Tuha’a purera’a nō te po’ipo’i mahana mā’a
E maita’i te mau mea ato’a maoti te mau fafaura’a o te hiero
Hu’a parau
Te mau taea’e ’e te mau tuahine, tē fa’a’ite pāpū nei au ma te ha’eha’a ē, ’ia haere ana’e tātou i te hiero, e fa’aha’amana’ohia tātou i te nātura mure ’ore o tō tātou vaerua, tō tātou aura’a ’e te Metua ’e tāna Tamaiti Hanahana, ’e tō tātou hina’aro hope roa ’ia ho’i i tō tātou fare i te ra’i ra […]
I raro a’e i te fa’aterera’a fa’auruhia a te peresiteni Nelson, tē fa’a’oi’oi nei te Fatu, ’e te tāmau noa nei i te fa’a’oi’oi i te patura’a i te mau hiero nā te ao ato’a nei. E fa’ati’a te reira i te mau tamari’i ato’a a te Atua i te rāve’a nō te fa’ari’i i te mau ’ōro’a nō te fa’aorara’a ’e te fa’ateiteira’a ’e ’ia rave ’e ’ia ha’apa’o i te mau fafaura’a mo’a […]
E nehenehe te ’āmui-pinepine-ra’a i roto i te mau ’ōro’a o te hiero e fa’atupu i te hō’ē hōho’a o te aurarora’a i te Fatu. ’Ia ha’apa’o ana’e ’outou i tā ’outou mau fafaura’a i roto i te hiero ’e ’a ha’amana’o ai ’outou i te reira, tē ani manihini ra ïa ’outou i te auhoara’a o te Vārua Maita’i nō te ha’apūai ’e nō te tāmā ia ’outou […]
Māoti te mau fafaura’a o te tā’atira’a i roto i te hiero, tātou e fa’ari’i ai i te ha’apāpūra’a nō te mau tā’amura’a o te ’utuāfare here, ’o tē vai noa i muri a’e te pohe ’e e tāmau noa nō te tau mure ’ore. E ’āfa’i mai te fa’aturara’a i te mau fafaura’a o te fa’aipoipora’a ’e nō te ’utuāfare tei ravehia i roto i te hiero o te Atua, i te pārurura’a i mua i te ’ino o te rima pu’u ’e te te’ote’o […]
Mea pāpū e fa’aruru tātou pa’ato’a i te mau tāmatara’a, te mau fifi, ’e te mau ’oto. ’Aore hō’ē o tātou i pāruruhia i te « rā’au taratara o te tino nei » [hi’o 2 Korinetia 12:7–10]. Teie rā, ’a haere ai tātou i te hiero ’e ’a ha’amana’o ai i tā tātou mau fafaura’a, e nehenehe tātou e fa’aineine nō te fa’ari’i i te arata’ira’a o te ta’ata iho a te Fatu […]
E au mau taea’e ’e mau tuahine here ē, tē fa’a’ite pāpū atu nei au ē, ’aore e mea hau atu i te faufa’a rahi i te fa’aturara’a i te mau fafaura’a tā ’outou i rave ’aore rā e nehenehe e rave atu i roto i te hiero.