Eu Minafo Ururun Napanap
Ngang uwa tungorei kemi ouwpwe kunu manawemi, ami ekiek, me ngunumi epwe wateno ngeni Samach non Lang me noun ewe aat, Jises Kraist.
Achengicheng pwi me fefinei, ekkei ru ranin mwichenapen mwichefen ra fokkun amwarar! Ngang uwa tipew ngeni Elter Jeffrey R. Holland. Nupwen an apasa, ekewe pworous, kewe iotek, me kewe kon ra unusen memef seni ewe Samon. Uwa fokkun kinisou ngeni meinisin ra kan fiti non ekkoch sokun napanap.
Me non ekkei mwich, uwa kan anapanapa me ekiek usun ami oua kan ausening ngeni ei mwichenap. Uwa tingor ngeni ewe Samon pwe epwe anisiei ne weweiti met oua mefi, osukosuk ren, ika achocho ne fori. Uwa ekieki ika met upwe tongeni apasa ren kasoponon ei mwichenap pwe epwe tinkemino ren ewe pwapwa usun ewe fansoun mwach minne uwa sinei ewe Samon a mochen oupwe mefi.
Sia manau non eu fansoun mi amwarar, me soufos fan fitupuku ier ra kan kuna me mwen. Iei ewe kinikinin fansoun minne ese wor och feiochun ngun esap tongeni ngeni ekkewe ir mi tupwon.1 Ina mwo kewe fitikokon won fonufan,2 ewe Samon a mochen pwe sipwe “nennengeni ewe fansoun mwach ren pwapwa mi emeseik.”3 Sisap anamwotangawa ach fansoun non achechemenien naneu. Ewe ioifengenin Israel a feffeino. Ewe Samon Jises Kraist a emweni fofforun An Mwichefen, me epwe apwonueta an popun seni nang.
Ewe angang fan iten en me ngang pwe sipwe awenewen pwe emon me emon kich sipwe apwonueta ukukkun ach tufich seni nang. Ikenai sia rongorong fan chommong usun “eu minafo ururun napanap.” Ika en mi ennetin mochen etiwa eu minafo ururun napanap, uwa tungorek kopwe akunu netipom, ekiekom, me ngunum non anapanon napanap ngeni Semach won Nang me Noun we At, Jises Kraist. Mwut ngeni epwe omw minafo ururun napanap.”
Etiwa omw minafo ururun napanap ren omw aier iteitan ran. Achocho ngeni anapanon nimenimochun omw ekiek, kapas, me foffor. Iamwir ngeni ekkoch. Ekieki usun mettoch ren omw sinei usun fenfeinno. Apwonuetan wisom kewe. Ese nefinifin met sokkun om kewe osukosuk, achengicheng pwi me fefinei, manaueni iteitan ran pwe en mi pwan ekkis ammoneta ne churi noum Chon For.4
Ina popun a wor ach kewe imwen temple. An ewe Samon kewe annuk me pwon mi pin ra ammonakicheta fan iten manau ese muuch, ewe feiochun Kot mi napanap.5 Usun ka fen sinei, ewe COVID pandamic a anamwota pwe ekkewe temple repwe kesip non ekkis fansoun. Mwirin sia poputa eu tumunuochun kokkot ne suki sefan, ekkis me ekkis. Non Kinikin 2 iei a fiis non chommong ekkewe temple, fite ngerou chon opupunu ra riri fengen, me fite ngerou ra pwan angei ar pwon pwisin non ekkewe fitu maram ra no. Sia nennengeni ewe ran minne meinisin memper non ewe Mwichefen mi nimenimoch repwe tongeni angang sefan ngeni ar kewe neo me fel non eu temple mi pin.
Iei uwa kinisow ren ai upwene esinesin ren kokotun kewe angangen wonu minafon tempel repwe keuta non kewe neni: Tarawa, Kiribati; Port Vila, Vanuatu, Lindon, Utah; Greater Guatemala City, Guatemala; São Paulo East, Brazil; and Santa Cruz, Bolivia.
Ren ach aueta me tumunu ekkei temple, sia kan iotek pwe emon me emon ami oupwe aueta me tumunu ami kewe pwisin pwe oupwe nimenimoch ne tonong non ewe temple mi pin.
Iei, achengicheng pwi me fefinei, uwa efeiochukemi pwe oupwe uren kinamwe an ewe Samon Jises Kraist. An kinamwe a watte seni ukukun emon mwan a tongeni weweiti.6 Uwa efeiochukemi ren anaponon mochen me tufichin annesochisi ekkewe annukun Kot. Uwa pwon pwe ren ami fori ei, oupwe kuna chommong feioch, iwe pwan watten pechekunen netip, watten pwisin pwarata, watten kinamwe non imwemi, me pwapwa ika mwo non fansoun tipemwarar.
Iwe sipwe chefengen ne feino me apwonueta am angang me ren nang—pwe sipwe pusin amnakicheta me ewe fonufan fan iten ewe Aruwen Wareton ewe Samon. Ua kan iotek, apachata ai tong ngeni kemi, non ewe it mi pin iten Jises Kraist, amen.