កូនសោទៅកាន់ការការពារខាងវិញ្ញាណ
ដោយប្រធាន ប៊យដ៍ ឃេ ផាកកឺ
ប្រធាននៃកូរ៉ុមនៃពួកសាវកដប់ពីរនាក់
សេចក្ដីសុខសាន្ដ អាចតាំងនៅក្នុងចិត្តនៃមនុស្សម្នាក់ៗដែលងាកមករកគម្ពីរ ហើយទទួលបានការសន្យានៃការការពារ និងការប្រោសលោះ ។
ថ្មីៗនេះ ខ្ញុំបានផ្សារភ្ជាប់ឲ្យគូស្វាមីភរិយាវ័យក្មេងមួយគូរក្នុងព្រះវិហារបរិសុទ្ធ ។ គូនេះ បានរក្សាខ្លួនពួកគេសក្ដិសមដើម្បីមកដល់ថ្ងៃដ៏អស្ចារ្យ ពេលកូនប្រុស និងកូនស្រីចេញពីភាពជាយុវវ័យ ក្លាយជាស្វាមីភិរិយា ។ ក្នុងឱកាសពិសិដ្ឋនេះ ពួកគេបរិសុទ្ធ និងស្អាតស្អំ ។ ដល់ពេលមួយ ពួកគេនឹងចាប់ផ្ដើមបង្កើតកូនចៅផ្ទាល់ខ្លួន ស្របតាមគំរូដែលបានស្ថាបនាដោយព្រះបិតាសួគ៌យើង ។ សុភមង្គលពួកគេ និងសុភមង្គលនៃកូនចៅជំនាន់ក្រោយ អាស្រ័យលើការរស់នៅតាមបទដ្ឋានដែលបានស្ថាបនាដោយព្រះសង្គ្រោះ និងបានដាក់ក្នុងព្រះគម្ពីរទ្រង់នោះ ។
ឪពុកម្ដាយសព្វថ្ងៃ ងឿងឆ្ងល់បើមានកន្លែងសុវត្ថិភាពមួយ ដើម្បីចិញ្ចឹមកូនចៅឬទេ ។ មាន កន្លែងសុវត្ថិភាពមួយ ។ នៅក្នុងគេហដ្ឋានដែលមានដំណឹងល្អជាចម្បង ។ យើងផ្ដោតទៅលើគ្រួសារក្នុងសាសនាចក្រ ហើយយើងប្រឹក្សាឪពុកម្ដាយគ្រប់ទីកន្លែងឲ្យចិញ្ចឹមកូនៗពួកគេក្នុងសេចក្ដីសុចរិត ។
សាវកប៉ុល បានព្យាករ ហើយព្រមានថា « នៅជាន់ក្រោយបង្អស់ នឹងមានគ្រាលំបាកណាស់ ។
« ត្បិតនៅគ្រានោះ មនុស្សនឹងស្រឡាញ់តែខ្លួនឯង ទាំងស្រឡាញ់ប្រាក់ អួតអាងគឃរ មានឫកខ្ពស់ ម្រមាថមើលងាយ មិនស្ដាប់បង្គាប់ឪពុកម្ដាយ រមិលគុណ មានចិត្តមិនបរិសុទ្ធ
« មិនស្រឡាញ់តាមធម្មតាមនុស្ស គ្មានសេចក្ដីអធ្យោគ និយាយបង្កាច់គេ មិនចេះទប់ចិត្ត មានចិត្តសាហាវ មិនចូលចិត្តនឹងការល្អ
« ក្បត់គេឥតបើគិត មានចិត្តធំ ហើយចូលចិត្តនឹងល្បែងលេងជាជាងព្រះ
« គេមានឫកពាជាអ្នកគោរពប្រតិបត្តិដល់ព្រះ ប៉ុន្តែមិនព្រមទទួលស្គាល់ព្រះចេស្ដា ៖ ដែលមកដោយការគោរពប្រតិបត្តិនោះទេ » ។ 1
ប៉ុលក៏បានព្យាករផងដែរថា « ហើយពួកអាក្រក់ និងពួកឆបោក គេនឹងមានជំនឿនជឿនទៅខាងសេចក្ដីអាក្រក់កាន់តែខ្លាំងឡើង » ។ 2
