ប្រកាសពរជ័យនៃសេចក្ដីសញ្ញារបស់អ្នក
ដោយលីនដា អេស រីវស៍ន
ទីប្រឹក្សាទីពីរនៅក្នុងគណៈប្រធានសមាគមសង្គ្រោះទូទៅ
នៅពេលយើងរំឭក ហើយគោរពសេចក្ដីសញ្ញារបស់យើង នោះបន្ទុកយើង អាចត្រូវបានសម្រាល ហើយយើងអាចបន្ដប្រែក្លាយជាបរិសុទ្ធ និងរឹងមាំ ។
បងប្អូនស្រី វាជាការប្រពៃណាស់ នៅជាមួយអ្នកម្ដងទៀត ! យើងមានអំណរគុណណាស់ ពេលយើងឃើញការលះបង់របស់អ្នកចំពោះព្រះបិតាសួគ៌ និងការបម្រើចំពោះអ្នកដទៃ ។
ថ្មីៗនេះ ខ្ញុំបានជួបនឹងស្ត្រីម្នាក់ ដែលត្រៀមទទួលបុណ្យជ្រមុជទឹក ។ នៅថ្ងៃអាទិត្យនោះ គាត់បានមកដល់ព្រះវិហារ ដោយថ្មើជើងចម្ងាយពីរម៉ែល ( 3 គ.ម ) កាត់ភក់ល្បាប់ ។ ភ្លាមនោះ គាត់បានទៅបន្ទប់ទឹក ដោះសំលៀកបំពាក់ប្រឡាក់ភក់ចេញ គក់វា រួចផ្លាស់សំលៀកបំពាក់ស្អាតជំនួសវិញ ។ នៅក្នុងការប្រជុំសមាគមសង្គ្រោះ គាត់បានប្រាប់ពីការផ្លាស់ប្រែចិត្តជឿរបស់គាត់ ។ ខ្ញុំរំជួលចិត្តចំពោះបំណងរបស់គាត់ ដើម្បីឲ្យបានលាងជ្រះស្អាត ហើយបរិសុទ្ធ តាមរយៈការប្រែចិត្ត និងពលិកម្មដង្វាយធួនរបស់ព្រះអង្គសង្គ្រោះ ហើយការមានឆន្ទៈដើម្បីលះបង់ « ជីវិតចាស់ » របស់គាត់ ដើម្បីធ្វើសេចក្ដីសញ្ញាដ៏ពិសិដ្ឋជាមួយព្រះបិតាសួគ៌ ។ គាត់បានបែកពីមិត្តប្រុស បានយកឈ្នះការញៀនដើម្បីរស់នៅតាមពាក្យសម្ដីនៃប្រាជ្ញាវាងវៃ ឈប់ពីការងារចំថ្ងៃអាទិត្យ ហើយបាត់បង់មិត្តភាពនឹងមនុស្សជាទីស្រឡាញ់ ពេលគាត់ប្រាប់ពីផែនការទទួលបុណ្យជ្រមុជទឹក ។ គាត់រំភើបចិត្តនឹងលះបង់អំពើបាបទាំងអស់ ដើម្បីគាត់អាចត្រូវបានលាងសំអាត ហើយទទួលអារម្មណ៍ក្ដីស្រឡាញ់ប្រោសលោះនៃព្រះអង្គសង្គ្រោះ ។ ខ្ញុំត្រូវបានបំផុសគំនិតនាព្រឹកនោះ ដោយបំណងដែលគាត់មាន ដើម្បីប្រែជាស្អាតស្អំទាំងខាងរូបកាយ និងខាងវិញ្ញាណ ។
យើងដឹងថា អ្នករាល់គ្នាជាច្រើន បានធ្វើការលះបង់ស្រដៀងគ្នានេះ ពេលអ្នកទទួលសាក្សីពីព្រះវិញ្ញាណបរិសុទ្ធ ហើយមានបំណងចង់ប្រែចិត្ត ចង់ទទួលបុណ្យជ្រមុជទឹក និងបានស្អាតស្អំ ។ ប្រហែលជាយើងពុំដែលទទួលអារម្មណ៍ពីក្ដីស្រឡាញ់នៃព្រះអង្គសង្គ្រោះដ៏ទេវភាព ខ្លាំងដូចជាយើងមានពេលយើងប្រែចិត្ត ហើយដឹងពីព្រះហស្តនៃក្ដីស្រឡាញ់ទ្រង់ លាតក្រសោបយើង ហើយអះអាងដល់យើងដោយក្ដីស្រឡាញ់ និងការទទួលយកយើងនោះទេ ។
