Fokkun Chen me ren ewe Samon
Fansoun riaffou me netipengaw resap tongeni siwini mamasaochun mesen ewe Samon non an fokkun cheni ne nenengeni kich, me efeiochu kich.
Non ew ranin a ier, usun emon minafon missionari e angang non ew kukkunun pranch won ewe kukkun fonuen Amami Oshima, Japan, ngang me chiechiewe aiwa fokun pwapwaasini ren awa sinei pwe President Spencer W. Kimball epwe ne wareto non Asia me ina chochon mwichefen meinisin me missionari meinisin non Japan ra tingor aipwe na Tokyo ne rongorongeni ewe soufos non ew mwicheichen area. Fiti ekkewe chon ewe pranch, ngang me chienei we aua meseik ne poputa ne fori kokkotun ewe mwich, a 12-awa ach sai won sein neset ngeni Otiwen ewe Setin China ngeni ewe ionapen Japan, mwirin ew sai won train ukukun 15-awa ngeni Tokyo. Nge, anetipengawan, pwe esap fiis. Aua sinei seni noum ewe presetenin am ewe misin pwe pokiten towawen neniem me tamen kunokun, ngang me chienei we ausap tawen fiti ewe mwich non Tokyo.
Iwe ekkewe memperin ewe kukkun pranch ra feinno won ar sai ngeni Tokyo, me am aua nommono. Ekkewe ran mwirin a men nuano me ponnuno. Aua fori mwichen sakrament am chok non ewe kukkun imwen fan, nupwen ekkewe Aramas mi Pin non Fansoun Soponon me ekkewe misineri non Japan ra na fiti ewe mwich.
Ai mefi pwisin netipengaw a chok watteno nupwen mwo uwa pwapwa ne ausening ngeni ekkewe chon ewe pranch ra niwin seni ewe mwich fitu ran mwirin ar repwe aporousa pwe Preseten Kimball a esinisin pwe epwe wor eu temple epwe kouta non Tokyo. Ra uren meseik nupwen ra aporausa usun pwonuetan ar tan. Ra awewei usun, atun ar ra rongorong ngeni ewe esinisinen ewe temple, ekkewe memper me misineri rese tongeni amochu ar pwapwa me ra mwitir chok poputa ne episipis ren pour kewe.
Chommong ier ano, nge ngang mi chiwen chechemeni ewe netipengaw uwa mefi seni ena use tongeni fiti ewe mwich mi auchea.
Non ekkei maram ra no uwa fen ekiek sefan won ei mettoch mi fiis nupwen ua katon ekkoch ra mefi anonnonun netipengaw me riaffou—a nununo watten seni ai we netipengaw atun ai uwa emon misineri—a torir pokiten ewe watten semwen COVID-19 won unusen ewe fonufan.
Ese mo pwan towaweno non ei ier, atun ewe watten semwen a poputa ne watteno, ewe Aewin Presetensi a pwon pwe “ewe Mwichefen me ekkewe memper repwe nukuchar ne pwari ren nukunuk apwonuetan ach pwon pwe kich sipwe mwirino non muu me aramasoch ngeni chon oruch kewe ”1 me sipwe “anapano ne tumunuoch ren kokkoch.”2 Iwe, sia fen kuna kounon mwich fengen non ewe Mwichefen won unusen fonufan fan ekkis fansoun, ewe niwinsefan a nap seni esop ekkewe missionari ra niwin ngeni pwisin fonuer kewe, me meinisin ekkewe temple non ewe Mwichefen ra kesip. Ngorou me neimi oua monneta pwe oupwe tonong non ewe temple fan iten omw pwisin angangepiin—fiti pwan ekkewe riri non temple. Pwan ekkoch me neimi oua awesano ami angangen missionari me mwen ururun oupwe wesino ika oua fen kepichino non mochemochen fansoun me angei pwan eu kokko.
Non ei fansoun, sou emwenin muu me sukun ra esipano sukkun—me pokiten ei a siwini kokkotun sochungio me fori okounon urumwotan sukun, mwicheich fengen, apwapwan fonu, me pwan ekkoch fofforun kao me pekin urumot. Chommong me neimi oua amonneta ren ekkewe mettochun urumot ouse chiwen fiti, me kokkot ouse chiwen ne rongorong, me fansoun urumot ese pwan chiwen fis.
