« Te ta’a-ē-ra’a pāpū tā te maita’i rahi o te Mesia e nehenehe e fa’atupu », Nō te pūai o te feiā ’āpī, Māti 2024.
Te pūai nō te upo’oti’a i ni’a i te hara
Te ta’a-’ē-ra’a pāpū tā te maita’i rahi o te Mesia e nehenehe e fa’atupu
’Ia māramarama ana’e tātou ē, e’ita te maita’i rahi o te Fa’aora e roa’a noa ’e tē vai noa ra te reira, e nehenehe te mau mea fa’ahiahia e tupu mai i roto i tō tātou orara’a.
Fa’ahōho’ara’a nā Jarom Vogeln
I tō’u tāvinira’a ’ei ’episekōpo, e mea fa’ahiahia mau ’ia hi’o i te māmāra’a tei putapūhia e te feiā ’āpī ’ia haee ana’e mai rātou e fārerei iā’u nō te fā’i i te hō’ē hara ’ei tuha’a nō tō rātou tātarahapara’a. Teie rā, ’aita te reira i tāpe’a iā’u ’ia hi’o mau i te hō’ē tupura’a tāmau : ’ua fā’i te feiā ’āpī, ’ua maita’i mai rātou, ’e i muri iho—noa atu tā rātou mau ’ōpuara’a maita’i roa a’e—e hape fa’ahou rātou. I muri iho e fā’i mai rātou, e maita’i mai rātou, ’e e hape fa’ahou rātou. I muri a’e e toru ’aore rā e maha taime nā roto i teie ’ohura’a, e mea pinepine rātou i te fa’aru’e.
’Ua māuruuru vau i te mea ē, ’ua ha’api’i mai teie mau feiā ’āpī ē Iesu Mesia, nā roto i tāna tāra’ehara, ’ua hōro’a mai ia rātou i te rāve’a nō te tātarahapa ’e nō te ha’amata fa’ahou. Terā rā, tē pe’ape’a nei au ē, ’aita paha tō rātou māramarama i nava’i maita’i nō ni’a i te tahi atu ha’amaita’ira’a tā te Fa’aora i pūpū mai : Tōna maita’i rahi—te mana fa’ati’a1, te tauturu hanahana, ’e « te hōro’ara’a i te pūai nā roto i te reira tātou e haere ai mai te feiā ha’avare ’e te tā’ōti’ahia tātou e riro nei i teie taime ’ei mau ta’ata fa’ateiteihia »,2
’Ua fa’aoti au i te ha’api’i māramarama atu ā, mai tā te peresideni Russell M. Nelson i ha’api’i ē, « te tātarahapa […] ’o te hō’ē ïa rāve’a »3 ’o te tītau pinepine i te taime ’e te tauto’ora’a tāmau.4 ’Ua hina’aro vau i te mau melo o tā’u pāroita ’ia ’ite ē, e fārerei te Atua ia tātou i te vāhi tei reira tātou ’e e pūpū mai ’oia i tōna maita’i rahi nō te tauturu ia tātou i te roara’a o te rāve’a o te ha’amaita’ira’a roa, noa atu te roara’a tā te reira e rave.