ប៉ុន្មានអាទិត្យកន្លងទៅ ពេលខ្ញុំស្ដាប់ការអធិស្ឋានសាក្រាម៉ង់ ខ្ញុំរំជួលចិត្តតាមរបៀបដែលសង្ឃបានថ្លែងពាក្យនីមួយៗដោយអារម្មណ៍ដ៏អស្ចារ្យ ។ ក្រោយមក ខ្ញុំបានទូរស័ព្ទទៅសង្ឃនោះ ថ្លែងអំណរគុណសម្រាប់ការធ្វើឲ្យពិធីសាក្រាម៉ង់មានបទពិសោធន៍ខាងវិញ្ញាណខ្លាំងចំពោះខ្ញុំ និងក្រុមជំនុំ ។ គាត់ពុំនៅផ្ទះទេ តែម្ដាយគាត់បានឆ្លើយថា « អូ៎ គាត់នឹងសប្បាយចិត្តណាស់ ដែលអ្នកបានទូរស័ព្ទមក ! នេះជាលើកទីមួយ ដែលគាត់ធ្វើការអធិស្ឋានក្នុងពិធីសាក្រាម៉ង់ ហើយយើងបានរៀបចំជាមួយគ្នា និយាយអំពីសារៈសំខាន់នៃពិធីសាក្រាម៉ង់ និងរំឭកសេចក្ដីសញ្ញាបុណ្យជ្រមុជទឹករបស់យើងជាមួយព្រះអង្គសង្គ្រោះដោយសក្ដិសម »។ ខ្ញុំពិតជាចូលចិត្តម្ដាយជាទីស្រឡាញ់រូបនេះ ដែលបង្រៀនដល់កូនប្រុស អំពីអំណាចនៃសេចក្ដីសញ្ញានៃបុណ្យជ្រមុជទឹក និងរបៀបដែលគាត់ អាចជួយដល់សមាជិកវួដឲ្យស្គាល់អំណាចនោះ ។
ម្ដាយម្នាក់ទៀតដែលខ្ញុំស្គាល់ បានអង្គុយម្នាក់ឯងនៅព្រះវិហារអស់ជាច្រើនឆ្នាំជាមួយនឹងកូនតូចៗបួននាក់ ។ ដោយពិបាកនឹងសញ្ជឹងគិតអំពីព្រះអង្គសង្គ្រោះអំឡុងពិធីសាក្រាម៉ង់ គាត់បានបង្កើតផែនការមួយ ។ ឥឡូវគាត់ព្យាយាមចំណាយពេលរាល់ថ្ងៃសៅរ៍ពិនិត្យមើលអ្វីគាត់បានធ្វើក្នុងសប្ដាហ៍ហើយគិតអំពីសេចក្ដីសញ្ញារបស់គាត់ និងអ្វីដែលគាត់ចាំបាច់ត្រូវប្រែចិត្ត ។ គាត់និយាយថា « បន្ទាប់មក មិនថាខ្ញុំនឹងជួបបទពិសោធន៍ប្រភេទណាជាមួយនឹងកូនៗនៅថ្ងៃអាទិត្យទេ គឺខ្ញុំបានត្រៀមខ្លួនដើម្បីទទួលទានសាក្រាម៉ង់ រំឭកសេចក្ដីសញ្ញារបស់ខ្ញុំ ហើយដឹងពីអំណាចនៃដង្វាយធួនលាងជំរះស្រេចហើយ » ។
