2:3

Na kati ya Mapata mpe Moi, Nkolo, Zala elongo na Ngai!

Na Reyna I. Aburto

Mopesi toli na Bokambi Monene ya Lingomba ya Bamama Basungi

Natatoli na bino ete “na kati ya lipata mpe moi” Nkolo akozala elongo na biso, ete “mitungisi na biso “ [ekoka ] komelama mpenza na esengo ya Klisto.”

Moko ya nzembo tolingaka elobeli losambo “Na kati ya Mapata mpe Moi, Nkolo, zala elongo na Ngai!”¹ Nzalaka mokolo moko na mpempo ntango ezalaki kobelema na ekumbaki moko ya monene. Kotalaka libanda na fenetele, nakokaki komona eboke ya mapata na nse na biso. Bongengi ya moi kobimaka engengisaki mapata, kosalaka yango kongenga na bongengi ya makasi. Noki, nzokande, mpempo ekitaki na kati ya mapata ya bozito, mpe tozalaki na mbalakaka ya kozipama na molili ya monene oyo ekangaki miso na biso mobimba na pole makasi oyo tomonaki mwa ngonga liboso.²

Mapata wana ekoki kokanga miso na biso na pole ya Nzambe mpe kutu kosala biso tomituna soki pole ezali lisusu mpo na biso. Boko ya mapata wana ezali mpasi na makanisi, kobangabanga, mpe ndenge mosusu ya mitungisi ya makanisi mpe ya mayoki. Yango ekoki kobebisa lolenge tomonaka bisomei, basusu, mpe kutu Nzambe. Yango ezwaka basi mpe mibali ya mibu nionso na bisika nionso na moklili.

Lolenge moko ezali kobebisa lipata ya kosambisa to ntembe elongolaka mawa oyo ekoki kozwa basusu oyo bakutani te na mikakatano oyo. Lokola eteni nonso ya nzoto, bongo ekoki kozwa bokono, likama mpe bozangi makoki. Ntango makanisi na biso ezwi mpasi, tokoki koluka lisungi ya Nzambe, ya baye nzinganzinga na biso, mpe ya basali ya lopitalo mpe ya kolongono ya makanisi.

“Bato banso—babali mpe basi—bakelami na elilingi ya Nzambe. Moko na moko azali mwana mobali to mwana mwasi ya molimo ya baboti ya lola, mpe, lokola bongo, moko na moko azali na bozali mpe bomoi ya bozambe.”³ Lokola Baboti na biso ya Lola mpe Mobikisi na biso, tozali na nzoto ya mosuni⁴ mpe tozalaka na mayoki.⁵

Bandeko na ngai ya basi balingami. esalamaka ete toyoka mawa to totungisamaka mbala moko na ntango moko. Mawa mpe mitungisi ezali mayoki ya moto uta mbotama.⁶ Nzokande, soki tozali mbala na mbala mawa mpe soki mpasi ezali ya mozindo mpenza ete ekangi bokoki na biso ya koyoka bolingi na Tata na biso na Lola mpe Mwana na Ye ya Mobali mpe nguya ya Molimo Mosantu, nde tokoki kozalana mpasi ya mobulu na makanisi, kobangabanga, to mpasi mosusu ya mayoki.

Mwana na ngaI ya mwasi akomaki mbala moko: “Ezalaki ntango moko ... [oyo] nazalaki mawa ntango nionso. Nakanisaki ntango nionso ete mawa ezalaki likambo moko ya koyokela nsoni, mpe ete ezalaki elembo ya botau. Yango wana nabombaki mawa na ngai mpo na ngai moko. ... Namiyokaki nazangi ntina.”⁷

Moninga moko alimboli yango boye: “Uta bomwana na ngai, nabundaka mbala na mbala etomba na mayoki ya bozangi elikia, molili, bomoko, mpe bobangi mpe liyoki ete nabukani to nabebi. Nasalaki nionso mpo na kobomba mpasi na ngai mpe nalakisaki mokolo moko te ete nazalaki kaka kofuluka mpe makasi.”⁸