Nāheai i te hāro’aro’ara’a i te maita’i rahi i te tauturu ia ’outou
Tau matahiti i ma’iri a’e nei, ’ua fa’a’ite mai te hō’ē tuatāpapara’a tei ravehia i ni’a i nā 600 feiā ’āpī pa’ari nō te fare ha’api’ira’a tuatoru Brigham Young ē, te feiā tei ’ite maita’i ’e tei māramarama i te maita’i rahi, ’ua iti mai ïa tō rātou fāito hepohepo, tō rātou pe’ape’a, tō rātou ha’amā, ’e te ha’afaufa’a ’ore ia rātou iho.5 ’Ua fa’a’ite mai te hō’ē tuatāpapara’a hi’opo’ara’a tāmau ē, e nati te ti’aturira’a i te maita’i rahi i te mau fāito teitei a’e o te ’ā’au mehara, te ha’afaufa’ara’a iāna iho, te aura’a o te orara’a, te māuruuru nō te orara’a ’e te mana’o maita’i.6
E parauhia, e iti mai tō te ta’ata ha’amā ’e e rahi atu tō rātou ha’afaufa’a ia rātou iho ’ia māramarama ana’e rātou ē tē vai noa nei te maita’i rahi i’ōnei ’e i teie ihoā taime—’eiaha rā i muri a’e i te noa’ara’a ’aore rā i te fāna’ora’a i te reira. ’Ia ’ite ana’e tātou ē, e tauturu mai te Atua ia tātou noa atu te ’ohipa tā tātou i rave, ’aore rā, i te rahira’a taime ’a nino’a mana’o ai tātou ’ua fa’aru’e tātou iāna, e fa’auruhia tātou ’ia tāmau noa i te tāmata.7
« ’Ua fa’aru’e au i te Metua i te ao ra »
’Aita i maoro a’enei, ’ua pēpē te hō’ē misiōnare i roto i te hō’ē fa’a’oa’oara’a tū’aro nō te fa’aineinera’a ’e ’ua fa’aho’ihia ’oia i te fare nō te rapa’au iāna. E mau fā teitei tāna nō te fa’ari’ira’a i te tauturu pae tino ’o tāna e hina’aro ’e i muri iho e ho’i fa’ahou mai i roto i tāna misiōni. Teie rā, ’aita i maoro roa, ’ua fa’atupu ’oi’oi roa te taime ’ōti’ati’a ’ore i te mau peu tahito.
’Ua rave ’oia i te hara ’o tāna i mana’o ’ua tātarahapa ’oia ’e ’o tāna i vaiiho i muri iāna hou tāna misiōni. ’Ua tarapape ’oia ’e ’ua paruparu nō tōna ’erera’a i te ha’avīra’a iāna iho. Rahi noa atu tōna fa’aturumara’a, rahi noa ato’a atu tōna ’imira’a ’ia matara atu i teie mau peu ’ino. E ’ohura’a raro ’o te arata’i vave iāna i te hō’ē vāhi ’ē atu.
« Mai te huru rā iā’u, ’ua fa’aru’e au i te Metua i te ao ra », ’ua parau teie taure’are’a i tōna ta’ata fa’atere autahu’ara’a. « ’Ua tātarahapa vau nā vau na mua atu, ’e ’ua fa’a’ore mai te Atua i tā’u hapa. ’Ua fafau vau e ’ore roa vau e rave fa’ahou i te reira, ’e teie fa’ahou vau e au ra ē ’aita roa atu vau i tātarahapa a’enei nā mua a’e. ’Aita e ti’a iā’u e fāna’o i te fa’a’orera’a hara ’aore rā i te tauturu a te Atua. ’Eiaha i teienei ’Eiaha roa atu ».
Nā ’ō atu ra tōna ta’ata fa’atere autahu’ara’a, « ’aita ānei ’oe e ’oa’oa ’ia ’ite ē, e hōro’a te maita’i rahi ? ’Aita ’oe e tītauhia ’ia noa’a ’aore rā ’ia fāna’o i te reira. E ti’a noa ia ’oe ’ia mā’iti ’ia fa’ari’i i te reira ma te ineine i te tāmau noa i te tāmata ’e ’eiaha e fa’aru’e ».8 I muri iho, ’ua fa’a’ite atu te ta’ata fa’atere i teie mau parau a Elder Neil L. Andersen nō te pupu nō te Tino ’Ahuru ma Piti ’āpōsetolo : « E nehenehe tātou e he’e i te tahi taime, e ho’i ’oi’oi rā tātou ma te ha’eha’a i ni’a i tō tātou turi ’āvae nō te haere fa’ahou i ni’a i te ’ē’a ti’a ».9
Fa’ahou ā, ’ua fāriu atu te taure’are’a i ni’a i te ra’i, ’e tei reira te Fa’aora nō te tauturu iāna. E ’ere noa te pēpē o teie taure’are’a tei ora, tōna ato’a rā ’ā’au. Hō’ē fā iti i te taime hō’ē, ’e nā roto i te maita’i rahi tei fa’atupuhia e Iesu Mesia, ’ua ha’amata ’oia i te maita’i mai. ’Aita i maoro roa, ’ua ho’i fa’ahou atu ’oia i tāna misiōni ma te ’ī te ’ā’au mēhara, te ha’afaufa’a iāna iho, te aura’a, te māuruuru i roto i te orara’a, ’e te mana’o ’ana’anatae. ’O te ta’a-’ē-ra’a ïa tā te maita’i rahi o te Mesia e nehenehe e fa’atupu.