Ħarsu lejn Ġesù Kristu
Jekk aħna nħarsu lejn Ġesù Kristu, Huwa jgħinna ngħixu l-patti tagħna u jkabbar is-sejħa tagħna bħala presbiteri f’ Iżrael.
Hekk kif Ġesù kien miexi fi triq qrib Kafarnahum1 b’folla kbira nies madwaru, waħda mara li kienet ilha tbati minn kundizzjoni serja għal 12-il sena marret fuqu u misset it-tarf tal-libsa Tiegħu. Hija fieqet mill-ewwel.2
L-iskrittura tgħid li Ġesù, konxju “li kienet ħarġet qawwa minnu,”3 “dar lejn il-kotra”4 u “beda jħares … biex jara jilmaħx lil dik li kienet għamlet dan.”5 “Il-mara, meta rat li ma setgħetx tinħeba,”6 “nxteħtet f’riġlejh u stqarritlu s-sewwa kollu.”7
Ġesù qalilha, “Agħmel il-qalb, binti: il-fidi tiegħek salvatek; mur bis-sliem.”8
Ġesù Kristu salva lil din il-mara. Hija fieqet fiżikament, iżda meta Ġesù dar lejha, hi ddikjarat il-fidi tagħha fih u Huwa fejqilha qalbha.9 Huwa kellimha b’imħabba, aċċertaha mill-approvazzjoni Tiegħu u berikha bis-sliem Tiegħu.10
L-aħwa, bħala nies li nħaddnu s-saċerdozju mqaddes, aħna ingaġġati fil-ħidma tas-salvazzjoni. Is-sena li għaddiet, il-Mulej għadda t-tmexxija ewlenija ta’ din il-ħidma f’idejn il-presbiteri f’Iżrael.11 Aħna ġejna mogħtija responsabbiltà ispirata mingħand il-Mulej—f’ħidma waħda ma’ ħutna n-nisa, aħna għandna nimministraw b’mod aktar qaddis, naħdmu b’urġenza akbar għall-ġabra ta’ Iżrael fuq iż-żewġ naħat tal-velu, nistabbilixxu djarna bħala santwarji ta’ fidi u tat-tagħlim tal-evanġelju, u nħejju d-dinja għat-Tieni Miġja ta’ Ġesù Kristu.12
Bħal f’kull ħaġa oħra, is-Salvatur uriena t-triq: jeħtieġ li aħna nħarsu lejn Ġesù Kristu u nservuh kif Huwa ħares lejn Missieru u servieh.13 Dan hu kif is-Salvatur iddeskriva dan lill-Profeta Joseph:
“Ħares lejja f’kull ħsieb; tiddubitax, tibżax.
“Ara l-ġrieħi li nifdu ġenbejja, u wkoll il-marki tal-imsiemer f’idejja u f’riġlejja; ibqa’ fidil, żomm il-kmandamenti tiegħi, u inti għandek tiret is-saltna tas-smewwiet.”14
Fir-renju primortali Ġesù wiegħed lil Missieru li Hu kien sejjer jagħmel ir-rieda ta’ Missieru u jkun is-Salvatur u l-Feddej tagħna. Meta Missieru staqsa, “Lil min se nibgħat?”15 Ġesù wieġeb:
“Hawn jien, ibgħat lili.”16
“Missier, ikun li trid int, u l-glorja tkun tiegħek għal dejjem.”17
Tul il-ħajja mortali Tiegħu, Ġesù għex dik il-wegħda. B’umiltà, bil-ħlewwa u bl-imħabba Huwa għallem id-duttrina ta’ Missieru u wettaq il-ħidma ta’ Missieru bil-qawwa u bl-awtorità li tah Missieru.18
Ġesù ta qalbu għal Missieru. Huwa qal:
“Jiena nħobb lill-Missier.”19
“Jiena dejjem nagħmel dak li jogħġob lilu.”20
“Jiena ġejt … mhux biex nagħmel ir-rieda tiegħi, imma r-rieda tal-Missier li bagħatni”21
Fl-agonija Tiegħu fil-Ġetsemani Huwa talab, “Iżda tkun magħmula r-rieda tiegħek, u mhux tiegħi.”22
Meta l-Mulej isejjaħ il-presbiteri f’ Iżrael “ħarsu lejja f’ kull ħsieb” u “araw il-ġrieħi” fil-ġisem imqajjem mill-imwiet Tiegħu, din tkun sejħa biex aħna nitbiegħdu mid-dnub u mid-dinja u nduru lejh u nħobbuh u nobduh. Hija sejħa biex ngħallmu d-duttrina Tiegħu u nwettqu l-ħidma Tiegħu bil-mod li jrid Hu. Għalhekk, hi sejħa biex nafdaw fih kompletament, nirrinunzjaw ir-rieda tagħna u noffrulu qalbna, u permezz tal-qawwa feddejja Tiegħu nsiru bħalu.23
L-aħwa, jekk aħna nżommu ħarsitna fuq Kristu, Hu jberikkna biex inkunu l-presbiteri Tiegħu f’Iżrael—umli, ta’ karattru ħelu, sottomessi, mimlijin bl-imħabba Tiegħu.24 U aħna nwasslu l-ferħ u l-barkiet tal-evanġelju Tiegħu u tal-Knisja Tiegħu lill-familji tagħna u lil ħutna fuq iż-żewġ naħat tal-velu.
