« Te tauturura’a ia vetahi ’ē ’ia haere mai i te Mesia ra ma te ’ōhie ’e te pūai », Nō te pūai o te feiā ’āpī, Māti 2024.
Te tauturura’a ’ia vetahi ’ē ’ia haere mai i te Mesia ra ma te ’ōhie ’e te pūai
Tē vai nei ia ’outou e rave rahi rāve’a nō te fa’a’ite i te here, nō te fa’a’ite i tō ’outou ti’aturira’a, ’e nō te ani manihini ia vetahi ’ē ’ia haere mai ia Iesu Mesia ra.
I te hō’ē mahana, i roto i tā’u matahiti mātāmua nō te ha’api’ira’a tuarua, ’ua ani mai tō’u hoa Nedra iā’u : « Russ, nō te aha ’aita ’oe e haere i te séminaire ? »
I te reira tau, ’aita tō’u nā metua e haere nei i te purera’a. E haere noa vau i te tahi taime nā muri i tō’u mau hoa, ’e ’aita vau i ’āmui atu i te séminaire. I te po’ipo’i a’e, ’ua haere atu vau i te séminaire i te hora 6 ’e te ’āfa. I muri iho i te reira, ’ua haere atu vau i te mau mahana ato’a—’oia ato’a i te mau po’ipo’i nō te tau to’eto’e ’e te hiona.
’Ua ha’aputapū te mau mea tā’u i ha’api’i mai i te séminaire i tō’u ’ā’au. ’Ua tupu tō’u ’itera’a pāpū i te rahi ’a ha’api’i rahi noa ai au nō ni’a ia Iesu Mesia ’e tāna ’evanelia tei fa’aho’i-fa’ahou-hia mai. ’Ua fa’aineine te reira iā’u ’ia tāvini i te hō’ē misiōni i Peretāne, ’e ’ia tāmau noa i te tā’āto’ara’a o tō’u orara’a ’ia tāvini i te Fatu ’e tāna ’evanelia i fa’aho’ihia mai.
Nā roto i te tītaura’a-manihini-ra’a a Nedra iā’u i te séminaire, i ’ite iho vau ē, e mau rāve’a rau nō ’outou nō te tauturu ia vetahi ’ē ’ia haere i te Fatu ra ia Iesu Mesia. Ma te mau rāve’a ’ōhie ’e te pūai rā, e nehenehe ’outou e fa’a’ite i tō ’outou here, e fa’a’ite i tō ’outou ti’aturira’a ’e e ani manihini i te feiā ’ati a’e, ’ia tāmatamata i te ’oa’oa ’e te hau ’o tā te Fa’aora ’e tāna ’evanelia e hōpoi mai.
’A haere mai e ha’amātau i te Fa’aora
Nō te tauturu mau ia vetahi ’ē ’ia haere mai i te Mesia ra, e mea ti’a ia ’outou nā mua roa ’ia ta’a maita’i ’o vai ’oia. E Tamaiti Iesu Mesia nā te Atua ’e ’o ’oia ana’e tē nehenehe e riro ’ei Fa’aora ’e ’ei Tāra’ehara nō te ao nei.
’O ’ōna ana’e tē nehenehe e ora i te hō’ē orara’a maita’i roa, e ’aufau nō tā ’outou mau hara, e mamae i tō ’outou « mau māuiui ’e te mau ’ati ’e te mau huru fa’ahemara’a ato’a » (Alama 7:11), ’e i muri iho ’ua hōro’a mai i tōna ora ’e ’ua rave fa’ahou atu i te reira. Maoti Iesu Mesia, e ti’afa’ahou mai te mau tamari’i ato’a a te Atua ’e e nehenehe rātou e fāri’i i tāna mau ha’amaita’ira’a mo’a roa a’e ’e te hanahana roa a’e.
