Sauniga o le Taeao o le Aso Toonai
O Uunaiga o se Afi Lilo
O Nai Vaega
Uso e ma tuafafine, ou te molimau atu e faafofogaina e le Atua tatalo uma tatou te tuuina atu ma tali taitasi mai ai e tusa ma le ala ua Ia otooto mai mo lo tatou atoatoa. … E mo mafuaaga ua na o le Atua Na te silafiaina pe aisea e ese ai le taliina o tatalo nai lo tatou faamoemoe—ae ou te folafola atu ia te outou ua faafofogaina, ma ua taliina e tusa ai ma Lona alofa e le mavae ma le taimi ua Ia faatulagaina.
Afai “e le sese ona [tatou] ole atu” [2 Nifae 4:35], e leai ni tapulaa i le taimi, o fea, ma po o a mea e tatau ona tatou tatalo ai. …
… E tatau ona tatou tatalo taitoatasi, i o tatou aiga, ma i faapotopotoga tusa pe o le a le tele. E ao ona tatou faaaogaina le tatalo e fai ma talipupuni e tetee atu ai i faaosoosoga,ma afai e i ai se taimi tatou te lagona ai le lē fia tatalo, e mafai ona tatou mautinoa o le faatuutuu e lē sau mai le Atua, o lē e naunau e fesootai ma Ana fanau i soo se taimi ma taimi uma. … Pe a tatou lē iloa pe faapefea, ae po o le a tonu foi le mea e tatalo ai, e tatau ona tatou amata, ma faaauau pea, seia oo ina taitaiina i tatou e le Agaga Paia i le tatalo e tatau ona tatou ofoina atu. …
I le iuga, e mafai ona tatou vaai atu i le faataitaiga a le Faaola, o lē sa tatalo soo, i le tele o taimi. …
I lena vaaiga o le manumalo o Keriso i le oti atoa ai ma Lana meaalofa talu ai nei ia te a’u o le toe faaopoopo ai o ni nai vaiaso, po o ni masina i le olaga faitino, ou te molimau atu ai ma le faamaoni i le moni o le ola e faavavau ma le manaomia ona tatou manatu mamafa i a tatou fuafuaga mo lena mea.