Sauniga o le Aoauli o le Aso Toonai
I Le Lagolagoina o le Tupulaga Faia’e
O Nai Vaega
O le a faamanuiaina ma faamalosia le uarota atoa pe a taulai tagata o le au paia i le tupulaga faia’e. …
O le a aoaoina e le autalavou le mamanu o faaaliga a o latou auai faatasi ma i tatou i le faagasologa o le sailia ma le faatinoina o uunaiga e auauna atu ai i isi. A o liliu atu le autalavou i le Alii mo lenei taitaiga musuia, o le a faalolotoina o latou sootaga ma Ia ma faatuatuaina atili o Ia.
Tatou te faaali atu lo tatou talitonuga mautinoa i le autalavou e ala i le ofoina atu o le lagolago ma le taitaiga, e aunoa ma lo tatou pulepuletutu. A o tatou la’a i tua ae faataga le autalavou e aoao e ala i le fefautuaai faatasi, filifili se ala musuia, ma faatino la latou fuafuaga, o le a latou lagonaina le olioli moni ma le tuputupu a’e. …
E faaofo i tatou e o tatou talavou i lo latou lotototoa, lo latou faatuatua, ma o latou tomai. A o latou filifili ia avea o ni soo gaua’i atoatoa o Iesu Keriso, o le a tamau Lana talalelei i o latou loto. O le mulimuli ia te Ia o le a avea o se vaega o o latou tagata, ae le na o mea latou te fai. …
O talavou i aso nei o ni isi o agaga e aupito sili ona malualii. O i latou o nisi o leoleo maua’i o le upumoni ma le faitalia i le muai olaga. Na fananau mai i latou i nei aso e faapotopoto Isaraelu e ala i la latou molimau mamana i le Alii o Iesu Keriso. Na te silafia i latou taitoatasi ma silafia lo latou gafatia tele. E onosai o Ia a o latou tuputupu a’e. O le a Ia togiola ma puipuia i latou. O le a Ia faamaloloina ma taiala i latou.