Maas ne Kuna
Seni manamanen ewe Ngun mi Fel, Kraist epwe atufichi kich ach sipwe kunakich pwisin me kunaekkoch usun I.
Kuna Poun Kot
Ua sani ewe porousen Testamen Noom usun emon anuon ewe a angang ngeni ewe soufos Elisha. Ew nesosoran ewe anuon a neno, tou nukun, me kuna ewe teninimw a rokopwanino ren ew watten mwichen sounfiu ra mochen nireno. A sa ngeni Elisha: “Masta, Met sipwene fori?”
Elisha a ponuweni, “Kosap nuokus pwe a chommong chon ppeni kich nap seni chon penir.”
Elisha mi sinei pwe mi auchea epwe nap seni an ewe anuon angei apinukunuk, epwe angei tufichin kuna. Iwe “Elisha a iotek, … Samon, … anenoi mesan, pwe epwe kuna. Iwe ewe Samon a anenoi mesen ewe anuon; iwe a kuna: me, nengeni, ewe chuk a uren oris me chariot mi ngetenget ra rokopwanieno Elisha.” 1
Meni epwe wor fansoun nupwen en, usun ewe chon angang, ka kuna pwe ka weires ne esinna ifa usun Kot a angang non manauom—fansoun nupwen ka mefi pekus—nupwen ekkewe sossotun manau ra akkufuk. Witi me nuku non Kot me non An fansoun, pokiten en mi tongeni nuku Netipan ren unusen netipom. Nge mi wor aruwen nesen ikei. Pwi me mwongeei achengicheng, ami pwan oua tongeni iotek ngeni ewe Samon an epwe anenoi mesemi ne kuna mettoch ouse tongeni kukkuna.
Kuna Kich pwisin usun Kot a Kuna Kich
Meni ewe mettoch mi kon auchea ngeni kich ina ach sipwe kuna fatochun ion Kot me ion wesetan kich—anuon me fopun noun samach me inach won nang, fiti “ wesetan nonnomuch me nang me ach tufich esemuch.” 2 Tingorei Kot epwe pwari ekkei ennet ngonuk, fiti fengen me usun an memef usum. Napenon om weweiti ennetin nonnomum me om popun, ennetin weweiti, epwe napeno an emweni mettoch meinisin non manauom.
Kuna Ekkoch
Ach weweiti ifa usun Kot a kuna kich a ammonata aanen an epwe anisi kich ne kuna ekkoch usun I. David Brooks emon chon mak a apasa: “Chommong me nein ach watten osukosuken neni a fis seni an aramas rese mefi pwe ir mi sineno me auchea. … [Mi wor ew] nukanapan … napanap sipwe murinono ren … me [,ina ewe] napanapen ennetin kuna fengeni kich me ennetin sinneno.” 3
Jises Kraist a ennetin kuna aramas. A kuna emon me emon, me met mi auchea ngenir, me ion ir mi tongeni winiti. Ikewe ekkoch ra kuna chon attaw, chon tipis, are chon angei takises, Jises a kuna chon kuno; ikewe ekkoch ra kuna emon mwan mi wor ngunungaw ren, Jises a neno seni riaffoun nukun, a etiwa ewe mwan, me echikara i. 4
Pwan mwo non osukosuken manauach, sia tongeni tapweeno an Jises nenien appiru me kuna aramas—ar mochen, ar nuku, ar weires, me ion ra tongeni winiti. 5
Nupwen ua iotek an ewe Samon epwe suki mesei ai upwe kuna mettoch use kukkuna, ua soun pwisin eisini ei ru kapaseis me auseningoch ngeni ekkewe memef repwe fis: “Met ua fori upwe kouno ne fori?” me “Met use fofori pwe upwe poputa ne fori?” 6
Ekkoch maram a no, fansoun sakrament, ua pwisin eisiniei ekkei kapaseis me ua mairu ren ewe memef a fis. “Kouno ne nengeni noum we fon nupwen ka witiwit non nain.” Ai nengeni nei fon non nain a automatic; ua kuna pwe ew fansoun mi och ai upwe fori chommong angang, cheki email, katon itenapen porous, ika katon masouen media.
Ewe sosoran mwirin, ua kuna ai witiwit non ew nain mi tam non ewe sitowa. Ua wau nei we fon me mwirin ua chechemeni ewe memef ua fen angei. Ua isonano nei we fon me nenefetan. Ua kuna emon mwan chinnap non ewe nain me mwei. Wan we sein sapping mi pon tiwenon chok fitu chok pwoochun anen kattu. Ua ekis mefi mennin, nge ua apasa och mettoch mi wesen ita tipachem usun, “Ua kuna pwe mi wor noum kattu.” A apasa pwe epwe wor ew monumon, nge ese mochen an esap monneta ren anen kattu. Aua ekis aporous, iwe mwirin a kun ngeniei me apasa, “Kopwe sinei, use mwo ureni emon ei, nge ikenai uputiwei.” Netipei a pweteteno. Ua ureni happy birthday me apasa ew iotekin kinisou non netipei pwe use nom won nei we fon me use miss ew tufichin ennetin kuna me chu ngeni pwan emon aramas mi auchea ngeni.
