Sauniga o le Afiafi o le Aso Sa
O Le Faafesoota’ia o Poloaiga Sili e Lua
O Nai Vaega
Sei o tatou iloiloina poloaiga sili ta’itasi e lua, na faaalia ma faamatala atu i le tali a Iesu Keriso. A o tatou faia lena mea, ia vaai faalemafaufau i le ata o le alalaupapa faatautau maoae.
O le muamua, ia alofa i le Alii ma lou loto atoa, agaga, ma le mafaufau atoa.
… Ia alofa i le Atua e mua’i faatotonugalemu i lou loto—lou lava natura. Na poloai mai le Alii ia e alofa atu ma lou agaga atoa—o lou tagata faapaiaina atoa—ma le mea mulimuli, ia alofa atu ma lou mafaufau atoa—lou faautautaga ma le atamai. …
… E mafai ona ou alofa i le Tama Faalelagi ma Iesu Keriso, lea e ta’ita’i atu ai i le tatalo, suesue i tusitusiga paia, ma tapuai i le malumalu. Tatou te alolofa i le Tama ma le Alo e ala i le totogiina o sefuluai, tausia ia paia le aso Sapati, ola i se olaga amiolelei ma le mama, ma ia usiusitai. …
O le alofa i le Alii e ta’ita’i atu ai i le fiafia e faavavau!
… E le atoa le alofa i le Alii pe afai tatou te le amanaia o tatou tuaoi. O lea alofa i le lalolagi e aofia ai fanau uma a le Atua e aunoa ma le manatu i le itupa, faavasegaga faaagafesootai, lanu, tulaga feusuai, tupe maua, matua, po o le tagatanuu. …
… Mo soo se alalaupapa faatautau ia faia le mea na fausia ai e fai, e tatau ona galulue faatasi ona ‘olo i le maopoopoga a’ia’i. E faapena foi, o lo tatou tomai e mulimuli ia Iesu Keriso e faalagolago i lo tatou malolosi ma le mana e ola i poloaiga muamua ma le lona lua, ma le tuuto paleni tutusa i ia poloaiga uma. …
… Talosia ia siitia a’e i luga o tatou loto ma mafaufau ia alolofa i le Alii, ma liliu i fafo atu, ia alolofa i o tatou tuaoi.