Tuha’a purera’a nō te po’ipo’i mahana mā’a
Te ti’aturira’a i roto i te fafaura’a nā roto ia Iesu Mesia
Hu’a parau
E te mau taea’e ’e te mau tuahine here, te feiā e nōa’a ia rātou te ti’aturira’a mau i roto i te mau fafaura’a i ravehia i roto i te fare o te Fatu nā roto ia Iesu Mesia, e fa’ari’i rātou i te hō’ē o te mau pūai mana rahi roa a’e e roa’a ia tātou i roto i teie orara’a […]
Nāhea e ti’a ai ia tātou ’ia nōa’a te reira huru ti’aturira’a nā roto ia Iesu Mesia ? E tae mai te reira nā roto i te ha’eha’a, nā roto i te fa’atumura’a i tō tātou orara’a i ni’a i te Fa’aora, nā roto i te ha’apa’ora’a i te mau parau tumu o te ’evaneria a Iesu Mesia, nā roto i te fa’ari’ira’a i te mau ’ōro’a o te fa’aorara’a ’e te fa’ateiteira’a, ’e nā roto i te fa’aturara’a i te mau fafaura’a tā tātou e rave i mua i te Atua i roto i tōna fare mo’a […]
[…] ’Ua ’ite au ē, ’ia ’ite ana’e te Fatu i te hō’ē noa a’e anapa hina’aro, ’aore rā hō’ē anapa tauto’ora’a ti’a i roto i tō tātou hina’aro ’ia fa’atumu i to tātou orara’a i ni’a iāna ’e i ni’a i te mau ’ōro’a ’e te mau fafaura’a tā tātou e rave i roto i tōna fare, e ha’amaita’i ’oia ia tātou, nā roto i tāna huru ravera’a maita’i roa, ’e te mau temeio ’e te mau aroha here e hina’arohia e tātou.
Te fare o te Fatu o te vāhi ïa i reira tātou e tauihia ai i roto i te mau huru teitei a’e ’e te mo’a a’e […] Te ha’apāpū atu nei au ia ’outou ē, ’ia fāri’i tātou i te vārua o te fare o te Fatu i roto ia tātou, e taui hope roa te reira ia tātou […]
E tāmau noa te patura’a vitiviti tāmau o te mau hiero i te fa’a’oa’oa ia tātou, ’ia fa’auru ia tātou ’e ’ia ha’amaita’i ia tātou. Teie rā te mea faufa’a roa atu, mai te mea e taui tātou i tō tātou fa’aineinera’a nō te tomo i roto i te hiero, e taui tātou i tō tātou ’itera’a i roto i te hiero, o tē taui ho’i i tō tātou orara’a i rāpae i te hiero. ’Ia fa’a’ī mai teie tauira’a ia tātou i te ti’aturira’a i roto i tā tātou mau fafaura’a mo’a tei ravehia i mua i te Atua nā roto ia Iesu Mesia.