បងប្អូនស្ត្រីជាទីស្រឡាញ់ ហេតុអ្វីបានជាព្រះអង្គសង្គ្រោះចាត់ទុកពិធីសាក្រាម៉ង់សំខាន់ដូច្នេះ ? តើការរំឭកសេចក្ដីសញ្ញាបុណ្យជ្រមុជទឹករបស់យើងប្រចាំសប្ដាហ៍នេះ មានសារៈសំខាន់អ្វីខ្លះក្នុងជីវិតយើង ? តើយើងទទួលស្គាល់លទ្ធភាពរបស់ព្រះអង្គសង្គ្រោះក្នុងការសំអាតយើងទាំងស្រុង ជារៀងរាល់សប្ដាហ៍ នៅពេលយើងទទួលទានសាក្រាម៉ង់ដោយសក្ដិសម និងតាំងចិត្តដែរឬទេ ?ប្រធាន Boyd K. Packer បានថ្លែងបន្ទាល់ថា « នោះគឺជាការសន្យានៃដំណឹងល្អនៃព្រះយេស៊ូវគ្រីស្ទ និងដង្វាយធួនថា ៖ … នៅចុងបញ្ចប់នៃ [ ជីវិតយើង នោះយើង ] អាចដើរឆ្លងកាត់វាំងននដោយបានប្រែចិត្តពីអំពើបាប [របស់យើង] ហើយត្រូវបានលាងសំអាតតាមរយៈលោហិតនៃព្រះគ្រីស្ទ » ។ 1
គណៈប្រធានរបស់យើង មានចិត្តអំណរយ៉ាងខ្លាំង ពេលបងប្អូនស្ត្រី និងគ្រួសារពួកគេ បានធ្វើ និងរក្សាសេចក្ដីសញ្ញា ប៉ុន្តែដួងចិត្តយើង សោកស្ដាយចំពោះអ្នកទាំងឡាយ ដែលជួបប្រទះនឹងភាពមិនអនុគ្រោះដ៏ធំនៅក្នុងជីវិត ដោយសារតែមនុស្សជាទីស្រឡាញ់របស់ពួកគេក្បត់សេចក្ដីសញ្ញា ។ ព្យាការី យ៉ាកុប ប្អូនប្រុសរបស់នីហ្វៃ ត្រូវបានព្រះបង្គាប់ឲ្យថ្លែងទៅកាន់បងប្អូនប្រុសរបស់គាត់អំពីស្ត្រី និងកុមារបរិសុទ្ធនៅជំនាន់គាត់ ។ ខ្ញុំថ្លែងទីបន្ទាល់ថា ពាក្យរបស់គាត់បានរក្សាទុកសម្រាប់ជំនាន់យើងពិត ។ គាត់និយាយមកកាន់យើង ដូចជាព្រះអង្គសង្គ្រោះផ្ទាល់ កំពុងមានបន្ទូល ។ យ៉ាកុប « ត្រូវធ្វើឲ្យកើតទុក្ខ … » នៅពេលគាត់ថ្លែងទីបន្ទាល់ទៅកាន់ស្វាមី និងឪពុកទាំងឡាយ ៖
« ហើយវាក៏ធ្វើឲ្យខ្ញុំកើតទុក្ខ ដែលខ្ញុំត្រូវប្រើពាក្យដ៏ធ្ងន់ធ្ងរដល់អ្នក នៅចំពោះមុខប្រពន្ធរបស់អ្នក និងកូនចៅរបស់អ្នកដែលភាគច្រើនមានអារម្មណ៍ទន់ភ្លន់ និងបរិសុទ្ធ និងចិត្តទោរទន់ …
« …នៅចំពោះព្រះ គឺជាការណ៍ដែលសព្វព្រះហឫទ័យព្រះដល់ព្រះ ។ …នោះបេះដូងជាច្រើនបានស្លាប់ ដោយត្រូវចាក់ទំលុះឲ្យមានរបួសយ៉ាងជ្រៅ » ។ 2
យ៉ាកុប សន្យាចំពោះស្ត្រី និងកុមារដែលរក្សាសេចក្ដីសញ្ញានៃជំនាន់គាត់ និងជំនាន់យើងថា ៖
« ចូរមើលទៅព្រះដោយមានគំនិតរឹងប៉ឹង ហើយអធិស្ឋានដល់ព្រះអង្គដោយមានសេចក្ដីជំនឿដ៏លើសលប់ នោះទ្រង់នឹងលួងលោមដល់អ្នកក្នុងគ្រាដែលអ្នកមានទុក្ខលំបាក ។ …
« … ចូរងើបក្បាលឡើង ហើយទទួលព្រះបន្ទូលដ៏ផ្អែមល្ហែមនៃព្រះ ហើយទទួលទាននូវសេចក្ដីស្រឡាញ់របស់ទ្រង់ចុះ » ។ 3
