Ekkewe Fefin non Saion
Ami oupwe eu pechekun mi namwot non ewe iofengin Israel me non ammonetan eu aramasen Saion.
Fefinei kewe mi achengecheng, ngang uwa kan feioch ren ai tufich non ei fansoun fonufan mi kan amwaramwar. Iteitan ran, sia pwan ekkis kanneto ngeni ewe ningochun fansoun minne ewe Samon, Jises Kraist, epwe feitto ngeni ewe fonufan sefan. Sia sinei ekkis usun ekkewe mettoch mi ngaw epwe fiis me mwen An niwinito, nge inamo netipach ra watteno ren pwapwa me nukunuk pokiten ach sinei usun ekkewe ningochun pwon minne epwe pwonueta me mwen I epwe niwinsefan.
Ami ekkewe nengin mi achengecheng noun Semach won Nang, me pwan ekkewe nenginin ewe Samon Jises Kraist non muun, 1 oupwe fori och angang mi fokkun namwot non ewe ochun fansoun mwach. Sia sinei pwe ewe Chon Amanau epwe feitto ren aramas minne ra iofengen me ammoneta ne manau usun manauen ekkewe aramas non ewe teninimwen Enoch. Ekkana aramas ra netipeu non nuku non Jises Kraist me ra winiti napanapen unusochun nimenimoch pwe iwe ra uweieno seni ewe fonufan.
Iei an ewe Samon pwarata usun tichikin met epwe fiis ngeni ekkewe aramasen Enoch me met epwe fiis non ei saigon kinikinin fansoun meinisin:
“Iwe ewe ran epwe feitto pwe ewe fonufan epwe asoso, nge me mwen na ran nang epwe rochopwakino, me rochopwak epwe rokopwanino ewe fonufan; me nang epwe chech, me pwan ewe fonufan; me watte osukosuk mi weires epwe nom nein ekkewe noun aramasen, nge Ai kewe aramas upwe tumunu;
“Me upwe tinatiw tupwen seni nang; me upwe tinato ennet seni fonufan ar repwe pwarata usun Nei we Anaemon; an manausefan seni mano; ewer, me pwan ewe manausefanin aramas meinisin; me upwe tinato tupwen me ennet won fonufan usun eu noter, pwe upwe ochufengeni nei kewe mi kefin seni unusan fonufan, ngeni eu neni minne upwe ammonata, eu Teninimw mi Pin, pwe nei kewe repwe ammonata, me witi ewe fansoun upwe feitto pun ikewe ia ai imwenipin epwe nom ia, me epwe iteni Saion, ewe Jerusalem mi Fo.
“Me ewe Samon a apasa ngeni Enoch: Iwe non na fansoun en me unusun om teninimw oupwe churir me ikewe ia, me sipwe etiwirenong ngeni netipach kewe, me repwe kunakich; me sipwe turufir, me ir repwe turufikich, me sipwe kisini fengen;
“Me iwe ikewe ia ngang upwe nonnom, me epwe Saion, minne epwe feitto seni meinisin mettoch minne Uwa fori; me ren ukukun eu ngerou ier ewe fonufan epwe asoso.” 2
Ami kewe fefin, noumi kewe nengin, me noun noumi kewe nengin, me ekkewe fefin oua fen tumunu oupwe nom nukunapen ewe angang ne foruata ena mwichen aramas minne epwe chufengen non ningochun nonnom ren ewe Chon Amanau. Ami oupwe awora pochokun mi namwot non ewe iofengenin Israel me non ammonetan eu aramasen Saion ne nom non kinamwe non ewe Jerusalem mi Fo.
Ewe Samon, me ren Noun kewe soufoos, a awora eu pwon ngenikemi. Non ekkewe aewin ranin ewe Relief Society, ewe Soufos Joseph Smith a apasa ngeni ekkewe fefin, “Ika oupwe manaueni ukukun ami tufich, esap tongeni tufich ne epeti ekkewe chon nang ar repwe fitikemi.” 3
Ei tufich mi amwarar a nonnom remi, me ami oau ammoneta fan iten.
Preseten Gordon B. Hinckley a apasa:
“Ami ekkewe fefin … ousap numpa ru non an Semach kokkotun pwapwa ese muuch me tumunuochun Noun kewe. Ami oua eu kinikin mi wesewenen namwot non ena kokkot.