ខគម្ពីរទាំងនេះ បម្រើជាការព្រមាន បង្ហាញពីគំរូដើម្បីចៀសវាង ។ យើងត្រូវតែប្រយ័ត្ន និងឧស្សាហ៍ជានិច្ច ។ យើងអាចរំឭកការព្យាករណ៍ទាំងនេះនីមួយៗ ហើយដាក់គូសចំណាំជិតនោះថា មានវត្តមាន និងជាកង្វល់ក្នុងពិភពលោកសព្វថ្ងៃ ៖
គ្រាលំបាក-- មានវត្តមាន ។ យើងរស់នៅក្នុងគ្រាមិនទៀងទាត់ ។
ស្រឡាញ់តែខ្លួនឯង ស្រឡាញ់ប្រាក់ និងអួតអាង--មានវត្តមានក្នុងចំណោមយើង ។
មានឫកខ្ពស់ ម្រមាថមើលងាយ មិនស្ដាប់បង្គាប់ឪពុកម្ដាយ រមិលគុណ មានចិត្តមិនបរិសុទ្ធ មិនស្រឡាញ់តាមធម្មតាមនុស្ស-- អ្វីៗទាំងអស់នេះមានយ៉ាងច្រើន ។
ពួកអាក្រក់ និងពួកឆបោក ជាដើម-- មានវត្តមាននៅជុំវិញយើងទាំងអស់គ្នា ។
មរ៉ូណៃ ក៏បាននិយាយអំពីអំពើទុច្ចរិតនៃជំនាន់យើងផងដែរ គាត់ព្រមានថា ៖
« កាលណាអ្នករាល់គ្នាឃើញការណ៍ទាំងនេះ កើតឡើងក្នុងចំណោមអ្នករាល់គ្នា ...អ្នករាល់គ្នាត្រូវភ្ញាក់រលឹកចំពោះស្ថានភាពដ៏ស្ញែងខ្លាចរបស់អ្នករាល់គ្នា ។ …
« ហេតុដូច្នោះហើយ ខ្ញុំមរ៉ូណៃ ត្រូវបានបញ្ជាឲ្យសរសេរនូវការណ៍ទាំងនេះ ដើម្បីឲ្យអំពើអាក្រក់ ត្រូវបាត់អស់ទៅ ហើយថាពេលវេលា នឹងមកដល់ដែលអារក្សសាតាំងពុំអាចមានអំណាចទៅលើដួងចិត្តនៃកូនចៅមនុស្សបានទេ ប៉ុន្តែពួកគេអាចត្រូវបានបញ្ចុះបញ្ចូលឲ្យធ្វើល្អពុំឈប់ឈរ ដើម្បីឲ្យពួកគេអាចមកដល់ប្រភពនៃអស់ទាំងសេចក្ដីសុចរិត និងបានសង្គ្រោះ » ។ 3
ការពិពណ៌នាដែលប៉ុល និងមរ៉ូណៃបានផ្ដល់ឲ្យជំនាន់យើង គឺត្រឹមត្រូវណាស់ ដែលពុំអាចបញ្ឈប់បាន ។ ត្បិតអ្វីៗទាំងនោះជាច្រើន អាចជាការរំខានខ្លាំង និងបាក់ទឹកចិត្តផងដែរ ។ ទោះជាយ៉ាងណា ពេលខ្ញុំគិតអំពីអនាគត ខ្ញុំបានរំជួលចិត្តនឹងអារម្មណ៍សុទិដ្ឋិនិយមជាវិជ្ជមាន ។
នៅក្នុងវិវរណៈរបស់ប៉ុល បន្ថែមទៅលើបញ្ហា និងឧបសគ្គនានា នោះគាត់ក៏បានប្រាប់យើងពីអ្វីដែលយើងអាចធ្វើ ដើម្បីការពារខ្លួនយើងដែរថា ៖
« ចូរឲ្យអ្នកនៅជាប់ក្នុងសេចក្ដីដែលអ្នកបានរៀន ហើយជឿប្រាកដវិញ ដោយដឹងថា អ្នកបានរៀនសេចក្ដីនោះពីអ្នកណា
« ហើយថា តាំងពីក្មេងតូចមក អ្នកបានស្គាល់បទគម្ពីរទាំងប៉ុន្មាន ដែលអាចនឹងនាំឲ្យអ្នកមានប្រាជ្ញាដល់ទីសង្គ្រោះ ដែលបានដោយសារសេចក្ដីជំនឿជឿដល់ព្រះគ្រីស្ទយេស៊ូវផង » ។ 4
