Sauniga o le Taeao o le Aso Sa
O Le Faamoemoe o le Atua ia Aumai Oe i le Aiga
O Nai Vaega
Alu i le Aiga, saunia e Yongsung Kim
O mea uma e faatatau i le fuafuaga a le Tama mo Lana fanau pele ua mamanuina e aumai ai tagata uma i le aiga. …
O lona uiga la e alu lava soo se mea i le auala tatou te ola ai i o tatou olaga? … Leai, e leai lava. … E taua ma atoatoa i Ana aoaoga uma le ola i se tulaga maualuga atu o amioga mama, o se valaau mo le alualu i luma faaletagata lava ia, mo se faatuatua ia liua ai ia Keriso, mo se suiga tele o le loto. …
Afai tatou te talitonu o le faamoemoega o le fuafuaga alualu mamao a le Tama o le laveai o i tatou, togiola i tatou, tuuina mai o le alofa mutimutivale ia i tatou, ma faapea ai ona aumaia le fiafia ia i tatou, o le a la le faamoemoega o le Alo lea e ala mai ai ia te Ia le faataunuuga o lenei fuafuaga maoae? …
O le finagalo o Iesu o le finagalo agalelei lea o le Tama! E finagalo o Ia ia mafai e tagata uma lava, o fanau uma a Lona Tama ona maua le sini tupito o le fuafuaga—o le ola e faavavau faatasi ma i La’ua. E leai se tasi e tuuesea mai lenei gafatia faalelagi. …
O loo femaliua’i le Faaola, le Leoleo Mamoe Lelei, i le sailiga o Ana mamoe leiloloa se’ia oo ina Ia maua i latou. …
Leai, Na te le tuuina i luga ni poloka auala ma ni papupuni; o Ia na te aveesea. Na te le taofia oe i fafo; O Ia Na te faafeiloai ia te oe i totonu. …
O le tala fiafia lea! Ou te matuai faafetai lava mo nei upumoni faigofie. O le mamanu a le Tama, o Lana fuafuaga, o Lona faamoemoega, o Lona naunautaiga, o Lona moomooga, ma Lona faamoemoe, o mea uma ia ina ia faamalolo ai oe, o mea uma ia e te maua ai le filemu, o mea uma ia e toe aumaia oe, ma i latou e te alofa i ai, i le aiga.