Tuha’a purera’a nō te po’ipo’i sābati
Te mau fafaura’a ’e te mau hōpoi’a
Hu’a parau
Te fafaura’a, ’o te hō’ē ïa tauto’ora’a nō te fa’atupu i te tahi mau hopoi’a. E mea faufa’a te mau tauto’ora’a a te ta’ata iho nō te fa’atanora’a i tō tātou orara’a tāta’itahi ’e nō te tupura’a tanō nō te tōtaiete […]
I te taera’a mai te taime nō te fa’aho’i-fa’ahou-ra’a mai nō te ’īra’a o te ’evanelia a Iesu Mesia, ’ua pi’i te Atua i te hō’ē peropheta, ’o Iosepha Semita […] ’Ua riro [te Buka a Moromona] ’ei puna rahi nō te fa’aho’i-fa’ahou-ra’a mai nō te ’īra’a o te ’evanelia, ’oia ato’a te fa’anahora’a a te Atua nō tāna mau tamari’i, ’e ’ua ’ī te Buka a Moromona i te mau fa’ahorora’a o te mau fafaura’a […]
E vaira’a rahi roa tō te mau fafaura’a i roto i te fa’aho’i-fa’ahou-ra’a o te ’evanelia. E mea pāpū roa te reira ’ia hi’o ana’e i te mau ta’āhira’a mātamua roa i fa’auehia mai e te Fatu i te peropheta ’ia rave nō te fa’ati’ara’a i tāna ’Ēkālesia […]
Tē patu nei te ’Ēkālesia a Iesu Mesia i te Feiā Mo’a i te mau Mahana Hope’a nei i te mau hiero ē ’ati a’e te ao nei. Tā rātou fā, ’o te ha’amaita’ira’a ïa i te mau tamari’i a te Atua i parauhia i roto i te ha’amorira’a i roto i te hiero ’e i te mau titaura’a mo’a ’e te mau ha’amaita’ira’a tā rātou i fa’ari’i nā roto i te fafaura’a.
’Ua ’itehia te ’Ēkālesia a Iesu Mesia ’ei ’Ēkālesia ’o tē ha’apāpū nei i te faufa’a ’ia rave i te mau fafaura’a ’e te Atua. Tei roto te mau fafaura’a i te mau ’ōro’a tāta’itahi o te fa’aorara’a ’e te fa’ateiteira’a tā teie ’Ēkālesia i fa’aho’i-fa’ahou-hia mai e fa’atere nei. E tītauhia te ’ōro’a nō te bāpetizora’a ’e tō te reira mau fafaura’a nō te tomo i roto i te bāsileia tiretiera. E mau titaura’a te mau ’ōro’a hiero ’e te mau fafaura’a o te reira nō te fa’ate’iteira’a i roto i te bāsileia tiretiera, ’oia ho’i te ora mure ’ore, « te hōro’a rahi a’e i te mau hōro’a ato’a a te Atua » [Te Ha’api’ira’a Tumu ’e te mau Fafaura’a 14:7]. ’O terā te rōtahira’a a te ’Ēkālesia a Iesu Mesia i te Feiā Mo’a i te mau Mahana Hope’a nei.