Sauniga o le Taeao o le Aso Toonai
O Le A Lelei Mea Uma Ona o Feagaiga o le Malumalu
O Nai Vaega
Uso e ma tuafafine, ou te molimau atu ma le lotomaualalo pe a tatou auai i le malumalu, e mafai ona faamanatu mai ia i tatou le natura e faavavau o o tatou agaga, lo tatou sootaga ma le Tama ma Lona Alo paia, ma lo tatou faanaunauga silisili ia toe foi atu i lo tatou aiga faalelagi. …
I lalo o le taitaiga musuia a Peresitene Nelson, ua faatelevave ai e le Alii ma o le a faaauau pea ona faatelevaveina le fausiaina o malumalu i le lalolagi atoa. O lenei mea o le a maua ai e fanau uma a le Atua le avanoa e maua ai sauniga o le faaolataga ma le faaeaga ma ia osia ma tausia ai feagaiga paia. …
O le auai soo i sauniga o le malumalu e mafai ona fatua’i ai se mamanu o le tuuto i le Alii. A e tausia au feagaiga o le malumalu ma manatuaina, ua e valaauliaina le mafutaga a le Agaga Paia e faamalosia ma faamamaina oe. …
E ala i feagaiga o faamauga i totonu o malumalu e mafai ai ona tatou mauaina le faamautinoaga o sootaga alofa faaleaiga lea o le a faaauau pea pe a mavae le oti ma tumau ai mo le faavavau. O le faamamaluina o feagaiga o faaipoipoga ma aiga e osia i totonu o malumalu o le Atua, o le a maua ai le puipuiga mai le leaga o le manatu faapito ma le faamaualuga.
O tofotofoga, luitau, ma lototiga o le a mautinoa lava e oo mai ia i tatou uma. E leai se tasi o i tatou e puipuia mai “mea matuitui o le tino” [tagai i le 2 Korinito 12:7–10]. Ae, pe a tatou auai i le malumalu ma manatua a tatou feagaiga, e mafai ona tatou saunia e maua se taitaiga patino mai le Alii.
O’u uso e ma tuafafine, ou te molimau atu e leai se isi mea e taua atu nai lo le faamamaluina o feagaiga ua outou osia pe o le a osia i totonu o le malumalu.