Ewe Angangen Achasefani
Ua pwarata pwe kinamwen ngun a annonno ngeni Kot pwan ekkewe ekkoch epwe esenipato rech ika pwe sia mosonoson me pochokun ngeni ne achocho ngeni.
Non ewe April, Preseten Russell M. Nelson a affata usun ewe kokkotun iamwir pwe epwe ew aanen ach aneasochisi ekkewe annuk mi nap ne tongei Kot me tong fengen nefinach.1 Sopweno ami angang mi murino oua fen poputani ne tapweno mwirin nouch we soufos non ei angang, me ousap awitiwiti pwan ekkoch aurour. Oupwe chok mwetenon non ewe konik me aa ngeni ekkewe mi mochen ami aninis. Ousap chok mwoch ren ami aureki ika oupwe aaseneta ika aamunumun. Ika sipwe fori ekkei nongonong sia fen kaeo, sipwe chok nomengeni ekkewe kiien pristut, me kutta ewe Ngun mi Fel epwe emweni kich, sise tongeni tur.
Non ei soran ua mochen kapas usun ew kinikinin iamwir mi kon wewe ngeni emon me emon ewe esap ren pekin wis, esap wor interfiu mi kokkot, me esap wor kapasen repot tiwenon chok ngeni nang.
Grant Morrel Bowen I emon mi angang weires, emon mwan pupunu me sam ewe, usun chommong ra manau seni ewe fonu, a osukosuk ren pekin moni nupwen ataken pweteto non ewe neni ese naf. I me punuwan we, Norma, ra pwan fori ekkoch angang, mwirin ra no ngeni pwan ew sopw, me poputa sefan ne wor nour moni. Nge, non ew fansoun mi chefono, Brother Bowen a fokkun netipengaw nupwen, non ew interfiun mumuta non tempel, ewe pisop a tipemwaramwar usun an Morrel apasa pwe i emon mi ounusa an ew ne engon.
Use sinei menni nein ekkei ruemon mwan a kon pung non ena ran, nge ngang mi sinei pwe Sister Bowen a tou seni ena interfiu fiti noun toropwen mumuta non tempel mi forsefan, nge Brother Bowen a tou ren an song minne mi atowawano I seni ewe Mwichefen non 15 ier.
Ina mwo ese fat ika ion mi pung usun ewe ew ne engon, mi fat pwe Morrell me ewe pisop ra monnuki usun an ewe Chon Amanau fon ne mwitir tipew ngeni ewe chon koum2 me an Paul aurour “ousap annomu ami song unusen ewe ran.”3 Pungun pwe rese tipew iwe ewe akkar a tuputiw won an Brother Bowen song non chommong ran, mwirin wik, mwirin ier, a apungano met emon ekkewe chon Rome me nom mi mirit a apasa, “Song, ika sise aukatiw, epwe nap an [kata] seni ewe feiengaw a poputani.”4 Nge ewe manamanen achasefani mi tufich ngeni kich fansoun meinisin, iwe pokiten an tongei an famini me ewe Mwichefen mi sinei pwe mi ennet. Morrel Bowen a pochokun sefan non ewe Mwichefen. Upwe mwitir urenikemi ifa usun a fis.
Noun Brother Bowen we itan Brad i chiechiem me emon ekkewe Area Fik a angang non eorun Idaho. Brad a chok 11 ierin non ewe fansoun ewe osukosuk a fis, iwe ukukun 15 ier a kuna an seman we nikitu ngeni namanam a kisitiw, a kuna met a fis ngeni ar famini pokiten ewe songen wewengaw. Mi auchea och mettoch epwe fis. Iwe nupwen Thanksgiving a arapeto non 1977, Brad, a 26 ierin i emon chon sukun non Brigham Young University; punuwan we, Valerie; me nour at monukon, Mic, ra amwosowa war we mi mokukun me, ina mwo mi raningaw ra sa ngeni Billings, Montana. Esap mwo pwan ar purei ew chukuchukun snow arap ngeni West Yellowstone epwe aukano ei famini seni ar repwe iamwir ngeni Brother Bowen Sr.
