Sauniga o le Afiafi o le Aso Sa
O Malumalu, Maota o le Alii ua Togitogia Ai le Lalolagi
O Nai Vaega
Ua e tomanatu ea i le mafuaaga ua faatonuina ai e le Alii Lana perofeta ia togitogia i le taimi nei le lalolagi i Ona malumalu paia? …
… O se tasi o mafuaaga ona i le lotolotoi o fesouaiga ma faaosoosoga o le lalolagi, ua Ia folafola mai e faamalosia ma faamanuiaina Lana Au Paia o le feagaiga, ma o loo faataunuuina Ana folafolaga! …
I totonu o Lona maota, e faaeeina moni ai lava i tatou i le mana faalelagi. O lo tatou faatuatua ia Iesu Keriso ma lo tatou alolofa mo Ia ua faamautuina ma faamalosia. Tatou te aoao e alolofa atili ia te Ia. E faamautu ai faaleagaga lo tatou faasinomaga moni ma faamoemoega o le olaga. A tatou faamaoni, e faamanuiaina i tatou i le puipuiga mai faaosoosoga ma mea faalavefau. Tatou te lagona le alofa o le Faaola a o Ia siitia i tatou mai o tatou faigata ma faanoanoaga. E faaauupegaina i tatou i le mana o le Atua. …
A’u uo pele, afai tatou te mafai ae e le’i faateleina lava lo tatou auai atu i le malumalu, inā tatou faateleina ia e le aunoa se taimi e tapuai ai i le maota o le Alii. …
O le malumalu o le maota moni lava o le Alii. Ou te folafola atu ia te outou, a outou o mai ma le agavaa ma le lototatalo i Lona maota paia, o le a faaauupegaina outou i Lona mana, o le a i ai i o outou luga Lona suafa, o le a i ai foi i o outou luga le tausiga a agelu, ma o le a outou tuputupu a’e i faamanuiaga a le Agaga Paia. …
I nei aso o le fenumia’i ma le vāvāō, ou te molimau atu o le malumalu o Lona maota ma o le a fesoasoani e faasaoina i tatou, puipui i tatou, ma saunia i tatou mo le aso mamalu lea, faatasi ai ma Ana agelu paia uma, e toe afio mai ai lo tatou Faaola i le mamalu, mana ma le olioli tele.