’Ia māramarama ana’e ’outou ’o vai te Fa’aora—’e e aha tō ’outou hōpe’ara’a mure ’ore maoti ’oia—e hina’aro ’outou e ora i tō ’outou orara’a mai te au i tōna hina’aro. ’E e mea pāpū e au roa ’oia i te reira ’ia poro ana’e ’outou i tāna ’evanelia, nā roto i te parau ’e te ’ohipa, i te feiā tā ’outou e ’ohipa ’āmui nei i te mau mahana ato’a.
Toro i te rima ma te here
’A tāmau noa ai ’outou i te ha’api’i mai i te mātau ’e i te here i te Fa’aora, e hina’aro roa ’outou e pe’e piri roa iāna ’e i tāna mau ha’api’ira’a, ’oia ato’a tāna fa’auera’a « e aroha ’outou ia ’outou iho » (Ioane 13:34).
I tō Amona haerera’a atu i te mau ’āti Lamana ra nō te poro i te ’evanelia, ’ua pūpū atu ’oia iāna ’ei tāvini nō te ari’i Lamoni. ’Ua fa’a’ite Amona i te here mau ’e te itoito mau ’a pāruru ai ’oia i te mau māmoe a te ari’i. ’Ua tāmarū te mau ’ohipa a Amona i te ’ā’au o te ari’i Lamoni. I te ha’api’ira’a Amona i te ’evanelia, ’ua upo’oti’a te Vārua i ni’a i te ari’i Lamoni ’e ’ua fa’afāriuhia ’oia (hi’o Alama 17–19).
Te aura’a te rirora’a ’ei pipi mau nā Iesu Mesia ’o te herera’a ïa i tō ’outou ta’ata tupu mai ia ’outou iho (hi’o Mataio 22:36–40). Mai te peu e nehenehe rātou e ’ite ē, ’ua here ’outou ia rātou ’e e ha’apa’o ’outou ia rātou, mea pāpū e ineine roa ïa rātou ’ia fa’a’ite mai ’outou i te mea tā ’outou i ’ite e parau mau.
’A ’ite mai i te itoito nō te fa’a’ite
Nā roto i te peropheta Iosepha Semita, ’ua fa’aho’i fa’ahou mai te Fa’aora i te autahu’ara’a i ni’a i te fenua nei, ’e te mau ’ōro’a ato’a ’e te mau fafaura’a e tītauhia nō tō tātou haerera’a i mua mure ’ore. I te taime iho ā ’a putapū ai tō ’outou ’ā’au i te poro’i hanahana o te Fa’aho’i-fa’ahou-ra’a mai, e hina’aro roa ’outou e tuō i te reira i ni’a i te mau tāpo’i fare ! E ti’a ia ’outou ’ia fa’aō atu ma te ’ana’anatae nō te fa’a’ite i te ’itera’a tao’a rahi o te ’evanelia tei fa’aho’ihia mai i te mau ta’ata ato’a. Mea au roa nā’u e rave i te reira !
E fa’ataiā vetahi ē, e’ita te tahi mau ta’ata e ’ana’anatae mai ’aore rā e pāto’i mai i te mea tā rātou e fa’a’ite atu. ’Oia ïa, e nehenehe te reira e tupu mai. I muri a’e i tō Abisa horora’a mai te hō’ē fare i te tahi atu fare nō te parau i te ta’ata ē, ’ua tae mai te mana o te Atua i ni’a i te ari’i Lamoni ’e tōna ’utuāfare, ’ua ti’aturi vetahi, e rave rahi rā tei mā’iti ’eiaha e fa’aro’o atu (hi’o Alama 19:17–31).
E fāri’i ānei rātou i te reira ’aore rā ’aita, te tao’a rahi roa a’e ’o tā ’outou e nehenehe e pūpū atu i te hō’ē hoa ’aore rā i te hō’ē melo o te ’utuāfare—’aore rā e ’oia ato’a i te hō’ē ’enemi—’o te ’evanelia ïa a Iesu Mesia. ’A pure nō te roa’a te itoito, ’e mai te mea e tano, ’a fa’a’ite atu i te mea tā ’outou i ’ite e parau mau.