បទគម្ពីរមានកូនសោដើម្បីបានការការពារខាងវិញ្ញាណ ។ វាមានគោលលទ្ធិ និងច្បាប់ និងពិធីបរិសុទ្ធនានា ដែលនឹងនាំកូនចៅម្នាក់ៗរបស់ព្រះឲ្យមានទីបន្ទាល់មួយអំពីព្រះយេស៊ូវគ្រីស្ទ ជាព្រះអង្គសង្គ្រោះ និងព្រះប្រោសលោះរបស់ពួកគេ ។
ដោយមានការរៀបចំអស់ជាច្រើនឆ្នាំ នោះមានការខិតខំយ៉ាងសន្ធឹកដើម្បីផលិតព្រះគម្ពីរនៅគ្រប់ភាសា ដែលមានលេខយោង និងសេចក្ដីយោង ។ យើងព្យាយាមធ្វើឲ្យមានសម្រាប់អស់អ្នកដែលចង់រៀន ។ វាបង្រៀនយើងថាត្រូវទៅកន្លែងណា និងត្រូវធ្វើអ្វី ។ វាផ្ដល់ក្ដីសង្ឃឹម និងចំណេះដឹង ។
ជាច្រើនឆ្នាំកន្លងទៅ អែលឌើរ អេស ឌិលវ៉ស្ស យ៉ាំង នៃពួកចិតសិបនាក់ បានបង្រៀនខ្ញុំនូវមេរៀនមួយអំពីការអានគម្ពីរ ។ ស្ដេកមួយមានបញ្ហាតានតឹង និងការលំបាកក្នុងចំណោមសមាជិក ហើយត្រូវផ្ដល់ការប្រឹក្សាជាចាំបាច់ ។
ខ្ញុំបានសួរប្រធាន យ៉ាំងថា « តើខ្ញុំគួរនិយាយអ្វីខ្លះ ?»
គាត់តបដោយសាមញ្ញថា « ប្រាប់ពួកគេឲ្យអានគម្ពីរ » ។
ខ្ញុំបានសួរ « បទគម្ពីរមួយណា ? »
គាត់និយាយថា « វាមិនសំខាន់ថាណាមួយទេ ។ ចូរប្រាប់ពួកគេឲ្យបើកគម្ពីរមរមន ឧទាហរណ៍ ហើយចាប់ផ្ដើមអាន។ មិនយូរប៉ុន្មានអារម្មណ៍សុខសាន្ដ និងការបំផុសគំនិតនឹងកើតមាន ហើយដំណោះស្រាយនឹងមានវត្តមានហើយ » ។
ធ្វើឲ្យការអានគម្ពីរជាផ្នែកមួយនៃទម្លាប់ទៀងទាត់របស់អ្នក នោះពរជ័យនឹងមកតាមក្រោយ ។ មានសម្លេងព្រមានក្នុងបទគម្ពីរ ប៉ុន្តែក៏មាននូវការចិញ្ចឹមបីបាច់ដ៏អស្ចារ្យផងដែរ ។
បើភាសានៃបទគម្ពីរមើលទៅចម្លែក ចំពោះអ្នកពេលដំបូង ចូរបន្ដអានវា ។ មិនយូរប៉ុន្មាន អ្នកនឹងទទួលស្គាល់ភាពស្រស់ស្អាត និងអំណាចដែលមាននៅលើទំព័រទាំងនោះ ។
ប៉ុលនិយាយថា « គ្រប់ទាំងបទគម្ពីរ គឺជាព្រះទ្រង់បានបញ្ចេញព្រះវិញ្ញាណបណ្ដាលឲ្យតែងទេ ក៏មានប្រយោជន៍សម្រាប់ការបង្រៀន ការរំឭកឲ្យដឹងខ្លួន ការប្រដៅតម្រង់ និងការបង្ហាត់ខាងឯសេចក្ដីសុចរិត » ។ 5
អ្នកអាចសាកល្បងការសន្យានេះដោយខ្លួនឯង ។
យើងរស់នៅក្នុងគ្រាលំបាក តែយើងអាចមានសង្ឃឹម និងភាពសុខសាន្ដសម្រាប់ខ្លួនយើង និងគ្រួសារយើង ។ អ្នកដែលរស់នៅក្នុងភាពសោកសៅ អស់សង្ឃឹមថាកូននឹងពុំអាចត្រូវបានសង្គ្រោះពីពិភពលោក មិនត្រូវចុះចាញ់ឡើយ ។ « កុំខ្លាចអី ឲ្យគ្រាន់តែជឿប៉ុណ្ណោះ » ។ 6 សេចក្ដីសុចរិត មានអំណាចជាងសេចក្ដីទុច្ចរិត ។