Il-President Russell M. Nelson sejħilna biex inħarsu lejn Ġesù Kristu b’ dan il-mod: “Mhix xi ħaġa faċli jew awtomatika li aħna nsiru dan it-tip ta’ dixxipli mimlijin qawwa. Jeħtieġ li aħna nkunu ffokati sewwa fuq is-Salvatur u l-evanġelju Tiegħu. Hemm bżonn ta’ sforz mentali min-naħa tagħna biex aħna nibqgħu dejjem inħarsu lejh f’ kull ħsieb. Iżda meta aħna nagħmlu dan, id-dubji u l-beżgħat tagħna jgħibu.”25
Tirbatti hija kelma importanti. Tfisser li twaħħal tajjeb, tikkonċentra u tassigura bis-serjetà.26 Aħna nirbattu l-attenzjoni tagħna fuq Ġesù Kristu u l-evanġelju Tiegħu billi ngħixu l-patti tagħna.
Meta aħna ngħixu l-patti tagħna, huma jinfluwenzaw kull ħaġa li aħna ngħidu u nagħmlu. Aħna ngħixu ħajja ta’ patt27 mimlija b’atti sempliċi ta’ fidi li aħna nwettqu kuljum, li huma ffukati fuq Ġesù Kristu: nitolbu minn qalbna f’isem il-Mulej, niffesteġġjaw permezz tal-kelma Tiegħu, induru lejh biex nindmu minn dnubietna, inżommu l-kmandamenti Tiegħu, nieħdu sehem fis-sagrament u nqaddsu l-jum Tiegħu tas-Sabbath, inqimu fit-tempju mqaddes Tiegħu kemm jista’ jkun possibbli, u neżerċitaw is-saċerdozju mqaddes Tiegħu biex inservu lil ulied Alla.
Dawn l-għemejjel ta’ devozzjoni lejn il-patt tagħna jiftħulna qalbna u moħħna għall-qawwa feddejja tas-Salvatur u l-influwenza mqaddsa tal-Ispirtu s-Santu. Linja wara linja, is-Salvatur jibdel l-istess natura tagħna, il-konverżjoni tagħna lejh issir waħda aktar profonda u l-patti tagħna jieħdu l-ħajja f’qalbna.28
Il-wegħdiet li aħna nagħmlu ma’ Missierna tas-Smewwiet isiru impenn b’saħħtu, ix-xewqat kbar tagħna. Il-wegħdiet li jagħmlilna Missierna tas-Smewwiet jimlewna bil-gratitudni u l-ferħ.29 Il-patti tagħna ma jibqgħux aktar regoli li għandna nimxu warajhom iżda jsiru prinċipji għeżież li jispirawna u jiggwidawna u jirbattuna ma’ Ġesù Kristu.30
Dawn l-atti ta’ devozzjoni huma disponibbli għal kulħadd, żgħar u kbar. Intom il-ġuvintur li tħaddnu s-Saċerdozju Aroniku mqaddes, dak kollu li għandi xi ngħid illejla japplika għalikom. Nirringrazzja lil Alla għalikom. Kull ġimgħa intom tagħmluha possibli li ċerti ordinanzi u patti sagri jkunu disponibbli għal miljuni ta’ Qaddisin tal-Aħħar Jiem. Meta intom tħejju, tbierku jew tgħaddu s-sagrament; timministraw; tgħammdu fit-tempju; tistiednu xi ħabib għal xi attività; jew tgħinu fis-salvataġġ ta’ xi membru tal-kworum, intom tkunu qed twettqu l-ħidma tas-salvazzjoni. Intom ukoll tistgħu tħarsu lejn Ġesù Kristu u tgħixu kuljum il-patti tagħkom. Jiena nwegħidkom li jekk tagħmlu dan, intom bħalissa tkunu l-qaddejja leali tal-Mulej u, dalwaqt, il-presbiteri setgħana f’Iżrael.