Pwan watten memefin netipengaw ren ekiekin ekkewe famini a mano atonger non ei fansoun; napengeni rese tongeni fori angangen peias ika pwan ekkoch mwichen chufengen usun ra mochen fori.
Non mwochemochen kapas, chommong me neimi oua mefi ennetin netipetan nechipung, riaffou, me epinukunukumang. Iwe ifa usun sipwe echikara, nikitu, me feffeinno nupwen mettoch a tatakis?
Ewe soufos Nifai a poputa makkei won ekkewe kukkun mecha nupwen a emon watten mwan. Nupwen a nengen sefani won manauan me an angangen anisi aramas, a awora ew auchean ekipwichi non ewe aewin okisin non ewe Puken Mormon. Ewe okisin a afata eu kinikin kaeo mi auchea pwe sipwe ekieki usun non ach fansoun iei. Fiti ren an kewe kapas sia kan sinei, “Ngang, Nifai, ua uputiw me ren emon sam me in mi mwirino … ,” a makkei, “me pokiten ua fen kuna chommong riaffou non rani kewe, nge inamo, pokiten ua fokkun aninis me ren ewe Samon non unusen rani kewe.”3
Ussun chon kaeo ren ewe Puken Mormon, sia esinna usun ekkewe chommong riaffou minne Nifai a fos usun. Nge mwirin an esinna an kewe riaffou me non ranin kewe, Nifai a pwarau an ewe sinei ren pekin ewe kapas annim ren an fokkun chen me ren ewe Samon non unusen ranin kewe. Fansoun riaffou me netipengaw resap tongeni siwini mamasaochun mesen ewe Samon non An fokkun cheni ne nenengeni kich, me efeiochu kich.
Ngang me Lesa kukuto chok ei aiwa mwichefengen ren 600 missionari non Australia, chommong me neir ra nom fan ekkoch anukun nonnom non imw ren osukosukun COVID-19, chommong ra angang seni non imwer kewe. Sia ekieki fengen usun ekkoch aramas seni ewe Testamen Sofo, Puken Mormon, me Doctrine me Covenants, minne ewe Samon a efeiochu ne fori mettoch mi amwarar non fansoun weires. Meinisin ir ra angei nikinik ren met ra tongeni fori fiti an ewe Samon aninis nap seni met rese tongeni fori pokiten ar mwochuno non ew neni me mi aukuk ar fori met.
Sia anneani usun Paul me Silas, ion, atun ar kanapus pwisin, ra iotek, kon, aiti, me pwarata—iwe pwan papataisi ewe chon maasen ewe nenien kanapus.4
Me pwan usun Paul, non Rome, a chok kanapus non imwan ewe ren ru ier, minne non ei atun a soposopono ne “a awewei ngenir an we poraus ussun ewe muun Kot,”5 “me afanafan ekkewe metoch ussun mi auchea meren ewe Samon Jises Kraist.”6
Usun Nifai me Liai, ekkewe noun Ilaman kewe at, ekkewe mwirin ar riaffou me fansoun fotek ra erokopwanino ren ekkein tumunu atun an ewe Samon “unusochun mongungu mi pwetete … minne a pwereni [ekkewe chon kanupuser] non anononun netiper.”7
Ren Alma me Amulek non Ammonaia, ra kuna pwe chommong “ra nuku … me poputa ne aier, me ra kutta ekkewe pukefel,”8 ina mwo ika ra turunufas me esor aner mwongo, konik, ika uuf, me ra fofo ren san me tonong non kanapus.9
Me saigonon ren Joseph Smith, ion, a riaffouno non Kanapusen Liberty, a mefi pwe a anaemon chok me ewe Samon a op seni, me iwe a rongorong ekkei kapasen ewe Samon: “Ekkei mettoch … repwe och fan itom”10 me “Kot epwe nom reom fansoun meinisin.”11
Emon me emon ir meinisin ra sinei usun Nifai a sinei: pwe ina mwo ra kuna mettoch mi weires non ranin manauer kewe, nge ra fokkun chen me ren ewe Samon.
