A Wor Pinewa
Nupwen sia kutta ach sipwe amwonata inisich, sia tongeni weri sossotun manau fiti napenon apinukunuk.
Me mwen annukun sai a fis pokiten ewe semwen watte, ua niwino neimw seni ew angang won fonuen ekis minne, ren osukosuken akokkot, a efisata ai witiwitino non Raninfen. A wor ai fansoun nefinen wai sepenin ai upwe fiti ew mwichen sakrament non ewe neni, ikewe ua pwan tongeni apasa och mwochomwochen porous. Mwirin ewe mwich, emon tiiken mi mwasang netipan a feito rei me eis ika ngang mi sisinei Preseten Nelson me ika ua fen tufich ne kapong ngeni. Ua ponuweni pwe ngang mi sisinei i, pwe ua fen kapong ngeni, me ena, ren wisei we Chon Nemeni Pisop, a wor ai tufich ne churi Preseten Nelson me noun kewe chon aninis fan ru iteiten wiik.
Ewe kukkun tiiken a mwotiw won efoch sea, nuetata poun non ewe asepwan, me puchor, “Iei ewe ran mi napanap non manauei!” Pwi me fefinei, eni usap nuetata pei non ewe asepwan me puchor, nge ua kinisou feinfeino ren emon soufos mi manau me ren ewe emwen sia angei seni soufos, chon osini, me chon pwarata, akkaewin atun ekkei fansoun weires.
Seni nepoputan fansoun, ewe Samon a awora emwen ne anisi Noun aramas ar repwe ammonata non pekin ngun me inis ne ungeni ekkewe osukosuk I mi sinei pwe repwe fis pwe pekin manau won fonufan. Menin ekkei osukosuk repwe an emon me emon ika an meinisin, nge an ewe Samon emwen epwe awora eppet me aninis ren ukukun ach aneasochisi, me fori, An ourour. Ew awewe mi amwarar mi fis non ew uruo seni ewe puken Genesis, ikewe sia kaeo usun Joseph seni Egypt me an ewe awewen an Pharoah we tan.
“Iwe Joseph a ereni ewe King, … Kot a fen awewei ngonuk met epwe ne fori. …
“Non fisu ier epwe chommong mwongo non unusen Egypt:
“Epwe wor nengita non ekkewe fisu ier; iwe ekkewe fisu ier mi chommong mongo repwe monukuno.” 1
Pharaoh a ausening ngeni Joseph me, a ponuweni met Kot a pwar ngeni me non ew tan me mwitir poputa ne ammonata ngeni met epwe fis. Ekkewe pukefel ra rekotuni:
“Iwe non ekkewe fisu ier a watte ras won ewe fonu.
“Iwe a ion fengeni ekkewe mwongon ekkewe fisu ier. …
Iwe Joseph a ion fengeni corn usun chommongun piien ewe sat, …tori an ese chiwen anneani; pun ra kon chommong.” 2
Mwirin an ekkewe fisu ierin chommong a wesino, sia sinei pwe “fisu ierin mano a poputa ne fis, anongonong won met Joseph a apasa: me ewe mano a fis non unusen ekkewe fonu; nge non unusen Egypt a wor pinewa.” 3
Ikenai sia feioch ach emwen me ren kewe soufos ekkewe mi weweiti auchean ach sipwe mwoneta ngeni ekkewe osukosuk “minne repwe fis” 4 me ion kewe ra pwan esinna ekkewe oukuk ika pinepin sipwe weri non ach achocho ne fori ar ourour.
Mi wor ew fatochun wewe pwe mettoch a fis pokiten COVID-19, pwan ussun ngawenon wesetan osukosuk, ese wor osufonochun ngeni aramas, pwan ngeni nongonong, mwicheich, me kinikinin namanam won fonu meinisin. Ese chiwen wor angang me moni tonong a kukunutiw nupwen tufichin angang a osukosuk ren ar mo kouno ne angang me ar tongeni angang a weires ren osukosuken semwen me osukosuken annuk.
Ngeni meinisin ra fen osukosuk, sia affata ach weweiti me aureki nonnomumi, me pwan ew pochokunen onukunuk pwe kewe ran mi murinno ra nom mwach. Oua feioch ren pisop me presetenin pranch ekkewe ra kutta chon ar mwicheich mi wor ar osupwang me ekkewe mi wor ar mumuta ngeni pisek mi tongeni anisikemi ne forsefani manauemi me annomu kemi won aanen anongonong won winikapemi nupwen oupwe aea nongonongen mwoneta.
Non nonnomun ikenai, ren ew watten semwen a fen angawano unusen pekin moni me manauen aramas, epwe wewengaw ngeni emon Chon Amanau mi umoumoch an epwe omonungaw seni ennetin met chommong ra weiresiti me tingorer repwe poputa ne forata isoisen mwongo me moni ngeni ewe fansoun mwach. Inamo, esap wewen pwe sipwe wesewesen amonungaw seni nongonongen mwoneta—nge sipwe aea ekkei nongonong “non mirit me tetten” 5 pwe non ewe fansoun mwach sipwe tongeni apasa, usun Joseph seni Egypt, “A wor pinewa.” 6
Ewe Samon ese esuku kich ach sipwe fori nap seni met sia tongeni, nge A esuku kich ach sipwe fori met kich mi tongeni nupwen sia tongeni. Nupwen Preseten Nelson a achema ngeni kich non ach we mwichenap a no, “Ewe Samon a fokkun sani otures.” 7
Sou emwenin Mwichefen ra pepesei Souneng “ar repwe mwoneta ngeni riaffoun manau ren ach awora mwongo me konik me ekis moni non nenien isois.” 8 Sia pwan wor pesepes ngenikich pwe sipwe “mirit” me “sisap anapa mettoch” 9 non ach atures ne forata ew nenien isoisen pisek me ew nenien isoisen moni. Ew aninisin itenapan Personal Finances for Self-Reliance, a for non 2017 me mi wor an ewe Mwichefen website non 36 sokkun kapas, a poputa ren ew porous seni ewe Aewin Presetensi, minne a apasa:
“Ewe Samon a affata, Iei ai popun epwe kawor fan iten nei souneng [Doctrine and Covenants 104:15]. Ei pwarata mi ew pwon seni ewe Samon pwe I epwe awora feiochun inis me suki ewe asamen anongonong-won winikapach. …
“… Etiwa me manaueni ekkei nongonong epwe atufichi kemi ne angei ekkewe feiochun inis ewe Samon a pwonei.
