Tūha’a purera’a nō te po’ipo’i mahana mā’a
E tu’u ’outou i tā te Fatu ra tā Iesu Mesia i ni’a iho ia ’outou
Hu’a parau
Tē hina’aro nei tō tātou Metua i te hō’ē tā’amura’a hōhonu ’e tāna mau tamaiti ’e tāna mau tamāhine, tei ia tātou rā te mā’itira’a. ’Ia mā’iti ana’e tātou i te ha’afātata atu iāna nā roto i te hō’ē tā’amura’a o te fafaura’a e fa’ati’a te reira iāna ’ia ha’afātata mai ia tātou ’e ’ia ha’amaita’i rahi atu ā ia tātou.
[…] ’O Iesu Mesia te pū nō te mau fafaura’a ato’a ’o tā tātou e rave nei, ’e e nehenehe e roa’a te mau ha’amaita’ira’a o te fafaura’a maoti tāna tūsia tāra’ehara.
Te bāpetizo-utuhi-ra’a ’o te ’ūputa taipe ïa nā roto i te reira tātou e tomo ai i roto i te hō’ē tā’amura’a o te fafaura’a ’e te Atua. ’Ia utuhihia ’outou i raro i te pape ’e ’ia fa’ati’a-fa’ahou-hia mai, e taipe te reira nō te pohera’a ’e te ti’afa’ahoura’a mai o te Fa’aora i roto i te hō’ē orara’a ’āpī […] I roto i te Faufa’a ’Āpī, tē tai’o nei tātou : « ’O ’outou ato’a ho’i i bāpetizohia i roto i te Mesia ra, ’ua ’ahuhia ïa i tā te Mesia ra » [Galatia 3:27] […]
E fa’a’ite ato’a te ’ōro’a mo’a i te Fa’aora. Te pāne ’e te pape e taipe ïa nō te tino ’e te toto o te Mesia i nīni’ihia mai nō tātou […] ’Ia ’amu ’e ’ia inu ana’e tātou i te mau tāpa’o ’o tōna tino ’e ’o tōna toto, e riro mai te Mesia mai te taipe ’ei tuha’a nō tātou [hi’o Ioane 6:56] […]
’A rave ai tātou i te mau fafaura’a ’e te Atua i roto i te fare o te Fatu, e fa’ahōhonu atu ā tātou i tō tātou tā’amura’a e ’ōna. Te mau mea ato’a tā tātou e rave nei i roto i te hiero, tē fa’a’ite pāpū nei i te fa’anahora’a a te Metua nō tātou, i rōpū i te reira tē ti’a nei te Fa’aora ’e tāna tusia tāra’ehara […]
[…] Tē fa’aha’amana’o mai nei tō tātou ’ahu o te hiero ia tātou ē, e tāpo’i te Fa’aora ’e te mau ha’amaita’ira’a o tāna tāra’ehara ia tātou i te roara’a o tō tātou orara’a. ’A ’ahu ai tātou i te mau mahana ato’a i te ’ahu o te autahu’ara’a mo’a, e riro mai teie taipe nehenehe ’ei tuha’a nō tātou […]
Tē fa’a’ite pāpū nei au ē, e ho’onara’a mau te mau ha’amaita’ira’a rahi o taua tā’amura’a ra o te fafaura’a.