Kich sia pwan tongeni nonno fengen emon me emon kich memper me unusen ewe Mwichefen ren napanapan ach fokkun chen me ren ewe Samon non ekkewe fansoun weires sia kuna non ekkewe fitu maram a keran no. Ren ai porous usun ekkei awewe, mut ngenir repwe pwan apochokuna ami kapasen pwaratan ewe soufos mi manau ikenai a emon chon osini, ewe a amona kich fiti ekesiwin me mwen och porausen eu osukosuken semwen a tori fonufan, me a atufichi kich ne nikitu ngeni ekkewe riaffou a torikich.
Akkaewin, ach anapano ach imwen Fanin kao non imw me angei aninis seni ewe Mwichefen.
Ru ier ano, Preseten Russell M. Nelson a apasa: “Sia orenano ach sipwe ekieki ‘fan’ ussun ew mettoch a fis non ach kewe imwen mwich, aninis a feito seni met a fis non imwach. Sipwe ekkesiwini ei mokutukkut. … Ren kaeo non imw ren aninis seni Mwichefen, a angei aninis seni met a fis non ach … kewe neni.”12 Met ren ew ekesiwin seni emon soufos! Imwen-kaon ewe kapas allim a fen fis mokutukutun atun ren kesipanon ekkewe imwen fan non ekkis fansoun. Inamo ika ewe fonufan a poputa ne niwin ngeni nonomun me nom me sia niwin ngeni ekkewe imwen fan, sipwe mochen anomatiw ach napanapen imwen-kaon ewe kapas allim me napenon ach kaeo fonsoun ewe osukosuken efeiengawen samau.
Ewe aruwen awewe ren chen me ren ewe Samon a nom non ewe pwarata usun iamwir non ew napanap mi tekia me napenap mei pin.
Non 2018, Preseten Nelson a awora esinesin ren iamwir pwe eu ekkesiwin “non ewe napanap sia tumunu fengenikich.”13 Ewe watten semwen a awora chommong fansoun tufich ne aochueno ach angangen iamwir. Pwi me fefinei chon iamwir, anuon me fopun, me pwan ekkoch ra angang ne awora chiechi, aporaous fengen, tumunun atake, mwongo, aporaus won fon, me ewe angangen sakrament ngeni ekkewe mi mochen. Ewe Mwichefen a pwan iamwiri ekkoch non ei fansoun ren awattenon inetin mwongo ngeni imwen mwongo, chon esor imwer, me aninisin chon ekis me pwan ren angang ngeni ekkewe neni mi kan watte echik non. Fin Anisi me ar kewe famini ra ponueni ewe tingor ar repwe fori fitu minion tukutukun mas fan iten ekkewe chon- tumunu ekkewe mi semwen.
Eu saigonon awewe ren feioch a tori kich atun fansoun sossot a ren kutten ososen ewe pwapwa ren niwinsefanin angangepiin non temple.
Ei a fokkun eoch awewen non ew tutunap. Nupwen Sister Kaitlyn Palmer a angei an kokkon misin non ewe April ano, a fokun pwapwa an epwe iteni emon misineri nge a pwan mefi pwe mi pwan nono an aucheani me mi mwirino an epwe feinno ngeni ewe tempel an epwe angei an endowment me fori pwon mi pin. Mwirin chok an fini eu fansoun an epwe angei an endowment, ewe esinesin a tou pwe meinisin ekkewe tempel repwe mo kesip fan iten ewe watten semwen won unusen fonufan. Mwirin an tori ei netipetan poraus, iwe a pwan sinei pwe epwe fiti ewe nenian aiti missionari (MTC) won komputer seni imwan ewe. Inamo ren ekkei mettochun anetipengaw, Kaitlyn a achocho ne anonga an ekiek won an epwe pwapwa non ngun.
Non ekkewe nefinen maram, Sister Palmer ese nikitano an apinukunuk pwe epwe tongong non ewe temple. An famini ra iotek me echikipin pwe ewe temple epwe suk me mwen an epwe feinno. Fan chommong Kaitlyn a poputani non imwan MTC nesosor ren an apasa, “Met epwe ne Ikenai ewe ranin sia angei ew manaman me ekkewe tempel repwe ne suk?”