’A fa’atae atu i te hō’ē anira’a manihini ’ā’au tae mau
’A tāvini ai au ’ei peresideni misiōni nō Toronto Canada, ’ua tauturu vau e rave rahi o tā’u mau misiōnare ’ia ha’api’i atu i te hō’ē ta’ata fatu taiete rahi. I muri a’e i tā mātou ha’api’ira’a, ’ua ani manihini au iāna ’ia pure ’e ’ia ani i te Metua i te ao ra e parau mau ānei tā mātou poro’i.
« ’Aita vau i ’ite i te pure », ’ua parau ’oia.
’Ua parau atu vau iāna ē te mea noa ’o tāna e rave ’o te tūturira’a ïa ’e te ani-noa-ra’a i te Metua i te ao ra ’ia ha’apāpū mai iāna i te parau mau.
« E nehenehe ’oe e nā reira ! » ’Ua fa’aitoito vau iāna.
’Ua tūturi ’āmui mātou ’e ’ua ha’amata te ta’ata i tāna pure. I te fa’aotira’a ’oia, ’ua parau ’oia : « E aha te mea e tupu ra ? ’Aita roa na vau i fāri’i i te hō’ē ’ohipa mai teie te huru ».
« Mai teie te huru ’ia pāhono mai te Metua i te ao ra i te mau pure », ’ua parau vau. « ’Ua ani ’oe, ’e ’ua pāhono mai ’oia ».
’Ua ha’api’i noa vau i te mau misiōnare ’e i te mau melo nā te ao nei ē, e ha’amata te fa’afāriura’a nā roto i te mea tā te ta’ata e putapū. ’Ia ani manihini ana’e ’outou ia vetahi ’ē ’ia fa’aro’o i te ’evanelia, ’a ani manihini ato’a ia rātou ’ia pure ’e ’ia ani ’ia putapū te parau mau i roto i tō rātou ’ā’au. Mai te mea e ani rātou i te Atua (hi’o Iakobo 1:5) ma te ’ā’au hina’aro mau, ma te mana’o pāpū ’e te fa’aro’o i te Mesia, e nehenehe rātou e fāri’i i te ha’apāpūra’a nō te parau mau nā roto i te mana o te Vārua Maita’i (hi’o Moroni 10:4–5). E mea fa’ahiahia roa ’e te ’oa’oa i te tauturura’a ia vetahi ’ē ’ia ’ite mai i te parau mau nō rātou iho.
’A ha’amana’o ē, e mea faufa’a rahi te mau vairua ato’a
’Aita roa ’outou i ’ite e aha te mea e tupu ’ia tauturu ana’e ’outou ia vetahi ’ē ’ia haere mai i te Mesia ra ma te herera’a, te fa’a’itera’a, ’e te ani-manihini-ra’a. ’A hi’o na te mau ’āti Lamana, e au ra e nūna’a ta’ata e’ita roa paha e fāri’i i te ’evanelia, nō tō rātou fa’afāriu-roa-ra’a-hia ē, « ’aita roa atu ra rātou i tāiva » (Alama 23:6–7).
’Eiaha roa ’outou e tīa’i i teie huru hōpe’ara’a i te mau taime ato’a e fa’a’ite ai ’outou i te ’evanelia. Terā rā, ma te rāve’a ’ōhie ’e te pūai, e nehenehe ’outou e fa’a’ite pāpū i te parau mau ’e e tauturu atu ’ia fa’a’ite atu i te ’evanelia tei fa’aho’ihia mai i e rave rahi atu ā mau tamari’i a te Metua i te ao ra.
’Ia ’ite mau ana’e ’outou e mea faufa’a rahi te mau tamari’i tāta’itahi a te Metua i te ao ra nōna, e hina’aro ’outou e rave i te mau mea ato’a tā ’outou e nehenehe nō te tauturu ia vetahi ’ē ’ia haere mai i te Mesia ra, ’e ’ia tomo atu i roto i te māramarama o tāna ’evanelia ’e i ni’a i te ’ē’a o te tāhuti ’ore ’e te ora mure ’ore.
E aha te ’ohipa rahi a’e tā ’outou e nehenehe e ora i roto i te orara’a ?