បងប្អូនស្រី ខ្ញុំថ្លែងទីបន្ទាល់អំពីថាមពល និងអំណាចនៃការអធិស្ឋាន នៅពេលយើង បង្ហាញនូវការឈឺចាប់ និងបំណងដ៏ជ្រាលជ្រៅរបស់យើងចំពោះព្រះវរបិតាសួគ៌ និងចម្លើយដែលយើងបានទទួល នៅពេលយើង « ទទួលទាន » បទគម្ពីរ និងសម្ដីរបស់ព្យាការីនៅរស់ ។
ជិតបីឆ្នាំកន្លងទៅ មានអគ្គីភ័យឆាបឆេះបំផ្លាញផ្នែកខាងក្នុងនៃរោងឧបោសថជាប្រវត្តិសាស្ត្រ និងជាទីស្រឡាញ់របស់យើងនៅទីក្រុង ប្រូវ៉ូ រដ្ឋយូថាហ៍ ។ ការបាត់បង់វា ចាត់ទុកជាសោកនាដកម្មដ៏ធំមួយ ទាំងអ្នកក្នុងសហគមន៍ និងសមាជិកសាសនាចក្រ ។ មានមនុស្សជាច្រើនបានងឿងឆ្ងល់ថា « ហេតុអ្វីក៏ព្រះទុកឲ្យរឿងនេះកើតឡើង ? » ប្រាកដណាស់ថា ទ្រង់អាចរារាំង ឬបញ្ឈប់អគ្គិភ័យកុំឲ្យបំផ្លាញវាបាន » ។
ដប់ខែក្រោយមក អំឡុងសន្និសីទទូទៅខែតុលា ឆ្នាំ 2011 មានសំឡេងភ្ញាក់ផ្អើលបន្លឺឡើង នៅពេលប្រធាន ថូម៉ាស អេស ម៉នសុន ប្រកាសថា រោងឧបោសថដែលត្រូវបំផ្លាញស្ទើរតែទាំងស្រុងនោះ នឹងក្លាយទៅជាព្រះវិហារបរិសុទ្ធ-- ដំណាក់នៃព្រះអម្ចាស់នោះ ! រំពេចនោះ យើងអាចឃើញនូវអ្វីដែលព្រះតែងតែដឹង ! ទ្រង់ពុំបណ្ដាលឲ្យមានអគ្គិភ័យទេ ប៉ុន្តែទ្រង់ទុកឲ្យភ្លើងនោះបំផ្លាញផ្នែកខាងក្នុង ។ ទ្រង់ទតឃើញរោងឧបោសថជាព្រះវិហារបរិសុទ្ធដ៏រុងរឿង-- ជាដំណាក់ខ្ជាប់ខ្ជួនមួយដើម្បីធ្វើសេចក្ដីសញ្ញាពិសិដ្ឋ និងអស់កល្ប ។ 4
បងប្អូនស្រីជាទីស្រឡាញ់ ព្រះទុកឲ្យយើងទទួលបញ្ហា និងសាកល្បង ពេលខ្លះដល់កម្រិតអតិមរិមានៃសមត្ថភាពរបស់យើង ។ យើងបានឃើញជីវិតរបស់មនុស្សជាទីស្រឡាញ់--ប្រហែលជារបស់យើងផ្ទាល់--ត្រូវបានដុតឆេះរាបដល់ដី ហើយបានងឿងឆ្ងល់ថា ហេតុអ្វីព្រះបិតាជាទីស្រឡាញ់ និងមានព្រះទ័យទុកដាក់ ទុកឲ្យរឿងដូច្នោះកើតឡើងបាន ។ ប៉ុន្តែទ្រង់ពុំទុកយើងឲ្យនៅក្នុងផេះផង់ទេ ទ្រង់គង់លាតព្រះហស្ត អញ្ជើញយើងឲ្យមករកទ្រង់ ។ ទ្រង់កំពុងស្ថាបនាជីវិតយើងឲ្យក្លាយជាព្រះវិហារបរិសុទ្ធដ៏រុងរឿង ជាកន្លែងដែលព្រះវិញ្ញាណទ្រង់អាចគង់នៅដ៏អស់កល្ប ។
ក្នុងគោលលទ្ធិ និងសេចក្ដីសញ្ញា 58:3–4 ព្រះអម្ចាស់ប្រាប់យើងថា ៖