កុមារត្រូវបានបង្រៀនឲ្យយល់បទគម្ពីរតាំងពីក្មេង នឹងបានស្គាល់ផ្លូវ ដែលពួកគេគួរដើរ ហើយនឹងមានទំនោរបន្តស្ថិតនៅលើផ្លូវកាន់តែខ្លាំង ។ អ្នកដែលឃ្លាតចេញឆ្ងាយ នឹងអាចត្រឡប់មកវិញ ដោយមានជំនួយ នោះអាចរកឃើញផ្លូវមកវិញ ។
កូនប្រុសម៉ូសាយ បានទាស់នឹងសាសនាចក្រមួយរយៈ ប៉ុន្តែក្រោយមកបានប្រែចិត្ត ហើយមានការផ្លាស់ប្ដូរប្រកបដោយអានុភាព ។ នៅគម្ពីរអាលម៉ា យើងអានថា « ពួកបុត្រានៃម៉ូសាយទាំងនេះ …បានមាំមួននៅក្នុងការស្គាល់ពីសេចក្ដីពិត ព្រោះពួកគេជាមនុស្សដែលមានយោបល់ដ៏ជ្រាលជ្រៅ ហើយគេបានព្យាយាមពិចារណាមើលបទគម្ពីរ ដើម្បីឲ្យគេអាចស្គាល់ព្រះបន្ទូលនៃព្រះ » ។ 7
ប្រធាន យ៉ូសែប អេហ្វ ស៊្មីធ មានអាយុប្រាំឆ្នាំ ពេលឪពុកលោក ហៃរុម ត្រូវគេសម្លាប់នៅគុកកាតធេច ។ ក្រោយមក យ៉ូសែប បានធ្វើដំណើរឆ្លងកាត់ទីវាលជាមួយនឹងម្ដាយមេម៉ាយរបស់លោក ។
នៅអាយុ 15 ឆ្នាំ លោកត្រូវបានហៅឲ្យបម្រើបេសកកម្មរដ្ឋហាវ៉ៃ ។ គាត់មានអារម្មណ៍បាត់បង់ ឯកោ ហើយនិយាយថា ៖ « ខ្ញុំព្រួយចិត្តណាស់ ។ … ខ្ញុំមានអារម្មណ៍ដូចជាខ្ញុំអន់យ៉ាងខ្លាំងក្នុងស្ថានភាពនៃភាពក្រីក្រ ការខ្វះចំណេះដឹង និងប្រាជ្ញា ដែលជាក្មេងប្រុសម្នាក់ ខ្ញុំមិនហានមើល [គេ] ចំមុខទេ » ។
ពេលគិតអំពីការលំបាករបស់គាត់នៅយប់មួយ យុវជនយ៉ូសែប បានសុបិនឃើញថា គាត់ធ្វើដំណើរ យ៉ាងលឿនបំផុតតាមដែលអាចធ្វើទៅបាន ។ គាត់បានយួរបង្វិចតូចមួយ ។ ទីបំផុត គាត់បានមកដល់វិមានដ៏ស្អាតមួយ ដែលជាទិសដៅគាត់ ។ នៅពេលគាត់ចូលដល់ គាត់ឃើញសញ្ញាមួយថា « ងូតទឹក » ។ គាត់ប្រញាប់ចូលទៅ ហើយលាងជម្រះខ្លួន ។ គាត់បានបើកបង្វិចតូចគាត់ ហើយបានយកខោអាវស្អាត ពណ៌សមកពាក់ ។ គាត់និយាយថា « ខោអាវស្អាត ខ្ញុំពុំធ្លាប់បានឃើញជាយូរមកហើយ » ។ គាត់បានពាក់វា ហើយបានប្រញាប់ដើរចូលតាមទ្វារវិមាននោះ ។