“Aua tingorekemi ami oupwe achocho kaeo me aea ekkei nongonong me aiti ngeni chon ami famini. Nupwen oupwe fori, manauemi epwe feioch … [pokiten] ami noun Samach won Nang. I a tongekemi me esap tongeni nikitikemino. I a sinekemi me a mwoneta an epwe ngenikemi ewe feiochun anongonong won pwisin winikapemi non pekin ngun me inis.” 10
Ei aninis mi pachenong ekkoch sopwun a chok kapas usun forun me nounou kaukun moni, tumunu om famini seni weires, atawechu osukosuken moni, me anganga monien mwach me mi wor fan iten meinisin won an Mwichefen website ika seni noum kewe sou ewmen non neniom we.
Nupwen sia ekieki usun ewe nongonongen mwoneta, sia tongeni nenesefan ngeni Jospeh non Egypt ren mokutukutun memef. Ar sinei met epwe fis esap chok naf an epwe anisir non ekkewe ierin “nengita” ika esap wor och ukukun fangeno fansoun ekkewe ierin uwa. Nap seni ar aitano meinisin met ekkewe chon angang ngeni Pharaoh ra awora, kaukun a foruta me ra apwonueta, ra awora met epwe naf ngeni met mi auchea ngenir non ewe fansoun me fansoun mwer. Ese naf ar sinei pwe fansoun weires epwe fis. Repwe mokutukut, me pokiten ar achocho, “a wor pinewa.” 11
Ei a emwen ngeni ew auchean kapas eis: “Ina minne, met?” Ew murinon neni ach sipwe poputa ne weweiti pwe mettoch meinisin ir mi pekin ngun ngeni ewe Samon, “me esap mwo ew fansoun” a ngenikich “ew annuk ren pekin inis.” 12 Iwe, mettoch meinisin, mi wenengeni Jises Kraist pwe i ewe nongonong minne sipwe kauuta won pwan mwo ach mwonetan pekin inis.
Ach mwoneta ren pekin inis me anongonong won winikapach wewen “nuku pwe seni ewe chen, ika ewe manaman, an Jises Kraist me ach atures, sia tongeni angei ekkewe auchean manau ren pekin ngun me inis mi namot fan itach me ach famini.” 13
Kapachetan kinikinin ew nongonongen pekin ngun ren mwonetan pekin inis mi pachenong foffor “non mirit me tetten,” 14 minne a ekiekieta ekis me ekis koutan ew nenien isoisen mwongo me moni non fansoun nangatam, me etiwa “kukkun me mecheresin” mettoch, 15 minne ina ew pwomen nuku pwe ewe Samon epwe awatteno ach atures mi kukkun me nukuchar.
Ren an wor ew nongonongen ngun, iwe sipwe tongeni fetanoch ne aea ru mettoch mi auchea usun mwonetan pekin inis, ataweochu pekin moni me imwen nenien isois.
Auchean nongonong ne ataweochu mwokutun moni mi pachenong kamotiwen ew ne engon me asor, omorano me kineseni niwinimang, mwoneta me nounou kaukun moni, isois moni ren fansoun mwach.
Auchean nongonongun imwen nenien isois mi pachenong nenien isoisen mwongo; nenien isoisen konik,pwan ekkoch mettoch mi namot anongonong won met mi auchea ngeni emon me famini, pokiten “ewe murinon imwen isois” 16 ina ewe imw, minne a winiti ewe “mi mecheres ngeni fansoun osupwang.” 17
Nupwen sia etiwa nongonongun pekin ngun me kutta mokutukutun memmef seni ewe Samon, sipwe angei emwen ach sipwe sinei netipan ewe Samon fanitach, pwisin winikapach me ren ach kewe famini, me ifa usun sipwe aponuweta ekkewe nongonongen ammonata ren mettochun fonufan. Ewe a kon auchean tettenin me nein meinisin sipwe poputa.
Elter David A. Bednar a afanafana ei nongonong nupwen a apasa: “Fori fofforun ina ewe mwokutukutun nuku. … Ennetin nuku sipwe anonga non me won ewe Samon, Jises Kraist me emwen ngeni foffor fansoun meinisin.” 18
Pwi me fefinei, non ew fonufan mi soun sisiwin, sipwe mwoneta ngeni met ese fat. pwan mo ren ran mi och non fansoun mwach, kich mi sinei pwe fansoun och me fansoun ngaw epwe soposopono. Nupwen sia kutta ach sipwe amwonata inisich, sia tongeni weri sossotun manau fiti napenon apinukunuk, kinamwe non netipach me usun Joseph non Egypt, sipwe tongeni apasa, non fansoun sokopaten osukosuk, “A wor pinewa.” 19 Non iten Jises Kraist, amen.