Tuha’a purera’a nō te avatea sābati
’A ’oa’oa i te hōro’a o te mau tāviri o te autahu’ara’a
Hu’a parau
’Aita ana’e te mau tāviri o te autahu’ara’a, ’aore roa te hō’ē o tātou e fāri’i i te mau ’ōro’a ’e te mau fafaura’a ’o tē tā’amu ia tātou i tei herehia e tātou e a muri noa atu ’e ’ia fa’ati’a ia tātou ’ia ora i te pae hope’a i pīha’i iho i te Atua […]
E hōro’a mai te mau tāviri o te autahu’ara’a ia tātou i te mana nō te fa’atae i te mau ha’amaita’ira’a i fafauhia ’ia Aberahama i te mau tāne ’e te mau vahine ato’a e ha’apa’o i te fafaura’a. Nā roto i te ’ohipa hiero e ti’a ai i te mau tamari’i ato’a a te Atua ’ia fāri’i i teie mau ha’amaita’ira’a faufa’a, noa atu te vāhi ’aore rā te taime i orahia ’aore rā e orahia nei e rātou […]
E hōro’a te mau tāviri o te autahu’ara’a tei fa’aho’ihia mai nā roto i te peropheta Iosepha Semita i te ti’ara’a i te mau tāne ’e te mau vahine ato’a e ha’apa’o i te fafaura’a ’ia ’oa’oa i te mau ha’amaita’ira’a pae vārua fa’ahiahia nō te ta’ata iho […]
E au mau taea’e, e au mau tuahine here, teie tā’u parau fafau. ’Aita hō’ē mea e tauturu hau atu ia ’outou ’ia tāpe’a pāpū i ni’a i te ’āuri maori rā te ha’amori-tāmau-ra’a i roto i te hiero ’ia au i te huru o tō ’outou orara’a. ’Aita hō’ē mea e pāruru hau atu ia ’outou ’ia fārerei ana’e ’outou i te mau māhu pōiri o te ao nei. ’Aita hō’ē mea e ha’apūai hau atu i tō ’outou ’itera’a pāpū nō ni’a i te Fatu Iesu Mesia ’e tāna tāra’ehara ’aore rā, e tauturu ia ’outou ’ia hāro’aro’a hau atu i te fa’anahonahora’a nehenehe a te Atua. ’Aita hō’ē mea e tāmarū hau atu i tō ’outou vārua i roto i te mau taime māuiui. ’Aita hō’ē mea e ’īriti hau atu i te mau ra’i. ’Aita hō’ē !
Te hiero te ’ūputa e tae atu ai i te mau ha’amaita’ira’a rarahi a’e a te Atua nō tātou tāta’itahi, nō te mea, te hiero te vāhi hō’ē roa i ni’a i te fenua nei e nehenehe ai ia tātou ’ia fa’ari’i i te tā’āto’ara’a o te mau ha’amaita’ira’a i fafauhia ia Aberahama […]
E oa’oa ana’e tātou i roto i te fa’aho’i-fa’ahou-ra’a mai o te mau tāviri o te autahu’ara’a, ’o tē tauturu ho’i ia ’outou ’e iā’u nei ’ia ’oa’oa i te tā’āto’ara’a o te mau ha’amaita’ira’a pae vārua tā tātou e hina’aro ’e e ti’a ’ia fa’ari’i.