Tuha’a purera’a nō te po’ipo’i sābati

Te mana’o o te Atua, ’o te fa’aho’ira’a ïa ia ’outou i te fare

Hu’a parau

Nā Elder Patrick Kearon

Nō te pupu nō te Tino ’Ahuru Ma Piti ’āpōsetolo

Te mau mea ato’a nō ni’a i te fa’anahora’a a te Metua nō tāna mau tamari’i herehira, ’ua ’ōpuahia ïa nō te fa’aho’i i te tā’āto’ara’a i te fare […]

Te aura’a ra, e rave ānei i te mau mea ato’a tā tātou e hina’aro i roto i tō tātou orara’a ? […] ’Aita roa ïa […] Te anira’a niu i roto i tāna mau ha’api’ira’a ato’a ’ia ora i te hō’ē fāito pae mōrare teitei a’e o te pi’ira’a ïa ’ia haere tātou tāta’itahi i mua, i te fa’aro’o fa’ataui i roto i te Mesia, i te tauira’a pūai o te ’ā’au […]

Mai te mea e ti’aturi tātou ē ’o te mana’o nō te fa’anahora’a a te Metua nō te tā’āto’ara’a te fa’aorara’a ia tātou, te tara-’ē-ra’a i tā tātou hara, te tahiti’ara’a ia tātou, ’e nā roto i te reira te fa’ataera’a mai ia tātou i te ’oa’oa, e aha ïa te mana’o o te Tamaiti e nā roto iāna teie fa’anahora’a rahi i te fa’atupuhia ? […]

Te hina’aro ’o Iesu, ’o te hina’aro hāmani maita’i ïa o te Metua ! ’Ua hina’aro ’oia ’ia ti’a i te ta’ata hope’a ato’a o nā tamari’i a tōna Metua ’ia fa’ari’i i te fā hope’a o te fa’anahora’a—te ora mure ’ore ’e rāua. ’Aita e ta’ata i fa’aāteahia i teie fāito pūai hanahana […]

Tē haere nei te Fa’aora, te Tīa’i māmoe maita’i, e ’imi i tāna māmoe mo’e ē ’ia ’itehia mai rātou iāna […]

’Aita, ’aita ’oia e tu’u nei i te mau ārai’ē’a ’e te mau ārai ; e tātara ’oia i te reira. ’Aita ’oia e ’ōpani ia ’outou i rāpae ; e fa’ari’i ’oia ia ’outou ’ia tomo mai […]

Terā te parau ’āpī maita’i ! E’ita e nehenehe e parau i tō’u māuruuru i teie mau parau mau ’ōhie. Te ’ōpuara’a a te Metua, tāna fa’anahora’a, tāna fā, tōna mana’o, tōna hina’aro ’e tōna ti’aturi, ’o te fa’aora ana’e ïa i tō ’outou māuiui, ’o te hōro’a ana’e ïa i te hau ia ’outou, ’o te fa’atae ana’e ïa ia ’outou, ’e ’ia rātou tā ’outou i here, i te fare.

Mātau ia Elder Patrick Kearon

Fānauhia i te 18 nō Tiurai 1961 i Carlisle, i Cumberland, i Peretāne.
’Ua ora i Arabia e rave rahi matahiti ’e tōna ’utuāfare.
’Ua ha’amata i te haere i te fare fa’ari’ira’a tamari’i i Peretāne i te 10ra’a o tōna matahiti. « ’Ia fa’aauhia, e mea fāna’o a’e paha ’o Harry Potter i Hogwarts », tāna ïa i parau nō ni’a i tāna iho fare ha’api’ira’a. « E mea fifi roa tā’u ha’api’ira’a ». Terā rā, i te fenua Arabia ’e te fenua Peretāne, ’ua parau ’oia : « ’Ua fārerei au e rave rahi ta’ata ’e’ē » ’e « ’ua ha’api’i mai au nā roto i te tupura’a ’ohipa ē, e mea maita’i te rahira’a o te mau ta’a-’ē-ra’a, ’e e mea fa’ahiahia roa ! ’Ua ha’afaufa’ahia tō’u orara’a i ni’a a’e i te mau fāito ato’a, ma te ’ohipara’a ’e te mau ta’ata nō te mau ta’ere ta’a ’ē ’e te mau ti’aturira’a ta’a ’ē, nō te mau fenua e rave rahi o te ao nei ».
’Ua pātiahia ’ōna i ni’a i te ’āvae e te hō’ē pata (scorpion) i te 7ra’a o tōna matahiti i te hō’ē pūhapara’a.
’Ua ha’api’ihia ’oia e tōna metua tāne nāhea i te fa’ahoro i te pere’o’o nā roto i te mēdēbara i te ivara’a o tōna matahiti.
Bāpetizohia i te pō Noela i te matahiti 1987 i te 26ra’a o tōna matahiti.
’Ua fārerei i tāna vahine ’o Jennifer, ’a haere ai ’oia i Lonedona nō te ha’api’ira’a nā te ara. ’Ua fa’aipoipohia rāua i te hiero nō Oakland (California, Marite) i te ’āva’e Tenuare matahiti 1991.
E maha tamari’i tā rāua : Sean (tei pohe i roto i tōna ’aru’arura’a), Elizabeth, Susannah ’e ’o Emma.
’Ua rave i te ’ohipa i te Peretāne mā, i te fenua Arabia ’e i te Fenua Marite, i roto i te mau taiete huru rau. ’Ua fa’atupu, ’e tāna vahine fa’aipoipo, i te hō’ē taiete e rohi i roto i te tūreiara’a.
Pāturuhia ’ei tino nō te Huimana fa’atere rahi i te 3 nō ’Ēperēra 2010.
Pi’ihia i roto i te pupu nō te Tino ’Ahuru Ma Piti ’āpōsetolo i te 7 nō Titema 2023. ’Ua parau ’oia ē : « E mea huru taiā ’e te fa’ahaeha’a teie pi’ira’a nō’u nei » . « E ti’a iā’u ’ia tu’u i tō’u ti’aturira’a ato’a i roto i te Fa’aora ’a ’imi ai au ’ia riro mai tāna e hina’aro iā’u ’ia riro ’e ’ia fa’a’ite i tō’u ’itera’a pāpū nō tōna here ’e tōna māramarama […] ’Ua here au iāna. E tūtava vau i te tāvini iāna i te maita’i-roa-ra’a o tō’u ’aravihi ».