Non August 10, ewe Aewin Presetensi a esinisin pwe an Kaitlyn we tempel epwe suki sefan fan iten ekkewe angangepin an ekkewe mi manau non ewe chok ran an sai ngeni ewe misin epwe fiis nesessor chok. Ese tongeni epwe tonong non ewe temple me pwan taweioch ngeni an we sai won sepenein. Ren ekis anean an epwe fisioch, an famini ra kokkori ewe presetenin tempel Michael Vellinga an epwe nengeni ika mi wor ew anen ewe manaman ra iotek fan itan an epwe fis. Ar kewe iotek me echikifen a ponu!
Atun 2:00 a.m winingach, fitu auwa chok me mwen an sepenein epwe su, Sister Palmer me an famini, non ar mese kechiw, ra etiwetiw me pen ewe assamen tempel meren ewe presetenin tempel non an mese pwapwa o a erenir, “Nesor allim, faminien Palmer. Sa etiwok non ewe tempel!” Nupwen neminewe a awesino an endowment, ra apochokuna ngenir pwe repwe mokutukai, pwe pwan eu famini a witiwit nukun ewe asam. Ra saa foch ngeni ewe kasoro non ewe chok ukkun kunokun epwe ne sai ngeni an ewe misin.
Ekkewe pwon non tempel sia pwositi non ekkei maram nikinikin pwe ra murinono seni ekkewe akkoman sia ekieki nupwen ekkewe tempel ra suk sefan won fonufan non kinikinir.
Ren ai ua osopwano, ouse mochen oupwe ausening ngeni ekkewe kapas mi apochokuna, apwapwai, me kapas mwirino seni ewe Soufos Joseph Smith. Emon ese tongeni ekieki pwe a makei non atun a riaffou me anaemon chok, a fotek me a ra eppeti seni mwokutukut non eu imw non Nauvoo, me a oop seni ekkewe ion ra kutta i pwe repwe angei ne atononga non pureik ese fiti annuk:
“Iei, met sia rongorong me non ewe kapas allim minne sia angei? Eu mongungun pwapwa! Eu mongungun umoumouch seni nang; me eu mongungun pungoch seni ewe fonufan; poraus mi pwapwa fan iten ekkewe mi mano; eu mongungun pwapwa fan iten ekkewe mi manau me ekkewe mi mano; poraus mi pwapwa me pwapwa watte. …
“… Met sisapw soposopono non ei napanapen popun? Feino mwach me sisapw pakusefan. Apinukunuk, … me feinno, feinno ngeni ewe fansoun win! Mut ngeni netipemi epwe pwapwa, me unusen pwapwa. Mut ngeni ewe fonufan epwe fefeita non kon.”14
Pwi me fefinei kana, uwa nuku pwe eu ran, emon me emon ami oupwe nengensefani usun ekkewe mettoch rese chiwen fiis, ewe netipengaw, ewe nichipung, me ewe akanamon chon angang ngeni ewe watten semwen pwe oupwe kuna pwe a ponuno ren ekkewe feioch me fiti napenon nuku me ekkewe kapasen pwarata. Uwa nuku pwe non ei manau, me non ewe manau epwe feitto, ami kewe riaffou, ami Ammonaia, ami Kanapusen Liberty, epwe efeiochukemi ren ami feffeita.15 Uwa iotek pwe fiti Nifai, sia tongeni esinna am kewe riaffou non ranich kewe me non pwan ei chok ekiek esinna pwe kich sia fokkun chen me ren ewe Samon.
Uwa osopwano ren ai kapasen pwarata usun Jises Kraist, ion I pwisin a sinei usun riaffou me fiti non An Achasefan ese muuch a fitatiw fanchikin mettoch meinisin.16 A weweiti ach kechiw, metek, me mochen. I ach Chon Amanau, ach Chon Affor, ach apinukunuk, ach pwapwa, me ewe Chon Angasakicheno. Usun ei uwa pwarata non Itan mi piin, Jises Kraist, amen.