L-aħwa, jiena naf li dan kollu jaf jinstama’ xi ftit intimidanti. Iżda jekk jogħġobkom ftakru dan il-kliem tas-Salvatur: “Iżda waħdi m’iniex, għax il-Missier huwa miegħi.”31 L-istess nistgħu ngħidu għalina. Aħna m’aħniex weħidna. Il-Mulej Ġesù Kristu u Missierna tas-Smewwiet iħobbuna u Huma jinsabu magħna.32 Peress li Ġesù ħares lejn Missieru u wettaq is-sagrifiċċju kbir tal-att tal-fidwa, aħna nistgħu nħarsu lejn Ġesù Kristu bl-assigurazzjoni li Huwa lest li jgħinna.
Ħadd minna mhu perfett. Xi kultant neħlu. Nispiċċaw naljenaw ruħna jew naqtgħu qalbna. Nitfixklu. Iżda jekk inħarsu lejn Ġesù Kristu b’qalb niedma Huwa jelevana, inaddafna mid-dnub, jaħfrilna u jfejjaq qalbna. Huwa paċenzjuż u twajjeb; l-imħabba feddejja Tiegħu ma tintemm qatt.33 Huwa jgħinna ngħixu l-patti tagħna u jkabbar is-sejħa tagħna bħala presbiteri f’ Iżrael.
U l-Missier iberikkna b’dak kollu meħtieġ biex iġib fis-seħħ l-għanijiet Tiegħu—“ħwejjeġ … kemm fis-sema u kemm fl-art, il-ħajja u d-dawl, l-Ispirtu u l-qawwa, mibgħuta lilna skont ir-rieda tal-Missier permezz ta’ Ġesù Kristu, Ibnu.”34
Meta aħna nirċievu d-dawl divin u l-qawwa divina f’ħajjitna, iseħħu tliet ħwejjeġ mirakolużi:
L-ewwel, aħna nkunu nistgħu naraw! Permezz tar-rivelazzjoni aħna nibdew inħarsu lejn ħaddieħor kif Ġesù ħares lejn il-mara: skont dak li hemm fil-qalb.35 Hekk kif aħna nħarsu lejn l-oħrajn kif iħares lejhom Ġesù, Huwa jberikkna biex inħobbu lil dawk li aħna nservu bl-imħabba Tiegħu. U bl-għajnuna Tiegħu, dawk li aħna nservu jkunu jistgħu jaraw lis-Salvatur u jħossu l-imħabba Tiegħu.36
It-tieni, aħna għandna l-qawwa tas-saċerdozju! Aħna għandna l-awtorità u l-qawwa li naġixxu f’isem Ġesu Kristu “biex inbierku, niggwidaw, nipproteġu, insaħħu u nfejqu lil ħaddieħor” u nwasslu l-mirakli lil dak li nħobbu u nżommu ż-żwiġijiet u l-familji tagħna ‘l bogħod mill-periklu.37
It-tielet, Ġesù Kristu jimxi magħna! Fejn immorru, Huwa jmur. Meta ngħallmu, Huwa jgħallem. Meta nfarrġu, Huwa jfarraġ. Meta nbierku, Huwa jbierek.38
L-Aħwa, m’għadniex verament raġuni għalfejn nifirħu? U żgur li għandna! Aħna nħaddnu s-saċerdozju mqaddes ta’ Alla. Hekk kif aħna nħarsu lejn Ġesù Kristu, ngħixu l-patti tagħna u nirbattu l-attenzjoni tagħna fuqu, aħna ningħaqdu ma’ ħutna n-nisa u nimministraw b’mod aktar qaddis, niġbru flimkien lil ulied Iżrael li jinsabu mferrxin fuq iż-żewġ naħat tal-velu, insaħħu u nissiġillaw il-familji tagħna u nħejju d-dinja għat-Tieni Miġja tal-Mulej Ġesù Kristu. Dan żgur se jseħħ. Jiena nagħti xhieda ta’ dan.
Nagħlaq b’din it-talba minn qalbi, li lkoll kemm aħna, inħarsu lejn Ġesù Kristu f’ kull ħsieb. Tiddubitawx. Tibżgħux. F’isem Ġesù Kristu, amen.