“Ika esap fan itemi ewe kokkot esap tongeni fiis. Ika esap fan itemi unusen ewe angang epwe osukosuk. …
“Emon me emon me neimi oua emon Noun Kot nengin, minne a wor wisomw seni nang fan itom pwisin.” 4
Ach soufos iei, Preseten Russell M. Nelson, a apase ei wewenin met oupwe fori non angangen amonneta ngeni an ewe Chon Amanau fansoun feitto:
“Esap tufich ach sipwe auku ewe mwokutukutun aninis mi wor … seni fefin, esap chok non famini nge pwan non an ewe Samon we Mwichefen, non wiser ren punuwer, in, me in chinnap; wiser non pekin pwipwi me aunt; wiser ren sense me sou emwen; me akkaewin wiser ren pekin chon appiru me chon tumun mi tupwon ngeni ewe nuku.
“Ei mi fen ennet non meinisin kinikinin fansoun ewe kapas allim seni ekkewe ranin Adam me Eve. Nge inamo ekkewe fefin non ei kinikinin fansoun ra sokkono seni ekkewe fefin seni meinisin ekkoch pokiten ei kinikinin fansoun mi sokkono seni meinisin ekkoch. Ei sokkono a esenipato och tufich me pwan och wis.” 5
Ei kinikinin fansoun a sokono pwe ewe Samon epwe emwenikich pwe sipwe amonneta ne winiti usun ewe teninimwen Enoch. A awewe me ren Noun kewe aposen me soufos usun napanapen ena siwin ngeni eu mwichen aramasen Saion.
Elter Bruce R. McConkie a aiti:
“[An Enoch] fansoun mi eu ranin fofforungaw me ngaw, eu ranin rochopwak me niamam, eu ranin maun me riaffou, eu ran me mwen ewe fonufan epwe nimenimoch ren konik.
“Nge inamo, Enoch, a nukuchar. A ‘kuna ewe Samon,’ me a foos ngeni i ‘ra nenefengen’ usun emon mwan a foos ngeni pwan emon. (Moses 7:4.) Ewe Samon a tinato i ne afanafana aier ngeni ewe fonufan, me ngeni i ewe wis ne ‘papatais non iten ewe Sam me ewe Nau, minne a uren chen me ennet, me ewe Ngun mi Fel, minne a pwarata usun ewe Sam me ewe Nau.’ (Moses 7:11.) Enoch a fori pwon mi pin me pwan achufengeni eu mwichen aramas mi ennetin nuku, meinisin minne ra winiti pochokunen chon nuku pwe ewe Samon a feitto me nom ren noun kewe aramas, me ra nom non pung me ra feioch seni asan. Iwe ewe Samon a eita ngeni noun kewe aramas Saion, pokiten ra chok tipeni ew me aani ew ekiek, me ra nom non pung; me ese wor osupwang neir.’ (Moses 7:18.) …
“Mwirin ewe Samon a eitangeni noun aramas Saion, ewe pukefel a mak pwe Enoch a ‘aueta eu teninimw minne a iteni ewe Teninimwen Fen, iwe iei Saion;’ ena Saion ‘a uweienong ngeni nang’ ikewe ia ‘Kot a etiwa non pwisin netipan;” me “seni ena a tou ewe poraus pwe a apasa, Saion a sueno.’ (Moses 7:19, 21, 69.) …
“Ei chok Saion minne a uweionong ngeni nang epwe niwin … nupwen ewe Samon a uweito Saion sefan, me chon nom non repwe fiti ewe Jerusalem mi fo, minne epwe for.” 6
Ika met a fiis me nom a wewen ngeni ikenai, atun an ewe Samon feitto, ekkewe nengin mi ennetin nukuchar ngeni ar kewe pwon mi pin ren Kot repwe nuseni esapin ekkewe aramas minne ra monneta ne etiwe I nupwen A feitto. Nge inamo ekkewe numpa, omw aninis ne fori tipeufengen me nein ekkewe aramas mi monneta ngeni ena Saion epwe kan watte seni esap.