គាត់និយាយថា « ខ្ញុំបានគោះទ្វា ហើយទ្វារបានបើកឡើង រួចមានបុរសម្នាក់ឈរនៅទីនោះ គឺព្យាការី យ៉ូសែប ស្ម៊ីធ ។ គាត់បានមើលមកខ្ញុំដោយតិះទៀនបន្ដិច ហើយនេះជាពាក្យដំបូងរបស់គាត់ [គឺ] ថា ៖ ‹ យ៉ូសែប អ្នកមកយឺតពេល › ។ ប៉ុន្តែខ្ញុំមានទំនុកចិត្ត រួចនិយាយថា ៖
«‹ មែនហើយ តែខ្ញុំស្អាតហើយ ខ្ញុំស្អាត ! ›» 8
យើងម្នាក់ៗក៏អាចដូច្នោះដែរ ។
បើអ្នកចាប់ផ្ដើមនៅលើផ្លូវនៃជំនឿ និងសកម្មភាពក្នុងសាសនាចក្រ ចូរស្ថិតនៅលើផ្លូវ ហើយរក្សាសេចក្ដីសញ្ញារបស់យើង ។ ចូរបន្ដទៅមុខ រហូតដល់ពេលដែលពរជ័យព្រះអម្ចាស់ នឹងកើតមានដល់អ្នក ហើយព្រះវិញ្ញាណបរិសុទ្ធ នឹងត្រូវបើកសម្ដែង ជាកម្លាំងចលករមួយនៅក្នុងជីវិតរបស់អ្នក ។
បើឥឡូវអ្នកនៅលើផ្លូវមួយដែលនាំចេញពីផ្លូវដែលបានគ្រោងនៅក្នុងគម្ពីរ ខ្ញុំសូមអះអាងនឹងអ្នកថា មានផ្លូវត្រឡប់មកវិញ ។
ព្រះយេស៊ូវគ្រីស្ទ បានដាក់វិធីសាស្ត្រដ៏ច្បាស់មួយសម្រាប់យើង ឲ្យប្រែចិត្ត ហើយរកការព្យាបាលក្នុងជីវិតយើង ។ ការព្យាបាលកំហុសភាគច្រើន អាចរកបាន តាមការស្វែងរកការអភ័យទោស តាមរយៈការអធិស្ឋានផ្ទាល់ខ្លួន ។ ទោះជាយ៉ាងណា មានជំងឺខាងវិញ្ញាណជាក់លាក់ ជាពិសេសអ្នកទាំងឡាយដែលជាប់ទាក់ទងនឹងការបំពានច្បាប់សីលធម៌ ដែលតម្រូវឲ្យមានជំនួយ និងការព្យាបាលពីពេទ្យខាងវិញ្ញាណដែលជំនាញ ។
ជាច្រើនឆ្នាំកន្លងទៅ យុវនារីនិងឪពុកចាស់នាង បានមកការិយាល័យខ្ញុំ ។ នាងបាននាំគាត់មកពីចម្ងាយ ដើម្បីស្វែងរកថ្នាំព្យាបាលវិប្បដិសារីដែលគាត់មាន ។ កាលពីក្មេង គាត់បានសាងកំហុសធំមួយ ហើយពេលគាត់ចាស់ការចងចាំនេះបានប្រាកដឡើង ។ គាត់ពុំអាចជម្រុះអារម្មណ៍ខុសឆ្គងនោះចេញទេ ។ គាត់ពុំអាចត្រឡប់ថតក្រោយ កែបញ្ហាពីយុវវ័យគាត់បានទេ ប៉ុន្តែគាត់អាចចាប់ផ្ដើមត្រង់ចំនុចដែលគាត់មាន ហើយលុបលាងកំហុសដែលនៅនឹងគាត់ ជាច្រើនឆ្នាំនោះ ដោយជំនួយ ។
ខ្ញុំមានអំណរគុណ ដែលតាមរយៈការបង្រៀនដល់គាត់ ពីគោលការណ៍ចេញពីគម្ពីរមរមន វាជាការដកបន្ទុកដ៏ធ្ងន់ចេញពីស្មារបស់គាត់ ។ នៅពេលគាត់ និងកូនស្រី ត្រឡប់ទៅផ្ទះវិញ បុរសចំណាស់នោះ បានទុកចោលកំហុសនៃការរំលងពីអតីតកាលរបស់គាត់ ។
បើអ្នក « ត្រូវភ្ញាក់រលឹកចំពោះស្ថានភាពដ៏ស្ញែងខ្លាចរបស់អ្នករាល់គ្នា » 9 ហើយចង់ត្រឡប់មកមានសុខភាពល្អខាងវិញ្ញាណពេញលេញ សូមទៅជួបប៊ីស្សពអ្នក ។ គាត់កាន់កូនសោ ហើយអាចជួយអ្នកតាមផ្លូវនៃការប្រែចិត្តបាន ។
