.2
Hōho’a tei hōhia mai e Tracy Y. Browning
E hina’aro vau ’ia ’ite ’ua māramarama ’oia
’Ua bāpetizohia vau i te 16ra’a o tō’u matahiti ’e tē ora ra vau i New York City. I te ha’amatara’a, e au ra iā’u tē rave rahi nei au i te taime nō te haere nā rotopū i tō’u fa’aro’o ’āpī, ’e tō te reira aura’a o te fafaura’a ’e te Atua, ’e tō’u mau aura’a ’e te mau hoa.
’Ua pe’ape’a vau ’aita tō’u e hoa i te fare ha’api’ira’a ’o tā’u e nehenehe e tū’ati atu. ’Ua mātau rā tō’u mau hoa i te rave i te mau mea tā’u i ’ite e mea ’ino nō tō’u vaerua ’e ’aita i māuruuru ’ia rave vau i ni’a iā’u i te i’oa o Iesu Mesia. ’Ua ’ite au ē, ’ua hina’aro Iesu Mesia ’ia rave au i te mau mā’itira’a maita’i a’e.
Te mea tā’u i ’ore i ’ite, ’oia ho’i, ’ua māramarama ānei te Fa’aora i te mana’o aro i roto iā’u. ’Ua riro mai te mau mahana ato’a e mea fifi atu ā ’a anihia ai iā’u ’ia rave i te mau mea tā’u i ’ite e ’ere i te mea maita’i. I te tahi taime ’ua fa’ariro vau i te reira e ’ere i te mea ’ino, ’ua ’ite rā vau ē, tē ha’afifi nei au i te mau mea ’aita e ti’a iā’u ’ia rave.
’Ua hina’aro vau ’ia ’ite ē ’ua māramarama te Fa’aora i tō’u mana’o nō te vai-’ōtahi-ra’a ’e te ta’ata hara ’a hina’aro ai au e ha’afaufa’a ’ore i te mau fa’aturera’a o te ’evanelia, ’ia nehenehe iā’u ’ia putapū i te hō’ē nino’a mana’o nō te rirora’a ’ei melo ’e tō’u mau hoa. E au ra iā’u tē paremo ra vau. ’Ua hina’aro vau ’ia fa’aorahia vau. ’Ua hina’aro vau ia Iesu Mesia.
I te taime ’a hōhonu ai tō’u aura’a ’e ’ōna
’Ua hōhonu atu ā tō’u aura’a ’e ’o Iesu Mesia i tō’u ’itera’a nā roto iā’u iho nō te aha vau e hina’aro ai iāna. I tō’u ha’amatara’a i te taui i te mana’o ē, ’ua rava’i noa te ’itera’a, e ti’a iā’u ’ia ora i te ’evanelia i te māramaramara’a nō te aha vau i hina’aro ai e ora i te ’evanelia ’e te anira’a i te tauturu nō te ravera’a i te reira. ’Ua tu’u noa vau i tō’u nā turi i raro ’e ’ua ’īriti au i tō’u ’ā’au i te Atua, ma te ti’aturi ē tē ha’ape’ape’a nei ’oia nō’u ’e tō’u fifi ē, ’ua fa’ata’ahia te fa’anahora’a nō te fa’aorara’a nō te tauturu iā’u, ē ’oia ho’i e tuha’a ato’a tō’u ’oa’oa nō te fa’anahora’a.
’Ua ha’api’i te peresideni Russell M. Nelson, « ’ia rave ana’e ’outou ’e ’o vau nei i te hō’ē fafaura’a ’e te Atua, e fātata roa atu ā tō tātou tā’amura’a ’e ’ōna hau atu i tei nā mua a’e i te fafaura’a […] Maoti tā tātou fafaura’a ’e te Atua, e ’ore roa ’oia e rohirohi i roto i tāna mau tauto’ora’a nō te tauturu ia tātou, ’e e’ita roa atu tātou e ha’apau i tōna fa’a’oroma’i aroha ia tātou ».3
’Ua paraparau vau i te Metua i te ao ra nō tō’u nino’a mana’o fa’ahapa, e nō te mea ’aita ho’i au i ’ite e aha te mea e rave nō te ha’apa’o i tā’u mau fa’aturera’a ’e tō’u mau hoa. ’Ua parau atu vau iāna ē ’aita vau e ’oa’oa nei ’e ’ua hina’aro mau vau e fa’a’ohipa i tāna tauturu.