Upwe erenikemi pwata uwa nuku ena epwe ennet. Non ewe Puken Mormon a wor eu porausen eu mwichen aramasen Saion. Ka chechemeni pwe mwirin ra fen ait, tong, me feioch me ren ewe Chon Amanau mi manausefan pwe “ese wor anini fengen me non ewe fonu, pokiten ewe tongen Kot minne a nonnom non netipen ekkewe aramas.” 7
Mettochun manauei a aitiei pwe noun Semach won Nang kewe nengin a wor ar niffang ne ekinamwei osukosuk me anganga pungoch ren ar tong fan iten Kot me ewe tongen Kot ra amwokut non ekkewe ra angang ngeni.
Uwa kuna ei atun neanuonei non am we kukkun pranch minne a mwich non imwei atun nekukkunei. Pwii we me ngang am chok ekkewe chon Pristutin Aaron, me semei we i chok chon kamoch ewe Melchizedek Pristut. Ewe pranch presetenin Relief Society a emon memper minafo me punuwan ese pwapwa ren an angang non ewe Mwichefen. Ekkewe memper ir fefin mi chinnap minne ese wor emon chon pristut non imwer kewe. Uwa katon inei me ekkana fefin ra tong, anisi, me tumunu fengenir ren nikitu. Uwa esinna iei pwe uwa kuna eu kukkun kinikinin Saion.
Ai kaeo usun ewe pochokunen fefin mi nukunuk a sopweno non eu kukkun pranch non ewe Mwichefen me non Albuquerque, New Mexico. Uwa kuna punuwen ewe pranch preseten, punuwen ewe district preseten, me ewe presetinin ewe Relief Society asarama netipen meinisin ekkewe chon feitto me memper minafo. Ewe Raninfel uwa feinno seni Albuquerque, mwirin ru ier ai uwa nengeni pochokunen ekkewe fefin ikewe ia, ewe aewin steik a poputa. Iei ewe Samon a pwan aueta eu temple ikewe ia.
Uwa feinno ngeni Boston mwirin, ikewe ia uwa wisen angang non ewe district presetensi minne a nemeni ekkoch kukkun pranch me non ru state. A wor osukosuk mi fiis minne nap seni fan eu a wesino pokiten ekkoch fefin mi tong me omuseno minne ra anisi ne apwetete netip. Ewe Raninfel uwa feinno seni Boston, emon seni ewe Aewin Presetensi a foruata ewe aewin steik non Massachusetts. A wor eu temple ikewe ia iei, kan ngeni ikewe ia ewe district preseten a nom ia me nom. I a pochokun sefan non ewe Mwichefen me mwirin och fansoun a kokkor ngeni wisen steik preseten me mwirin pwan emon preseten misin, mi apochokun me ren punuwan mi nukuchar me tongei.
Fefinei kewe, oua angei feioch pokiten ami noun Kot nengin ren niffang mi auchea. Oua uweinong remi non ei manaun fonufan eu tufichin ngun ne tumunu ekkoch ne etekireta ngeni ewe tong me nimenoch minne epwe atufichir ne nom fengen non eu mwichen Saion. Mi wor popun pwe ewe Relief Society, ewe aewin mwichen ewe Mwichefen fan iten ekkewe nengin noun Semach won Nang chok, a nongonong won ekkewe kapas “Tong Ennet ese Tongeni Morono.”
Tong ennet ina ewe ennetin tongen Kraist. Me nuku non I me unusen pochokunen An Achasefan ese keuk minne epwe atufichi en, me ekkewe ka tongei me angang ngeni, fan iten ewe amwararen niffang ne nom non ewe mwichen Saion minne mi kan nangatam fansoun kutta me pwon. Ikewe ia oupwe fefin non Saion, tongei me ren ewe Samon pwisin fiti ekkewe oua efeicohu.
Uwa pwarata pwe ami oua chon muun ewe Samon won fonufan. Ami oua ekkewe nengin noun Semach won Nang mi tong, minne a tinekemino ngeni ei fonufan ren niffang ese wor nonnon minne oua fen pwon pwe oupwe angang ne efeiochu ekkoch. Uwa pwon ngonuk pwe ewe Samon epwe emwenuk ren poum, me ren ewe Ngun mi Fel. I epwe feinno mwenuk atun ka anisi I ne amonneta Noun kewe aramas ne winiti An Saion mi pwon. Ua pwarata non itan Jises Kraist mi pin, amen.