Sauniga o le Aoauli o le Aso Sa
Olioli i le Meaalofa o Ki o le Perisitua
O Nai Vaega
A aunoa ma ki o le perisitua, e leai ma se tasi o tatou e mafai ona mauaina sauniga ma feagaiga taua ia e fusia ai i tatou e faavavau i ē pele ia i tatou ma faatagaina ai i tatou i le i’uga e mau ma le Atua. …
Ua tuu mai e ki o le perisitua ia i tatou le pule e tuu atu ai faamanuiaga uma na folafola atu ia Aperaamo i alii ma tamaitai uma e tausi-feagaiga. Ua faia e galuega o malumalu nei faamanuiaga matagofie ia avanoa i fanau uma a le Atua, e tusa lava po o fea po o anafea na latou soifua ai po o fea foi o latou soifua ai nei. …
O ki o le perisitua na toefuatai e ala mai i le Perofeta o Iosefa Samita ua mafai ai mo alii ma tamaitai tausi-feagaiga uma ona olioli i faamanuiaga maoae ma patino faaleagaga.
O’u uso e ma tuafafine pele, o la’u folafolaga lenei. E leai se isi mea o le a sili atu ona fesoasoani ia te oe e pipiimau ai i le ai uamea nai lo le tapuai e le aunoa i le malumalu e pei ona faatagaina ai e ou tulaga. E leai se mea e sili atu ona puipuia oe a o e fetaia’i ma puao pogisa o le lalolagi. E leai se mea e faamausali ai lau molimau i le Alii o Iesu Keriso ma Lana Togiola pe fesoasoani e te malamalama atili ai i le fuafuaga ofoofogia a le Atua. E leai se mea o le a sili atu ona faamāfanafanaina ai lou agaga i taimi o tiga. E leai se isi mea o le a siliatu ona tatalaina le lagi. E leai se mea!
O le malumalu o le faitotoa lea i faamanuiaga silisili ua teuina e le Atua mo i tatou taitoatasi, aua o le malumalu ua na o le pau lea o le nofoaga i le lalolagi e mafai ona tatou maua ai faamanuiaga uma na folafola atu ia Aperaamo. …
Ia tatou olioli i le toefuataiga o ki o le perisitua, lea ua mafai ai e oe ma a’u ona olioli i faamanuiaga uma faaleagaga ua tatou loto ma agavaa e maua.