Il-Kworum: Post ta’ Appartenenza
Il-Mulej iridkom tistabbilixxu kworum b’saħħtu. Hekk kif Huwa jiġbor lil wliedu, huma jeħtieġu post li jistgħu jappartenu u jikbru fih.
Fl-2010, Andre Sebako kien għadu daqsxejn ta’ żagħżugħ qed ifittex il-verità. Minkejja li huwa qatt qabel ma kien talab minn qalbu, huwa ddeċieda li jipprova jagħmel dan. Ftit tal-ħin wara, huwa ltaqa’ mal-missjunarji. Huma tawh kard bi stampa tal-Ktieb ta’ Mormon. Andre ħass xi ħaġa ġewwa fih u staqsa lill-missjunarji jekk huwa setax jixtri dak il-ktieb. Huma qalulu li huma setgħu jagħtuh kopja b’xejn tal-ktieb jekk huwa jattendi l-knisja.1
Andre attenda waħdu l-Fergħa ta’ Mochudi li kienet għadha kif ġiet iffurmata ġewwa Botswana, l-Afrika. Iżda l-fergħa kienet magħmula minn grupp ta’ nies mill-aktar magħqudin u kollhom imħabba, li b’kollox kienu xi 40 membru.2 Huma laqgħu lil Andre b’dirgħajhom miftuħa. Huwa rċieva l-lezzjonijiet tal-missjunarju u tgħammed. Kienet ħaġa mill-aktar meraviljuża!
Iżda mbagħad? Andre kif seta’ jibqa’ attiv? Min kien se jgħinu jibqa’ miexi ‘l quddiem fit-triq tal-patt? Tweġiba waħda għal dik il-mistoqsija hija l-kworum tiegħu tas-saċerdozju!3
Kull raġel li jħaddan is-saċerdozju, hi x’inhi s-sitwazzjoni tiegħu, jibbenifika minn kworum b’saħħtu. Intom iż-żgħażagħ ħuti li tħaddnu s-Saċerdozju Aroniku, il-Mulej iridkom tistabbilixxu kworum b’saħħtu, post ta’ appartenenza għal kull ġuvni, post fejn l-Ispirtu tal-Mulej ikun preżenti, post fejn il-membri kollha tal-kworum jiġu milqugħin u apprezzati. Hekk kif il-Mulej jiġbor lil wliedu, huma jeħtieġu post li jistgħu jappartenu u jikbru fih.
Intom il-membri kollha tal-presidenza tal-kworum tistgħu turu t-triq lill-oħrajn hekk kif intom tfittxu l-ispirazzjoni4 u tiżviluppaw l-imħabba u l-fratellanza bejn il-membri tal-kworum. Intom tistgħu turu attenzjoni speċjali lil dawk li huma membri ġodda, li huma anqas attivi jew li għandhom bżonnijiet speċjali.5 Bil-qawwa tas-saċerdozju, intom tistgħu tibnu kworum b’saħħtu.6 U kworum b’saħħtu u magħqud jagħmel id-differenza kollha fil-ħajja ta’ żagħżugħ.
Meta l-Knisja ħabbret l-inizjattiva ġdida fuq it-tagħlim tal-evanġelju ċċentrata madwar id-dar,7 xi wħud ġew f’moħħhom membri bħal Andre u qalu, “Xi ngħidu għal dawk iż-żgħażagħ li ġejjin minn sitwazzjoni ta’ familja li fiha ma jiġix studjat l-evanġelju u li m’hemmx ambjent ta’ tagħlim u li jwassal biex wieħed jgħix l-evanġelju ġewwa d-dar? Dawn se ninsewhom?”
Le! Le lil ħadd m’għandna ninsew! Il-Mulej iħobb lil kull ġuvni u tfajla. Aħna, bħala rġiel li nħaddnu s-saċerdozju, aħna jdejn il-Mulej. Aħna l-Knisja li se tkun qed tissapportja din l-inizjattiva ċċentrata madwar id-dar. Meta fid-dar ikun hemm sapport limitat, il-kwora tas-saċerdozju u mexxejja u ħbieb oħra għandhom iħarsu u jissapportjaw lill-individwi u lill-familji skont il-bżonn.
Din il-ħaġa rajtha taħdem b’għajnejja. Esperjenzajtha. Meta jien kelli sitt snin, il-ġenituri tiegħi ddivorzjaw u missieri ħalla lil ommi b’ħamest itfal. Ommi kellha tibda taħdem biex tipprovdi għalina. Għal xi żmien, hija kellha bżonn li taħdem it-tieni impjieg, kif ukoll tkompli tistudja. Ftit kien ikun baqgħalha ħin biex trabbi lilna. Iżda n-nanniet u z-zijiet tiegħi, l-isqfijiet u l-għalliema tad-dar kienu raw kif għamlu biex jgħinu lill-anġlu ommi.
