Sauniga o le Taeao o le Aso Toonai
Mautinoa i Feagaiga e ala ia Iesu Keriso
O Nai Vaega
Uso ma tuafafine pele o i latou ua maua le mautinoa moni i feagaiga na osia i le maota o le Alii e ala mai ia Iesu Keriso, ua umia se tasi o malosiaga e sili ona mamana e mafai ona tatou maua i lenei olaga.
E faapefea ona tatou maua sea mautinoa e ala ia Iesu Keriso? E oo mai e ala i le lotomaualalo, faaogatotonuina o o tatou olaga i le Faaola, ola i mataupu faavae o le talalelei a Iesu Keriso, mauaina o sauniga o le faaolataga ma le faaeaga, ma le faamamaluina o feagaiga tatou te osia ma le Atua i Lona maota paia. …
… Ou te iloa a vaaia e le Alii sina aloiafi o le manao po o se taumafaiga amiotonu i lo tatou naunau e faaogatotonu o tatou olaga ia te Ia, ma i sauniga ma feagaiga tatou te osia i Lona maota, o le a Ia faamanuia i tatou, i Lana ala atoatoa, i vavega ma mutimuti alofa tatou te manaomia.
O le maota o le Alii o le nofoaga lea e mafai ona tatou liuaina ai i auala maualuluga ma paia atu. … Ou te tautino atu o le i ai o le agaga o le maota o le Alii i totonu o i tatou e sui atoa ai i tatou. …
O le faifai pea ma le faatelevaveina o le fausiga o malumalu, o le a faaauau ona tatou olioli, musuia, ma manuia ai. Ae e sili atu ona taua, a o sui a tatou sauniuniga e ulu atu ai i le malumalu, o le a sui o tatou aafiaga i le malumalu, lea o le a suia ai o tatou olaga i fafo o le malumalu. Talosia ia faatumulia e lenei suiga i tatou i le mautinoa i a tatou feagaiga paia na osia ma le Atua e ala ia Iesu Keriso.