ការប្រែចិត្ត គឺជារឿងបុគ្គល ហើយក៏ដូចជាការអភ័យទោសដែរ ។ ព្រះអម្ចាស់ តម្រូវឲ្យមនុស្សងាកចេញពីអំពើបាបពួកគេតែប៉ុណ្ណោះ ហើយ « [ទ្រង់] នឹងអត់ទោសចំពោះអំពើទុច្ចរិតពួកគេ ... ហើយនឹងលែងនឹកចាំពីអំពើបាបគេជាដរាបទៅ » ។ 10
ពេលដំណើរការនៃការប្រែចិត្តបញ្ចប់ហើយ អ្នកនឹងបានយល់អត្ថន័យការសន្យារបស់អេសាយ អំពីដង្វាយធួន ៖ « មកចុះយើងនឹងពិភាក្សាជាមួយគ្នា ៖ ទោះបើអំពើបាបរបស់ឯង ដូចជាពណ៌ក្រហមទែង ក៏ដោយ គង់តែនឹងបានសដូចហិមៈ ទោះបើក្រហមឆ្អៅក៏ដោយ គង់តែនឹងបានដូចជារោមចៀមវិញ »។ 11
ក៏ដូចជាដីសអាចលុបចេញពីក្ដារខៀន ដូច្នេះការប្រែចិត្តដោយស្មោះពីឥទ្ធិពលនៃការរំលងយើង អាចត្រូវបានលុបតាមរយៈដង្វាយធួនព្រះយេស៊ូវគ្រីស្ទ ។ ការសន្យានោះអនុវត្តគ្រប់ករណី ។
ដំណឹងល្អ បង្រៀនយើងឲ្យសប្បាយ ឲ្យមានជំនឿជាជាងភ័យខ្លាច ឲ្យរកក្ដីសង្ឃឹម និងឈ្នះលើការអស់សង្ឃឹម ចាកចេញពីភាពងងឹត ហើយងាកទៅរកពន្លឺនៃដំណឹងល្អដ៏អស់កល្ប ។
ប៉ុល និងអ្នកដទៃទៀត បានព្រមានអំពីការសាកល្បងនៃជំនាន់យើង និងជំនាន់ក្រោយៗ ។ ប៉ុន្ដែសេចក្ដីសុខសាន្ដ អាចតាំងនៅក្នុងចិត្តនៃមនុស្សម្នាក់ៗដែលងាកមករកគម្ពីរ ហើយទទួលបានការសន្យានៃការការពារ និងការប្រោសលោះដែលត្រូវបានបង្រៀនក្នុងនោះ ។ យើងសូមអញ្ជើញមនុស្សទាំងអស់ឲ្យមករកព្រះអង្គសង្គ្រោះ ព្រះយេស៊ូវគ្រីស្ទ មករកការបង្រៀនទ្រង់ ដូចមានក្នុងគម្ពីរសញ្ញាចាស់ គម្ពីរសញ្ញាថ្មី គម្ពីរមរមន គោលលទ្ធិនិងសេចក្ដីសញ្ញា និងមុក្ដាដ៏មានតម្លៃមហិមា ។
ខ្ញុំធ្វើជាសាក្សីពិតនៃព្រះគម្ពីរថា ជាកូនសោមួយទៅរកការការពារខាងវិញ្ញាណ ។ ខ្ញុំក៏ថ្លែងជាសាក្សីអំពីអំណាចនៃការព្យាបាលនៃដង្វាយធួនរបស់ព្រះយេស៊ូវគ្រីស្ទ «តាមរយៈព្រះអង្គមនុស្សទាំងអស់ នឹងបានសង្គ្រោះ » 12 ជាមនុស្សដែលត្រូវបានសង្គ្រោះ ។ សាសនាចក្ររបស់ព្រះ ត្រូវបានស្ថាបនាឡើងវិញនៅលើផែនដី ។ ខ្ញុំថ្លែងជាសាក្សីពីភាពពិតនៃដំណឹងល្អ ។ ខ្ញុំជាសាក្សីទ្រង់ ។ ក្នុងព្រះនាមនៃព្រះយេស៊ូវគ្រីស្ទ អាម៉ែន ។