Ren unusen netipei use mochen upwe usun ekkewe prist ika ewe chon Levi won ewe aan ngeni Jericho—ewe a nengeni me feino seni. 7 Nge fan chommong ua ekieki pwe ua usur.
Kuna an Kot Angang fan Itei
Ua keran kaeo ew nesen mi auchea usun ennetin kuna seni emon fopun itan Rozlyn.
Ei porous chienei we a aporousa ngeniei ewe a nichipung nupwen punuwan we non ukukun 20 ier a suseni. Ren an nour kewe eimufeseni ar fansoun nefinen semer me iner kewe, ewe ekiekin fiti fan non an anamon usun a anuokus. A aporousa:
“Non ew mwichefen ikewe ewe famini a fokkun nap auchean, ach momot anamon mi tongeni aweires. Ewe aewin Raninfel ua fetanong me iotek pwe esap wor emon epwe fos ngeniei. Ua wesen pouni, me chenun mesei epwene suputiw. Ua momot ikewe iwe aua soun mot ie, me aneanei pwe esap wor emon epwe apareni pwe ewe nenien mwot mi pon.
“Emon fopun non am we wart a kun me nengeniei. Ua tipin amenimen. Neminewe a amenimen sefan. Ua tongeni kuna ewe aurek me won mesan. Ua sio non mosonoson pwe esap feito fos ngeniei—ese wor met mi och upwe apasa me ua sinei pwe upwe kechiw. Ua netiw sefan newon pechei me omonungaw seni ai upwe nengeni.
“Fansoun ewe awa mwirin, ua apareni pwe mi nom nge nesefan ngeniei. Mwitir chok an ewe mwich a sopweno, a fetan wenewen ngeniei. ‘Annim, Rozlyn,’ ua mongunungun. A foropacheieino non poun me apasa, ‘Sister Smith, ngang mi esinna ikenai pwe ew ran ese murino ngonuk. Omusano. Ngang ua tongek.’ Usun mi fat pwe epwe fis, chenun mesei a suputiw nupwen a pwan foropacheieino. Nge nupwen ua fetano seni, ua ekieki, ‘Menin ngang mi tongeni fori ei.’
“Ena 16 ier fopun murino, a kis seni esopun chok ieri, a kuttaei iteiten Raninfen non unusen ena ier me foropacheei me eis, ‘Ifa usum?’ A fokkun sokono usun met ua mefi ai feito ngeni fan. Ennetin pwe ua poputa ne anonga won ekkena foropach. Emon a apareniei. Emon mi sinei pwe ua nom ikewe. Emon a chunguwei.”
Usun ren ekkewe niffang meinisin Samach a mochen ngenikich, ach ennetin kuna mi auchea sipwe tingorei I—iwe mwirin fori. Tingor om kopwe kuna ekkoch usun I—pwe Noun anuon me fopun fiti ar tufich mi pin me esemuch. Mwirin fori ren tong, angang, me affata namoter me ar tufich nupwen ka mefi. Nupwen ei a winiti kokkotun manauach, sipwe kuna kich pwe sia winiti “ennetin chon tapweno mwirin … Jises Kraist.” 8 Ekkoch repwe tongeni nuku netipach ren netiper. Me non ei kokkot sipwe pwan kuna ach pwisin ennetin napanap me popun.
Chienei we a pwan chechemeni ew fansoun nupwen a momot non ena chok nenien mwot mi pon, a ekieki ika 20 ierin an achocho ne manaueni ewe kapas allim non imwan we ese wor namotan. A murino ngeni an epwe kuna; nap seni chok kinamwein epinukunuk. A mefi ew kapaseis a ku netipan: “Pwata ka fori ekkena mettoch? Ka forir fan iten om kopwe angei niwinin, ekkoch repwe mwar, ika ren met ka mochen?” A ekis tipemwaramwar, kutta netipan, iwe mwirin a tongeni pwaracho ne ponuweni, “Ua forir pwe ua tongei ewe Chon Amanau. Me ua tongei An kapas allim.” Ewe Samon a suki mesan an epwe anisi epwe kuna. Iei mecheresin nge pochokunen siwinin an kuna a anisi an epwe soposopono ren nuku non Kraist, inamo met nonnomun.
Ua pwarata pwe Jises Kraist mi tongei kich me mi tongeni ngenikich mas ach sipwe kuna—pwan nupwen mi weires, pwan nupwen sia pekus, pwan nupwen sia anamon, me pwan nupwen pungunon esap met sia mochen. Seni An chen, I epwe efeiochu kich me anapano ach tufich. Seni manamanen ewe Ngun mi Fel, Kraist epwe atufichi kich ne kuna kich pwisin me kuna ekkoch usun I. Ren An aninis, sia tongeni esinna met mi kon auchea. Sipwe poputa ne kuna poun ewe Samon an angang non me seni tichikin manauach—sipwe ennetin kuna.
Iwe mwirin, non ena ran “nupwen i epwe pwato sipwe usun chok i, pun sipwe ne kuna i usun wesewesen i; pwe epwe wor ach ei epinukunuk” 9 ina ai iotek non iten Jises Kraist, amen.