Bandeko na ngai ya bolingo, ekoki kosalema na moto nionso—mingimingi ntango, lokola bandimi na mwana ya esengo, tomitiaka mokumba na kokanisaka ete tosengeli kozala ya kobonga mpenza sikoyo. Makanisi ya boye ekoki koleka kilo mpe kobuka. Kokoma ya kobonga mpenza ezali nzela moko oyo ekosalema na bomoi na biso mobimba ya kufa mpe koleka—mpe bobele na nzela ya ngolu ya Yesu Klisto.⁹

Na bokeseni, ntango tofungoli mikakatano ya mayoki na biso, kondiaka tozala ya kobonga mpenza, topesi basusu ndingisa ya kokabola bitumba na bango. Elongo tokoyeba ezali na elikia mpe tosengeli mpenza koyoka mpasi biso moko te¹⁰

Lokola bayekoli ya Yesu Klisto, tosalaki boyokani na Nzambe ete biso “tolingi komemana mikumba” mpe “kolela elongo na baye bazali kolela.”¹¹ Komema mpe kolela ekoki kozala na kokoma koyeba bokono ya moyok, koyeba makoki oyo ekoko kosunga kosalisa na bitumba oyo, mpe nsukansuka komema biso moko mpe basusu na Klisto, oyo azali Nkolo Mobikisi.¹² Ata soki toyebi te boniboni kosala na oyo basusu bazali koleka na yango, kondimaka ete mpasi na bango ezali ya solo ekoki kozala litambe moko ya motuya na koyeba kososola mpe kobikisa.¹³

Na makambo mosusu, ntina ya mpasi ya makanisi to kobangabanga ekoki koyebana, nzokande ntango mosusu ekoki kozala mpasi mingi kososola.¹⁴ Bongo na biso ekoki koyoka mpasi na ntina ya motungisi¹⁵ to bolembi ya kosansale,¹⁶ oyo ntango mosusu ekoki kobonga na nzela ya kokokisa bilei, mpongi, mpe ngalasisi. Mbala mingi, tokoki kozala na mposa ya kozwa lisalisi to nkisi na bokambi ya banganga mayele bayekola.

Mbano ya bokoki ya makanisi to ya mayoki ekoki kobebisa makambo, kokambaka na bokoki ya kobakisa, bozangi bososoli, mikangano ya kobukana, komopesa mpasi, mpe kutu komiboma. Nayebi yango mosika te, lokola tata na ngaimei akubaka na komiibaoma mibu mingi eleki. Liwa na ye ezalaki likama mpe ya kobuka motema mpo na libota na nbai mpe ngai. Ezwaki ngai mibu mingi mpo na kolekisa mpasi na ngai, mpe ezalaki bobele sikasikawa nde nayebaki kolobela komiboma na ndenge moko elongobani ya solo esungaka mpo na kopekisa yango na esika ya kolendisayango.¹⁷ Nalobelaka sikoyo polele liwa ya tata na ngai na bana na ngai mpe natatolaka libiki oyo Mobikisi akoki kopesa na ngambo nionso mibale ya elamba.¹⁸

Mawa, mingi oyo bazwi mpasi ya makanisi ya makasi batiaka mosika ya bandeko Basantu mpamba te bayoka bakoki te naboko lolenge ya kokanisa. Tokoki kosunga bango koyeba ete bazali ya solo ya biso. Ezali na motuya koyeba ete mpasi ya makanisi ezali te mbanoya botau, to ezali te mingimingi mbano ya lisumu.¹⁹ Yango “ekolaka soki ebombami kasi ebeekitaka soki ekabolami.”²⁰ Elongo, tokoki kotobola mapata mpe nsoni ya bomoko boye kilo ya nsoni elongwa mpe likamwa ya libiki ekoki kosalema.

