Sauniga o le Afiafi o le Aso Toonai
“Ia Filemu ma Iloa o A’u o le Atua”
O Nai Vaega
O taimi uma tatou te maua ai, iloilo, manatua, ma faafou feagaiga paia, e saga faamautu atili ai ma le mausali o tatou taula faaleagaga i le “papa” o Iesu Keriso.
… A o fausia le faavae o o tatou olaga i luga o le Faaola, ua faamanuiaina i tatou “ia filemu”—e i ai se faamautinoaga faaleagaga o le Atua o lo tatou Tama Faalelagi, o i tatou o Ana fanau, ma o Iesu Keriso o lo tatou Faaola. …
… Mo se faataitaiga, o le Sapati o le aso o le Atua, o se taimi paia ua vaetofia e manatua ai ma tapuai i le Tama i le suafa o Lona Alo, e auai e faatino sauniga o le perisitua, ma maua ma faafou feagaiga paia. …
… O “fale o le tatalo” lea tatou te faapotopoto ai i le Sapati o maota tapuai ma isi fale ua faamaonia—o nofoaga paia o le migao, tapuaiga, ma le aoaoina. …
O le malumalu o le isi nofoaga paia ua vaetofia patino mo tapuaiga ma auaunaga i le Atua ma aoao ai i upumoni faavavau. …
… O o tatou fale e ao ona avea ma su’ifefiloi taualuga o taimi paia ma nofoaga paia ia e mafai ai e tagata taitasi ma aiga ona “filemu” ma iloa o le Atua o lo tatou Tama Faalelagi, o i tatou o Ana fanau, ma o Iesu Keriso o lo tatou Faaola. …
Ou te folafola atu a tatou fausia le faavae o o tatou olaga i luga o le “papa” o Iesu Keriso, e mafai ona faamanuiaina i tatou e le Agaga Paia ia maua se filemu taitasi ma faaleagaga o le agaga lea e mafai ai ona tatou iloa ma manatua o le Atua o lo tatou Tama Faalelagi, o i tatou o Ana fanau, o Iesu Keriso o lo tatou Faaola, ma e mafai ona faamanuiaina i tatou e fai ma faatoilalo mea faigata.