Sauniga o le Taeao o le Aso Toonai
Ia Outou Oofu i le Alii o Iesu Keriso
O Nai Vaega
E finagalo lo tatou Tama i se sootaga e loloto atu ma Ona atalii ma afafine uma, ae o la tatou filifiliga lea. A o tatou filifili e faalatalata atili ia te Ia e ala i se sootaga i le feagaiga e faataga ai o Ia e faalatalata atili mai ia i tatou ma faamanuiaina atili ai i tatou.
… Ua i ai Iesu Keriso i le totonugalemu o feagaiga uma tatou te osia, ma ua mafai ona maua faamanuiaga o feagaiga ona o Lana taulaga togiola.
O le papatisoga e ala i le faatofu o le faitotoa faafaatusa lea tatou te ulu atu ai i se sootaga faalefeagaiga ma le Atua. O le faatofuina i le vai ma toe alu a’e i luga o se faatusa o le maliu ma le Toetu mai o le Faaola i se ola fou. … I le Feagaiga Fou tatou te faitau ai, “Aua o outou uma lava ua papatisoina ia Keriso, ua outou oofu ia Keriso” [Kalatia 3:27]. …
O le sauniga o le faamanatuga e faasino foi i le Faaola. O le areto ma le vai o faatusa o le tino ma le toto o Keriso na faamaligiina mo i tatou. … A o tatou faia le faatinoga o le aai ma feinu i faatusa o Lona tino ma le toto, e avea faafaatusa Keriso o se vaega o i tatou [tagai i le Ioane 6:56]. …
A o tatou osia feagaiga ma le Atua i le maota o le Alii, e atili ai ona faalolotoina la tatou sootaga ma Ia. O mea uma tatou te faia i le malumalu e faasino atu i le fuafuaga a lo tatou Tama mo i tatou, a o le totonugalemu o le Faaola ma Lana taulaga togiola. …
… O lo tatou ofusa ua faamanatu mai ai ia i tatou faapea, o le Faaola ma faamanuiaga o Lana Togiola ua ufia’i i tatou i o tatou olaga atoa. A o tatou ofuina le ofusa o le perisitua paia i aso taitasi, e avea lena faatusa matagofie o so tatou vaega. …
… Ou te molimau atu e matuai aoga le tau o faamanuiaga silisili o lena sootaga i le feagaiga.