Sauniga o le Taeao o le Aso Sa
O Le Taamilosaga Mamana, Mamalu o le Aoaoga Faavae a Keriso
O Nai Vaega
E tupu le malosiaga faaleagaga i le “olaga atoa a o tatou taliaina pea lava pea le aoaoga faavae a Keriso.” O le faia o lena mea, na aoao mai ai Peresitene Russell M. Nelson, e maua ai se “taamilosaga malosi o le amio mama” [Faatoilalo le Lalolagi ma Maua le Malologa,” Liahona, Nov. 2022, 97]. E moni, o elemene o le aoaoga faavae a Keriso—e pei o le faatuatua i le Alii o Iesu Keriso, salamo, ulu atu i se sootaga i le feagaiga ma le Alii e ala i le papatisoga, mauaina o le meaalofa o le Agaga Paia, ma le tumau e oo i le iuga—e le o faamoemoe faapea o ni mea e tutupu e faasao pe a uma, i le na ona faatasi ona tatou mauaina. …
E manaomia ona fafagaina i aso taitasi lo tatou faatuatua ia Iesu Keriso. E fafagaina a o tatou tatalo i aso taitasi, suesue tusitusiga paia i aso taitasi, manatunatu i le agalelei o le Atua i aso taitasi, salamo i aso taitasi, ma mulimuli i uunaiga a le Agaga Paia i aso taitasi. …
… E faapena foi ona fausia ai le malosiaga a o tatou tauivi e usita’i i tulafono a le Atua ma salamo. …
O le isi elemene o le aoaoga faavae a Keriso o le papatisoga, lea e aofia ai le papatisoga i le vai ma, e ala i le faamauga, e oo mai ai le papatisoga a le Agaga Paia. E ui o le papatisoga o se mea e tutasi, ae tatou te faafouina pea lava pea a tatou feagaiga faalepapatisoga pe a tatou aai ma feinu i le faamanatuga. …
A o uuna’ia e le Agaga Paia se tosinaga sili atu i o tatou olaga, tatou te atia’e ma fausia pea faasolosolo uiga paia faaKeriso. … Ona mafai ai lea ona tatou maua le mana faalelagi o loo moomia e tumau ai e oo i le iuga. …
Ou te valaaulia outou ia saga ola pea i le aoaoga faavae a Keriso, fausia pea ma fesoasoani i isi i le ala.