« ត្បិតនៅពេលនេះ អ្នករាល់គ្នាពុំអាចមើលឃើញដោយភ្នែកធម្មតារបស់អ្នកឡើយ នូវគម្រោងការណ៍នៃព្រះរបស់អ្នកអំពីអ្វីៗទាំងនោះ ដែលត្រូវបានមកនៅពេលក្រោយ និងសិរីល្អដែលត្រូវមកតាក្រោយ បន្ទាប់ពីមានសេចក្ដីវេទនាដ៏ច្រើន ។
« ត្បិតបន្ទាប់ពីមានការវេទនាដ៏ច្រើន នោះទើបបានព្រះពរ ។ ហេតុដូច្នោះហើយ ថ្ងៃនោះនឹងមកដល់ កាលអ្នករាល់គ្នានឹងត្រូវបានពាក់សិរីល្អដ៏ច្រើនទុកជាមកុដ » ។
បងប្អូនស្ត្រី ខ្ញុំថ្លែងបន្ទាល់ថា ព្រះអម្ចាស់មានផែនការមួយសម្រាប់ជីវិតយើងម្នាក់ៗ ។ គ្មានអ្វីដែលកើតឡើង ធ្វើឲ្យទ្រង់ភ្ញាក់ផ្អើល ឬរន្ធត់ឡើង ។ ទ្រង់ជ្រាបគ្រប់យ៉ាង ហើយស្រឡាញ់ទាំងអស់ ។ ទ្រង់ចង់ជួយយើង លួងលោមយើង ហើយសម្រាលការឈឺចាប់យើង ពេលយើងពឹងលើអំណាចនៃដង្វាយធួន និងគោរពសេចក្ដីសញ្ញាយើងនោះ ។ ការសាកល្បង និងទុក្ខវេទនា ដែលយើងជួប អាចជាអ្វីៗដែលដឹកនាំយើងឲ្យទៅរកទ្រង់ ហើយតោងជាប់សេចក្ដីសញ្ញាយើង ដើម្បីយើងអាចត្រឡប់ទៅវត្តមានទ្រង់ ហើយទទួលអ្វីៗដែលព្រះបិតាមាន ។
កាលពីឆ្នាំមុននេះ ខ្ញុំត្រូវការ និងចង់ដឹងពីក្ដីស្រឡាញ់របស់ព្រះឲ្យកាន់តែខ្លាំង ចង់ទទួលវិវរណៈផ្ទាល់ខ្លួន ដើម្បីយល់ដឹងកាន់តែច្បាស់ពីសេចក្ដីសញ្ញាព្រះវិហារបរិសុទ្ធខ្ញុំ ហើយបន្ទុករបស់ខ្ញុំត្រូវបានសម្រាល ។ នៅពេលខ្ញុំអធិស្ឋានសុំពរជ័យជាក់លាក់ទាំងនេះ ខ្ញុំទទួលព្រះវិញ្ញាណដឹកនាំខ្ញុំឲ្យទៅព្រះវិហារបរិសុទ្ធ ហើយស្ដាប់ដោយយកចិត្តទុកដាក់នូវពាក្យនិមួយៗនៃពរជ័យដែលប្រាប់ដល់ខ្ញុំ ។ ខ្ញុំថ្លែងបន្ទាល់ថា ពេលខ្ញុំស្ដាប់កាន់តែយកចិត្តទុកដាក់ ហើយព្យាយាមអនុវត្តសេចក្ដីជំនឿខ្ញុំ ព្រះមានក្ដីមេត្តាចំពោះខ្ញុំ ហើយបានជួយខ្ញុំឲ្យសម្រាលបន្ទុកខ្ញុំ ។ ទ្រង់បានជួយខ្ញុំមានអារម្មណ៍សុខសាន្ដយ៉ាងខ្លាំងអំពីការអធិស្ឋាន ដែលពុំទាន់បានទទួលចម្លើយនោះ ។ យើងចងភ្ជាប់នឹងព្រះឲ្យរក្សាការសន្យាទ្រង់ ពេលយើងរក្សាសេចក្ដីសញ្ញាយើង ហើយអនុវត្តក្ដីជំនឿ ។ 5 បងប្អូនស្រី ចូរមកព្រះវិហារបរិសុទ្ធ ហើយទទួលយកពរជ័យអ្នកចុះ!
