Tuha’a purera’a nō te avatea mahana mā’a
Te pāturura’a i te u’i ’āpī
Hu’a parau
E ha’amaita’ihia ’e e ha’apūaihia te pāroisa tā’āto’a ’a rōtahi ai te mau melo i ni’a i te u’i ’āpī […]
E ha’api’i mai te feiā ’āpī i te hōho’a o te heheura’a, ’a ’āmui mai ai rātou ’e tātou i roto i te fa’anahora’a nō te ’imira’a ’e te ’ohipara’a mai te au i te fa’aurura’a nō te tāvini ia vetahi ’ē. ’A fāriu atu ai te feiā ’āpī i ni’a i te Fatu nō te fa’ari’i i teie arata’ira’a fa’auruhia, e hōhonu atu ā tō rātou tā’amura’a ’e ’ōna ’e tō rātou ti’aturira’a iāna.
Tē fa’a’ite atu nei mātou i tō mātou ti’aturira’a i te feiā ’āpī ma te hōro’ara’a i te pāturura’a ’e te arata’ira’a ia rātou, ma te ’ore e rave i te monora’a. Mai te hō’ē ta’ahira’a i muri ’e te fa’ati’ara’a i te feiā ’āpī ’ia ha’api’i mai nā roto i te ’āparau-’āmui-ra’a, te mā’itira’a i te hō’ē ha’api’ira’a fa’auruhia, ’e te fa’a’ohipara’a i tā rātou ’ōpuara’a, e ’ite rātou i te ’oa’oa ’e te tupura’a mau […]
Tē ha’amāere nei tō tātou feiā ’āpī ia tātou ma tō rātou itoito, tō rātou fa’aro’o, ’e tō rātou ’aravihi. Mai te mea e mā’iti rātou ’ia riro ’ei mau pipi tei ’ī i te itoito nā Iesu Mesia, e nana’ohia tāna ’evanelia i roto i tō rātou ’ā’au. E riro te pe’era’a iāna ’ei tuha’a ’o vai mau rātou, ’eiaha noa nō te ’ohipa tā rātou e rave ra […]
Nō roto mai te feiā ’āpī o teie mahana tō te Metua i te ao ra mau vārua hanahana roa a’e. Nō roto mai rātou i te pupu e pāruru pūai nei i te parau mau ’e te ti’amāra’a i roto i te ao hou te tāhuti nei. ’Ua fānauhia mai rātou i teie ’anotau nō te ha’aputuputu ia ’Īserā’ela maoti tō rātou ’itera’a pāpū pūai nō ni’a i te Fatu ia Iesu Mesia. ’Ua mātau ’oia ia rātou tāta’itahi ’e ’ua ’ite ’oia i tō rātou fāito pūai rahi. Mea fa’a’oroma’i ’oia ’a tupu ai rātou i te rahi. E fa’aora ’e e pāruru ’oia ia rātou. E fa’aoraora ’e e arata’i ’oia ia rātou.