U jiena kelli kworum. Jiena verament grat għal sħabi—ħuti—li ħabbewni u ssapportjawni. Il-kworum tiegħi kien post ta’ appartenenza. Jista’ jkun li xi wħud setgħu kienu jħarsu lejja bħala wieħed li ftit li xejn stajt nirnexxi u forsi anke bħala bniedem dgħajjef minħabba s-sitwazzjoni tal-familja tiegħi. Jista’ jkun li kien il-każ. Iżda l-kwora tas-saċerdozju spiċċaw biex bidlu s-sitwazzjoni tiegħi. Il-kworum tiegħi ħa ħsiebi u berikli ħajti bla qjies.
Madwarna żgur li għandna nies li forsi diffiċli jirnexxu u li huma xi ftit dgħajfin. Probabbilment, b’xi mod jew ieħor, ilkoll kemm aħna nistgħu niġu deskritti hekk. Iżda lkoll għandna kworum, post li fih nistgħu nirċievu l-qawwa u nipprovdu l-qawwa. Il-kworum hu “kollha għal wieħed u wieħed għal kollha.”8 Huwa post li fih ngħallmu lil xulxin, inservu lil xulxin u nibnu l-għaqda u l-fratellanza hekk kif aħna nservu lil Alla.9 Huwa post li fih iseħħu l-mirakli.
Nixtieq inkellimkom dwar xi wħud mill-mirakli li seħħew fil-kworum ta’ Andre ġewwa Mochudi. Hekk kif jien se naqsam magħkom dan l-eżempju, oqogħdu attenti dwar xi prinċipji li jistgħu jsaħħu lil kwalunkwe kworum tas-saċerdozju li japplikahom.
Wara li Andre tgħammed, huwa akkumpanja lill-missjunarji hekk kif huma bdew jgħallmu lil erba’ ġuvintur oħra, li tgħammdu wkoll. Mela issa kien hemm ħames ġuvintur. Huma bdew isaħħu lil xulxin u lill-fergħa.
Ġuvni ieħor, Thuso, is-sitt wieħed, tgħammed ukoll. Thuso qasam l-evanġelju ma’ tlieta minn sħabu, u ma damux ma spiċċaw disgħa.
Ħafna drabi d-dixxipli ta’ Ġesù Kristu jinġabru b’dan il-mod—ftit ftit, kif jiġu mistiedna minn sħabhom. Fi żmien il-qedem, meta Indri sab lis-Salvatur, huwa mar jiġri fuq ħuh Xmun u “ħadu għand Ġesù.”10 Bl-istess mod, wara li Filippu sar dixxiplu ta’ Kristu, huwa stieden lil sieħbu Natanjel u qallu “ejja u ara.”11
Ġewwa Mochudi, ma damx ma ngħaqad ukoll mal-Knisja l-10 raġel. Il-missjunarji sabu l-11-il wieħed. U t-12-il ġuvni tgħammed wara li ra x’ effett ħalla fuq sħabu l-evanġelju.
Il-membri tal-fergħa ta’ Mochudi mtlew bl-entużjażmu. Dawn il-ġuvintur “ikkonvertew fil-Mulej, u … ngħaqdu mal-knisja.”12
Il-Ktieb ta’ Mormon lagħab irwol mill-aktar sinifikanti fil-konverżjoni tagħhom.13 Thuso jiftakar, “Jiena bdejt naqra l-Ktieb ta’ Mormon … kull meta kien ikolli ċans, fid-dar, fl-iskola u kullimkien.”14
Oratile ħassu jinġibed lejn l-evanġelju minħabba l-eżempju ta’ sħabu. Huwa spjega: “Bħallikieku huma nbidlu f’ ħakka t’għajn. … Ħsibt li r-raġuni … ta’ dan kollu kien … il-ktieb żgħir li huma bdew iġorru magħhom madwar … l-iskola. Stajt nara kemm kien saru nies twajbin. … Jien ukoll ridt ninbidel.”15
Dawn it-12-il ġuvni nġabru flimkien u tgħammdu fi spazju ta’ sentejn. Kull wieħed minnhom kien l-uniku membru fil-familja tiegħu. Iżda huma kellhom is-sapport tal-familja tagħhom fil-Knisja, fosthom il-President Rakwela,16 il-president tal-fergħa tagħhom; il-Presbiteru u Sister Taylor,17 il-koppja missjunarji anzjani; u membri oħra tal-fergħa.
Brother Junior,18 mexxej tal-kworum, stieden lil dawn il-ġuvintur f’daru nhar ta’ Ħadd wara nofsinhar u ħa ħsiebhom. Il-ġuvintur studjaw flimkien l-iskrittura u kienu jagħmlu regolarment il-lejla d-dar.