ខ្ញុំចង់និយាយអំពីរបៀបផ្សេងទៀត ដែលការរក្សាសេចក្ដីសញ្ញាយើង អាចផ្ដល់ទំនុកចិត្ត និងជំនឿដល់យើង ។ ពេលខ្លះស្ត្រី យើងមានទំនោរនៃការរិះគន់ខ្លួនយ៉ាងខ្លាំង ។ អំឡុងគ្រានេះ យើងត្រូវស្វែងរកព្រះវិញ្ញាណ ហើយសួរថា « តើនេះជាអ្វីដែលព្រះអម្ចាស់ចង់ឲ្យខ្ញុំគិតពីខ្លួនឯងឬ ឬតើសាតាំងកំពុងតែបំបាក់ទឹកចិត្តខ្ញុំឬ ? » ចូរចាំពី ធម្មជាតិនៃព្រះបិតា ដែលមានក្ដីស្រឡាញ់ដ៏ឥតខ្ចោះ និងនិរន្ដន៍ ។ 6 ទ្រង់ចង់ស្ថាបនាយើងឡើង ទ្រង់ពុំបំផ្លាញយើងទេ ។
ក្នុងនាមជាសមាជិកសាសនាចក្រ ពេលខ្លះយើងមានអារម្មណ៍ថា ត្រូវមានចំណែកនៃ « គ្រួសារ អិល.ឌី.អេសដ៏ឥតខ្ចោះមួយ » ដើម្បីឲ្យព្រះទទួលយើង ។ ជាញឹកញាប់ យើងមានអារម្មណ៍ « មិនសំខាន់ឬ ពុំសមនឹងនគរទេ បើយើងមានអារម្មណ៍ថាយើងពុំសមនឹងទិដ្ឋភាពនោះ ។ បងប្អូនស្ត្រីជាទីស្រឡាញ់ អ្វីដែលសំខាន់ចំពោះព្រះវរបិតាគង់នៅស្ថានសួគ៌ នោះគឺថាយើងបានរក្សាសេចក្ដីសញ្ញារបស់យើងបានល្អប៉ុណ្ណា ហើយថាតើយើងបានព្យាយាមធ្វើតាមគំរូរបស់ព្រះអង្គសង្គ្រោះ ព្រះយេស៊ូវគ្រីស្ទច្រើនប៉ុណ្ណាទៅវិញទេ ។
ខ្ញុំថ្លែងបន្ទាល់ថាព្រះយេស៊ូវគ្រីស្ទ គឺជាព្រះអង្គសង្គ្រោះ និងព្រះប្រោសលោះយើង ។ ដោយសារពលិកម្មធួនរបស់ទ្រង់ នោះយើងអាចលាងសម្អាតប្រចាំសប្ដាហ៍ នៅពេលយើងទទួលទានសាក្រាម៉ង់ដោយសក្ដិសម ។ នៅពេលយើងរំឭក និងគោរពសេចក្ដីសញ្ញារបស់យើង នោះបន្ទុកយើង ត្រូវបានសម្រាល ហើយយើងអាចបន្ដប្រែក្លាយជាបរិសុទ្ធ និងពង្រឹង ដើម្បីនៅទីបំផុតនៃជីវិតយើង នោះយើងនឹងរាប់ថាសក្ដិសមដើម្បីទទួលការលើកតម្កើង និងជីវិតអស់កល្បជានិច្ច ។ ខ្ញុំថ្លែងរឿងទាំងនេះ នៅក្នុងព្រះនាមព្រះអង្គសង្គ្រោះសំណប់របស់យើង ព្រះយេស៊ូវគ្រីស្ទ អាម៉ែន ។