Tei ni’a i tō’u nā turi ’āva’e tō’u ha’amatara’a i te ’ite i te hau. ’Ua tauturu teie nino’a mana’o iā’u ’ia hāro’aro’a ē ’ua ’ite te Fa’aora i te mea tā’u e putapū nei ’e tē ha’ape’ape’a nei ’oia—rahi mau, i teienei.
’A pa’ari noa ai au ’e ’ia hi’o vau i muri, ’ua ’ite a’era vau ē i te mau taime ato’a e haere mai au i te Atua ra nō te ani i te tauturu ’aore rā nō te fa’a’orera’a hara, e au ra iā’u ē ’ua ’āfa’ihia vau ma te mana’o i roto i te ō i Getesemane, i reira tō tātou Fa’aora i te rurutainara’a i te mamae ’e i te ha’amatara’a i te māuiui i roto i te tino ’e i te vārua nō te mau hape ’e te mau hara, ’o te fa’ata’a ’ē nei ia tātou i te Atua. E fa’aha’amana’ora’a te reira ē ’ua ta’a iāna i te mea tā’u e fa’aruru nei—hau atu i tā te tahi atu ta’ata e ’ore e nehenehe.
Ma te ha’eha’a, tō tātou Fa’aora, nā Jay Bryant Ward
’Aita rātou ana’e
I tō’u ti’ara’a mai, ’ua tauturu te Vārua iā’u ’ia hāro’aro’a i te tahi mau mea ’e ’ua fa’auru iā’u ’ia rave i te tahi atu mau mea. ’A tahi, ’ua ha’amana’o vau ē, hō’ē o tō’u mau hoa e ta’ata Mahometa ’oia ’e ’aita roa atu ’oia i anihia ’ia fa’ahape i tāna mau fa’aturera’a, nō te mea tē fa’atura nei mātou i tōna fa’aro’o ’e ’ua ta’a ia mātou ē e’ita ’oia e rave i te tahi mau mea. ’Ua fa’auruhia vau e fa’a’ite i tō’u fa’aro’o ’āpī i tō’u mau hoa ’ia ti’a ato’a ia rātou ’ia māramarama rahi atu nō ni’a iā’u, ’e nō te aha e mea faufa’a tā’u mau fa’aturera’a ’āpī nō’u.
’Ua ha’amata marū noa vau. ’Ua fa’ati’a vau i te hō’ē hoa i tō’u mau tāfifira’a. E ta’ata maita’i ’oia ’e te fa’atura. ’Ua tauturu mai ’oia iā’u ’a paraparau ai au i te tahi atu mau hoa tō’u. ’Aita te tā’āto’ara’a i māramarama, i te roara’a rā o te tau, ’ua ’ite au ē ’ua fa’anaho rātou i te mau ’ōpuara’a e nehenehe iā’u ’ia ’āmui atu ’o te ’ore e ’ōfati i tā’u mau fafaura’a i te Atua.
’Ua ’ite au ē, e nehenehe tātou pā’āto’a e fa’a’ohipa rahi atu ā i te pūai nō te pāto’i i te mana tāmau o te ao nei. E tauturu te ha’apa’ora’a i te mau fafaura’a i te reira, ’e ’o Iesu Mesia te pū o tā tātou mau fafaura’a.4 ’O te mea ïa tā’u iho i ’ite mai—nō te aha vau e hina’aro ai ia Iesu Mesia.
Te ho’ira’a mai i te Atua ra, e ’ere i te hō’ē mea ’o tā’u e nehenehe e rave nā roto noa iā’u iho. ’E tē vai nei e rave rahi ta’ahira’a na’ina’i i te mau mahana ato’a ’e te mau ’ohipa e tupu ’o tā’u—’e ’o tātou pā’āto’a—e rave i roto i teie tere nō te ho’ira’a. ’Auē ho’i ē, ’ua ha’amaita’ihia tātou ’ei feiā rave fafaura’a ’e ’ei feiā ha’apa’o i te fafaura’a ē, nō te mea « e’ita roa atu te Atua e rohirohi i roto i tāna mau tauto’ora’a nō te tauturu ia tātou » e tae roa e tāpae tātou i reira.