Fanontaniana sy valiny

“Tsy misy manana fitsipika mitovy amin’ny ahy ny ao an-tsekoly. Ahoana no ahafahako manana namana tsara any?

“Samy manana fahatsapana ho mila namana ny olona rehetra. Isika rehetra dia samy mitady porofo maneho fa olona manana ny lanjany isika. Manao safidy mifototra amin’ireo faniriana ireo isika. Ny sasany amin’izany dia mety hitarika antsika hanalavitra ny fahazavana omen’ Andriamanitra antsika mba hitarika antsika. Ny sasany hafa kosa dia afaka manazava izany fahazavana izay ahafahantsika mahita ny lalana tokony halehantsika izany.

Filoha Henry B. Eyring ao amin’ny Fiadidiana Voalohany, “Walk in the Light,” fihaonamben’ny Fiangonana maneran-tany apr. 2008 (Ensign na Liahona, May 2008).

“Resaho ny zavatra mahaliana iombonanareo. Tsy voatery hampihena ny fahazavanao ianao. Mila fotsiny ianao ho zatovo toy ny rehetra izay mankafy ihany koa ireo zavatra mahafinaritra sasany izay ankafizin’ireo zatovo hafa. Araho ireo fitsipik’i Jesoa Kristy, ary ataovy mazava amin’ireo mpiara-mianatra aminao hoe inona avy ireo fitsipika arahinao.”

Jamie Ann B., 18 taona, Negros Occidental, Filipina

“Mitadiava olona mitovy kilasy, na zavatra mahaliana, talenta, na fialam-boly aminao. Misy olona tena tsara avy amin’ny finoana hafa, ary misy koa olona tena mahafinaritra izay tsy manana finoana mihitsy. Zanak’ Andriamanitra malalany foana izy ireny. Rehefa manohy mitandrina ireo fitsipika arahinao ianao, na dia tsy manao izany aza ny namanao, dia mety hamporisika ny hafa hanao safidy tsara kokoa ny ohatra asehonao.”

Lucy B., 15 taona, Lima, Perou

“Aoka ianao hanam-paharetana sy hivelatra ara-toe-tsaina. Tsy ny hanana namana betsaka no zava-dehibe fa ny hanana namana tsara, ary ny fananana namana vitsy tena tsara dia afaka ny hahasoa kokoa noho ny fiezahana hanana ny toeranao eo anivon’ny andiana namana iray izay tsy manaraka ireo fitsipika arahinao.”

Adedoyin Alma O., 17 taona, Osun, Nizerià

“Zarao amin’izy ireo ny fitsipika arahinao. Raha fantatr’izy ireo hoe inona ireo fitsipika arahinao dia afaka ny hanaja azy ireny izy ireo. Azonao asaina koa ireo namana any am-pianarana hanatrika fotoam-pivavahana sy/na fiaraha-mientana an’ny Fiangonana mba hanampiana azy ireo hahita misimisy kokoa ny zavatra inoanao.”

Margarett P., 13 taona, Texas, Etazonia

“Nianatra aho fa afaka mahita namana tsara ianao amin’ny alalan’ireo bitsiky ny Fanahy sy ny fanehoanao tsotra izao ny maha ianao anao. Indraindray ny olona dia hanatona anao, ary indraindray dia ianao no mila mikaroka, saingy hisy ireo olona izay ho namana tsara ho anao na mila namana tsara tahaka anao.”

Katie R., 18 taona, Nebraska, Etazonia

Ireo valin-teny dia natao ho fanampiana sy ho fanoroan-kevitra fa tsy fanambarana ôfisialy ny fotopampianaran’ny Fiangonana.

Inona no hevitrao?

“Manana fanapahan-kevitra goavana maro tokony horaisina aho. Ahoana no handraisako fanambarana ho an’ny tena manokana?”

Alefaso ny valin-teninao sy ny sarinao hatramin’ny 15 aogositra 2024.

Andefaso email izahay ao amin’ny [e-mail]. Na mankanesa ao amin’ny ftsoy.ChurchofJesusChrist.org dia tsindrio ny “Submit Your Work.” Midira ao amin’ny alalan’ny kaontinao ao amin’ny Fiangonana ary safidio ny “For the Strength of Youth” eo ambanin’ny “Choose Magazine.” Tsindrio ny “Add File” hisafidianana ny fichier sy ny sarinao, dia tsindrio ny “Submit” hampidirana sy handefasana ny fichier izay anao aty aminay.

Mety hasiam-panamboarana ireo valin-teny noho ny halavany sy mba hampazava kokoa izay tiana hambara.