Nupwen ra too, Brad me fefinan we Pam ra tingor repwe kapas ngeni semer we. “En emon sam mi amwarar papa,” Brad a poputa fiti uren netip, “me am mi sinei ukukun om tongeikem. Nge och mettoch mi muan me a fen fis non fansoun nangatam. Pokiten ka fen netipengaw fan ew, unusen ei famini a riaffou non chommong ier. Sia tatakis, me en chok ka tongeni forsefani kich. Kose mochen, mwirin ekkei fansoun, kopwe tongeni mefi non netipom ne nikitano ewe fansoun netipengaw a fis ren ewe pisop me poputa sefan ne emweni ei famini non ewe kapas allim usun ka fen fori akkom?”
A wor unusen fanafaneno. Mwirin Brother Bowen a faneta ne nenengeni ekkei ruemon, ami chuu seni chuu kei o futuk seni futukei,5 me a apasa non pwetete, “Ewer. Ewer, upwe fori.”
Pwapwa nge mairu ren ponuwan mi weiweita, Brad Bowen me an famini ra katon punuwan me semer we a no ren nour we pisopun na fansoun non tipen achasefan an epwe apungu mettoch non manauan. Non ponuwan mi echipwer ngeni ei amwa mi pwaracho me weiweita, ewe pisop minne mi kan soun tingorei Brother Bowen epwe niwinsefan ngeni ewe Mwichefen a turufano Brother Morrell me a foropacheno non fansoun nangatam.
Non chok ekkoch wik, Brother Bowen a unusen nikitu sefan non mwokutukutun Mwichefen me fori epwe pwisin nimenimoch ne niwin ngeni ewe tempel. Mwirin a etiwa ewe wis ne nemenem won ew pranchin 25 mi apwangapwang me amarano ngeni ew mwicheich mi nap seni 100. Ekkei meinisin a fis arap ngeni nime ier a no, nge pungun an emon nau me itera iamwir ngeni pwisin semer me an ena sam mochen omusano me feino mwan me nukun unusengawen ekkoch a wato feioch minne mi chiwen fis ngeni ewe faminien Bowen.
Pwii me fefinei, Jises a fen tingor pwe sipwe nom fengen non tong6 “esap wor anini fengen nefinemi”7 “I ewe a wor ren ewe ngunun anini i ese feito seniei,” A fonou ekkewe Chon Nifai.8 Ennetin, ren ew napanap, nefinach ngeni Kraist epwe pungupung—ika fen chung—ren nefinach fengen.
“Ika oupwe…mochen feito rei,” A apasa, “me chechemeni pwe pwiumi mi ungenikemi
“Feino ngeni pwium, me akkom fori kapasen affor ngeni [i] iwe mwirin feito rei fiti unusen netip iwe upwe etiwakemi.”9
Ennetin emon me emon kich mi tongeni apasa chommongun me sokofesenin feiengawach me nom me netipechou me achem mi ametek pwe non ei chok fansoun mi chiwen atano ewe kinamwe non netipen emon ika famini ika chon oruch. Ika mwo kich chon efisi ena metek are chon angei, mi auchea ekkena kinas repwe chikar pwe manau epwe menemenoch usun Kot a mochen. Usun ekkewe mwongo non ami we aispox noun noumi kewe ra kan cheki fanitemi, a fen nuno fansoun ren ami ousap mut ngeni ekkei tipengawen nom repwe chiwen achungu kemi me ekkoch. Ouse mochen ousap chiuwen asonapa tufichin ngunumi ren ekkei mettoch mi weires. Usun Prospero a apasa ngeni ewe mi netipengaw Alonso non The Tempest “Sisap chiwen ariaffoua ach ekiek ren weiresin nom a fen no.”10