Na bomoi ya kufa, Yesu Klisto abikisaki babeli mpe batungisami, kasi moko na moko atambolisaki bondimi na Ye mpe asalaki mpo na kozwa libiki. Boko batambolaki mosika, basusu batandolaki boboko mpo na kosimba elamba na Ye, mpe basusu bayaka na Ye mpo na kobikisama.²¹ Ntango ekomi likambo ya kobika, ezali biso na mposa na yango mpenza te? “Ezali biso banso te basengi?”²²

Tika tolanda nzela ya Mobikisi mpe tobokisa motema mawa na biso, bokitisa mposa na biso ya kosambisa, mpe totika kozala bazuzi ya kimolimo ya basusu. Na ngonga ya boye, tokoki mpenza kosunga komema to kotombola mapata ya kilo oyo ezali kombika balingami mpe baninga na biso²³ mpenza ete, na nzela ya bolingo na biso, bakoka mbala moko lisusu koyoka Molimo Mosantu mpe komona pole oyo ewuti na Yesu Klisto.

Soki bozingami mbala na mbala na yoko “londende ya molili,”²⁴ baluka na Tata ya Lola. Eloko te oyo emoni ekoki kobongola bosolo ya seko ete ozali mwana na Ye mpe ete Ye alingaka yo.²⁵ Mikundola ete Klisto azali Mobikisi mpe Mosikoli, mpe Nzambe azali Tata na yo. Bango basosolaka yo. Mona Bango penepene na to, koyokemalaka mpe kokabaka lisungi.²⁶ “[Bango] bakobondisa yo na motungisi na yo.”²⁷ Sala nyonso okoki mpe likia na ngolo ya bomikabi ya Nkolo.

Bitumba na yo esli yo te, kasi bango bakoki kosebisa yo.²⁸ Na ntina ya “sende na mosuni,”²⁹ okoki kozala na makoki ya koyoka motema mawa epai ya basusu. Na bokambami ya Molimo Mosantu, kabola lisolo na yo mpo na “kosalisa batau, kotombola maboko oyo ekiti, mpe kolendisa mabolongo elembi.”³⁰

Mpo na baye na biso bazali kobunda to kosunga moto moko oyo azali kobunda, tolinga kolanda mitindo ya Nzambe boye tokoka ntango nionso kozala na Molimo na Ye elongo na biso.³¹ Tosala “makambo ya mike mpe ya pete”³² oyo ekopesa biso bokasi ya molimo. Lokola Mokambi Russell M. Nelson alobaki: “Eloko te efungolaka lola mpenza lokola lisanga ya bopeto ya kobakisama, botosi ya sikisiki, koluka na lokengo, mokolo na mokolo kosalaka limpati na maloba ya Klisto na Buku ya Mormon, mpe mbala na mbala mipesa na tempelo mpe mosla ya mambi ya libota.”³³

Tika biso nyonso tomikundola bongo ete Mobikisi na biso, Yesu Klisto, “[akamataki] likolo na ye [ya biso] mpasi, ete nsop na ye atondaki na mawa, engebene na mosuni, ete akoka koyeba … boniboni kosalisa [biso] engebene nan[Ya biso] mpasi.”³⁴ Ye ayaki “mpo na kokanga mitema mibukana, … mpo na kobondisa banso oyo bazali kolela; … mpo na kopesa na bango kitoko esika ya mputulu y moto, mafuta ya esengo mpo kolela, bilamba ya masanzoli esika ya molimo ya bozito.”³⁵

Natatoli na bino ete “na kati ya lipata mpe moi” Nkolo akozala elongo na biso, ete “mitungisi na biso “ [ekoka ] komelama mpenza na esengo ya Klisto,”³⁶ mpe ete “ezali na ngolu nde tobikisami, nsima ya nionso tokoki kosala.”³⁷ Natatoli ete Yesu Klisto akozonga na mabele “na libiki na mapapu na ye.”³⁸ Nsukansuka, Ye “akopangusa mpenza mpinzoli na [ya biso] miso; mpe ekozala lisusu te … na mawa.”³⁹ Mpo bango banso oyo “bakoya epai ya Klisto, mpe bakobongisama mpenza na ye,”⁴⁰ “moi ekokita lisusu te … mpo Nkolo akozala [ya biso] pole ya seko, mpe mikolo ya [kolela] na biso ekosila.”⁴¹ Na nkombo ya Yesu Klisto, amene.