Brother Junior ħadhom miegħu biex iżuru lill-membri, lil nies li kienu jkunu qed jiġu mgħallmin mill-missjunarji, u lil kull min kien jeħtieġ xi żjara. Kull wieħed minn dawn it-12-il ġuvni kien jitla’ fil-gabina tal-vann ta’ Brother Junior. Huwa kien iwassalhom fid-djar fi gruppi ta’ tnejn jew tlieta u jerġa’ jiġborhom aktar tard.
Minkejja li dawn il-ġuvintur kienu għadhom qed jitgħallmu dwar l-evanġelju u kienu jħossu li kienu għadhom ma jafux biżżejjed, Brother Junior qalilhom biex huma jaqsmu magħhom xi ħaġa jew tnejn li huma kienu jafu. Dawn il-ġuvintur li kienu jħaddnu s-saċerdozju għallmu, talbu u għenu jħarsu l-Knisja.19 Huma wettqu r-responsabbiltajiet tagħhom tas-saċerdozju u esperjenzaw il-ferħ ta’ meta wieħed iservi.
Andre qal, “Aħna lgħabna flimkien, dħaqna flimkien, bkejna flimkien u sirna fratellanza.”20 Fil-fatt, huma kienu jsejħu lilhom infushom “il-Grupp ta’ Aħwa.”
Flimkien huma fasslu għan li lkoll kemm huma kienu se jservu missjoni. Peress li huma kienu l-uniċi membri tal-Knisja fil-familji tagħhom, huma kellhom diversi ostakli x’ jegħlbu, iżda huma għenu lil xulxin qalb dan kollu.
Wieħed wieħed, dawn il-ġuvintur irċevew is-sejħa tagħhom tal-missjoni. Dawk li telqu l-ewwel kitbu ittri indirizzati għal dawk li kienu għadhom qed jitħejjew, fejn qasmu magħhom ċerti esperjenzi u inkuraġġewhom biex iservu. Ħdax minn dawn il-ġuvintur servew missjoni.
Dawn il-ġuvintur qasmu l-evanġelju mal-familji tagħhom. Ommijiet, aħwa, ħbieb, kif ukoll nies li huma għallmu waqt il-missjoni tagħhom spiċċaw biex ikkonvertew u tgħammdu. Seħħew il-mirakli u ġew imberkin għadd ta’ ħajjiet.
Nista’ nimmaġina xi wħud minnkom tgħidu li forsi mirakli bħal dawn setgħu jseħħu biss f’xi post bħall-Afrika, art fertili fejn il-ġabra ta’ Iżrael qed isseħħ b’ritmu mgħaġġel. Madankollu, jiena nixhed li l-prinċipji li ġew applikati ġewwa l-Fergħa ta’ Mochudi jistgħu jiġu applikati kullimkien. Tinsabu fejn tinsabu, il-kworum tagħkom jista’ jikber permezz tal-attivazzjoni u billi taqsmu l-evanġelju ma’ ħaddieħor. Meta saħansitra dixxiplu wieħed jipprova jilħaq ħabib, wieħed jista’ jsir tnejn. Tnejn jistgħu jsiru erbgħa, Erbgħa jistgħu jsiru tmienja. U tmienja jistgħu jsiru tnax. Il-fergħat saru oqsma.
Is-Salvatur għallem, “Għax fejn tnejn jew tlieta jkunu miġbura f’ismi, … hemm inkun jien f’nofshom.”21 Missierna tas-Smewwiet qed iħejji l-imħuħ u l-qlub tan-nies ta’ madwarna. Aħna nistgħu nimxu wara s-suġġerimenti, nestendu l-id tal-ħbiberija, naqsmu magħhom il-verità, nistednuhom biex jaqraw il-Ktieb ta’ Mormon, inħobbuhom u nissapportjawhom hekk kif huma jsiru jafu lis-Salvatur tagħna.
Għaddew kważi 10 snin minn meta l-Grupp ta’ Aħwa minn Mochudi bdew il-vjaġġ tagħhom flimkien, u huma għadhom grupp ta’ aħwa.
Katlego qal, “Jista’ jkun li ninsabu mifrudin minn xulxin minħabba d-distanza ta’ bejnietna, iżda xorta waħda ninsabu lesti biex ngħinu lil xulxin.”22
Hija t-talba tiegħi li aħna naċċettaw l-istedina tal-Mulej biex ningħaqdu Miegħu fil-kwora tagħna tas-saċerdozju ħalli kull kworum ikun jista’ jkun post ta’ appartenenza, post ta’ ġabra, post li jikber.
Ġesù Kristu huwa s-Salvatur tagħna, u din hi l-ħidma Tiegħu. Jiena nixhed dan f’ isem Ġesù Kristu, amen.