“Oupwe amusano, pun oupwe musuno,”11 Kraist a aitikich non ewe Afanafan me won ewe Chuk. Non ach fansoun, ewe Samon a apasa I epwe omusano ion I epwe omusano, nge mi namot kich sipwe omusano aramas meinisin.12 Nge mi auchea ngeni ami ekkewe mi mefi ennetin riaffou ami oupwe ekieki met I ese apasa. I ese apasa, “Ouse mumuta ne mefi ennetin metek ika ennetin netipechou seni ekkewe mettoch mi efeiengaw pokiten pwan emon aramas.” Ese pwan apasa, “Ren om kopwe unusen omusano kopwe sopweno nefinom we me emon mi ngaw are niwin ngeni nonnomun we mi efeiengaw me tatakis. Nge inamo ika ewe turunufas mi nap epwe fis, kich mi tongeni akkufu ach metek ika sipwe wata pechech won ewe aanen ennetin chikar. Ena aan ina ewe aanen omusano Jises seni Nazareth a fetanei, ewe a kokko ngeni kich, “Kopwe tapweto muri.”13
Ren ei tingor ach sipwe Noun chon kuno me achocho ne fori usun I a fori, Jises a tingor pwe sipwe chon uwei An chen—sipwe chon tupuni Kraist non ewe angangen achasefani, usun Paul a wewei ngeni ekkewe chon Corinth.14 Ewe Chon Echikaren kinas meinisin, I ewe a apungu muan meinisin, a tingor sipwe angang ren I non ewe weiresin angangen fori kinamwe non ew fonufan esap kuna non ew pwan napanap.
Iwe, usun Phillips Brooks a makkei: “Ami ekkewe oua mut ngeni riaffoun wewengaw epwe soposopono seni ier me ier, oua ekieki pwe oupwe awesano non ew ran, ami ekkewe oua chok anini fengen pokiten ouse tongeni finata pwe iei ewe ran oupwe fangeta ami sikaseni me awesireno; ami ekkewe oua passini aramas won ewe aan non ami rochongaw ouse kapas ngenir ren ami mochen efeiengawer … ; oua mut ngeni emon mi riaffou an esap mefi kinisou ika tong, minne ita oupwe ngenir … mwitir feino me fori ekkewe mettoch menin esap wor pwan ew fansoun oupwe fori.”15
Pwii me fefinei achengicheng, Ua pwarata pwe omusano me monnuki ach song, minen nom ika minafo, ina ionapen ewe Achasefan mi nap an Jises Kraist. Ua pwarata pwe amuchunon ei sokkun echikaren ngun a chok tongeni fis seni ach Chon Angasano seni nang, I epwe mwitir ngeni aninisich “fiti pochokunen echikar non poun.”16 Sia kinisou ngeni, me Semach won Nang ewe a tinato I, pwe minafo sefan me upusefan, ew ranin mwach mi ngas seni netipechoun nom me muanin akkom, rese chok tufich nge ra fen fis me moni ren niwinin me ametek minne mi esisin me ren chan ewe Nam ewe a asuku.
Ren ewe mumuta a kawor ngeniei me ren ewe Chon Amanauen ewe fonufan, ua pwarata usun ewe kinamwe ngeni ewe ngun pwe achasefan ngeni Kot me ngeni emon me emon epwe wato ika sipwe mosonoson me pwaracho ne kutta. Wesino ne aninifengen.17 Ika ami mi sinei usun och feiengawen nom, forsefani. Oupwe tumun fengen non tong.
Chiechiei achengicheng, non ach aea fengen angangen achasefani ua tingorei kemi pwe oupwe chon fori kinamwe. Ua fori ei tingor non iten ewe Princen Kinamwe, ewe mi sinei mettoch meinisin usun nimenimoch me an ese nom fan pungoch, usun tipemwan me an “kinas me non imwen chienan”18 nge mi chok tongeni me mochen omusano me monnuki—me echikara, pwan mwo ewe Samon Jises Kraist, amen.