![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fc0%2F0e%2Fc00edc71961ae4d3bc987f78159df02dc5498146%2Fc00edc71961ae4d3bc987f78159df02dc5498146.jpeg/full/!250,/0/default)
Kefinita ngeni ewe Samon
Poputa iei ne fori om kopwe “kefinita ngeni ewe Samon” pwe Ngunun epwe nonnom reom non chommong.
Nesor annim, pwi me fefinei. Ussun emon chon kuno noun ach ewe Chon Amanau, Jises Kraist, ua ewitiwiti ei fansoun ai upwe ochufengeni arapakan seni meinisin nepokukun ei fonufan ren ei mwichenap.
Ei ier a sokono seni pwan ekkewe ekoch akkom. Me rei a poputa fiti ew okuno seni ewe Aewin Presetensi ai upwe efeiochu ew tempel mi pin ngeni ewe Samon me non Durban, South Africa. Usap tongeni monuki eingeingen fofforun ewe imw. Nge nap seni napanapen fofforun, upwe aucheani fansoun meinisin ewe etiwetiwoch an kewe aramas ekkewe ra fokkun amonaochureta ar repwe tonong non ewe watten imw mi pin. Ra moneta ne etto ar repwe angei ew me nein kewe efeiochun ewe Niwinsefanito: ewe efeiochun ew imwen ewe Samon. Ra feitto fiti netiper mi ur ren tong fan iten I me An ewe Achasefan. Ra feitto fiti ar unusen kinisou ngeni Samach non Nang ren an awora ekkewe angang mi pin epwe emwen ngeni manau fefeita. Ra feitto non ar nimenimoch.
Kewe tempel, inamo ika ia ra nom ia, ra uta asan non unusen fonufan. Meinisin tempel ren Aramas mi Pin non Fansoun Soponon non unusen fonufan—meinisin ekkewe 168—ra uta pwe pisekin pwarata ngeni ach nuku non ewe manau ese much me ewe pwapwan ach aea fengen me ach famini me Semach won Nang. Ach feino non tempel a anapano ach weweiti ewe Unumon non Kot me we kapas allim ese much, ach finata pwe sipwe manau me afanafana ennet, me ach mochen ach sipwe tapwei ewe minen apuru an ach Samon me Chon Amanau, Jises Kraist.
Me nukun ew me ew ekkewe tempel non ei Mwichefen mi wor kewe kapas mi wewoch “Pin ngeni ewe Samon.” Ewe tempel ina imwen ewe Samon me ew nenien tumun seni ewe fonufan. Ngunun ewe a rokopwanieno ekkewe ra fen ngeni non ekkana etip mi pin. I a fori ekkewe nongonong pwe sipwe tonong nge kich Noun chon kokoto.
Semen punuwei ewe, Blaine Twitchell, emon me nein ekewe mwan auchea ua fen sinei, a aitiei ew murinon nesen. Sister Rasband me ngang am ouwa no churi i nupwen a akarap ngeni an epwene much an sai non ei manau. Nupwen am ouwa tonong non rumwan we, noun ewe pisop a karan chok no seni. Nupwen am ouwa kapong ngeni ewe pisop, ua ekieki, “Met me ochun emon pisop. A nom ikei an epwe fori an angangen iamwir ngeni emon noun chon an ewe wart mi nikitu.”
Ua ureni Blaine, “A fokkun murinno an ewe pisop etto churuk.”
Blaine a nengeniei me a ponueni, “A fen nap seni ena. Ua tingorei ewe pisop an epwe etto pun ua mochen interfiu ren nei ewe taropwen mumutan non tempel. Ua mochen upwe no kefinita ngeni ewe Samon.” Iwe iei a fori!
Na ititin fos, “kefinita ngeni ewe Samon,” a chok nonnom rei. A fen watiw ew unusen minefon minen nenengeni ach sipwe interfiu iteitan meren nouch kewe chon emwen non Mwichefen. Taropwen mumuta ne tonong non ewe tempel a fokkun auchea non ewe Mwichefen akkom, tori 1891, echo me echo taropwen mumutan non tempel a sain meren ewe Presetenin ewe Mwichefen. 1
Ina mo en sarafo ika mi mukono, om interfiun taropwen mumutan non tempel esap ren fori me sap fori. Echo taropwen mumuta esap echo taropwen chek, echo taropwen mumutan non ewe nenien fetan, ika tikit ren ew sea mi mokukun. A wor popun mi tekia me pin. An epwe tufich ngeni ewe auchean taropwen mumuta ne tonong non ewe tempel, kopwe nom non ewe kinamwein afanafanen Ewe Mwichefenin Jises Kraist ren Aramas mi Pin non fansoun soponon.
Non om interfiu a wor om ewe tufich om kopwe kutta ngunum ussun pusin om nuku non Jises Kraist me An ewe Achasefan. A wor om ewe nifangen tufichin apasa om kapasen pwarata ren ewe niwinsefaniton ewe kapas allim; om mochen tipeew ngeni ekkewe ewe Samon a kori ar repwe emweni An ei Mwichefen; om nuku non ewe annukun ewe kapas annim; om aponueta wisom ngeni om famini; me om auchean wenechar, nimenimoch, nukuchar, anneasosich, me aponueta ewe kapasen mirit, ewe annukun asoren ew na engon me epini ewe ranin Sabbath. Ikana kana pochokunen nongonongun ew manau mi wenechar ngeni Jises Kraist me An angang.
Noum taropwen mumutan non tempel a pwarano ew anononun, popun non pekin ngun pwe kopwe achocho ngeni om kopwe aponueta ekkewe annukun ewe Samon me tongei met a tongei; tipetekison, engino, nukuchar, tong mi unusoch, pwarachou, kirekiroch. Me ka pwon ngeni inisum pwe kopwe fori ekkewe nongonong nupwen ka sainei itom ngeni ena taropwe mi pin.
Noum ewe taropwen mumutan non tempel a suki ekkewe titin nang ngonuk me ekkoch fiti ekkewe oreni me nongonongun auchea ese much, mi pachenong, papatais, endowments, apupunu me riri.
Ach sipwe “kefinita ngeni ewe Samon” epwe achema ussun met si ekieki ren emon Aramas mi Pin non Fansoun Soponon mi aponueta an kewe pwon mi pin. Semen punuwei ewe, Blaine, a kuna pwe unusen auchea amonetan ewe ran nupwen epwene uta non tekisoson me mwen ewe Samon.
Ekieki nupwen Moses a tokata ewe chuk Horeb me ewe Samon Jehovah a pwa ngeni non ew ngetengeten akkei nukanapen ewe ira. Kot a apasa ngeni i, “Kopwe pwiniti noum kana sus, pun ka ukkuta won ena neeni mi pin.” 2
Pwinitatiw nouch sus ren ewe asamen ewe tempel a wewe ngeni ach sia poutano mochenin fonufan ika pwapwan ekkewe ra fori ach sipwe tumunungaw ngeni mamarita non pekin ngun, nikiti ekana mettoch minne ra atumunungaweno manauach mi auchea, anisi osukosuken anini me kutta fansoun om kopwe pin.
Ren unusochun foffor, inisich ew foffor an Kot, ew tempel fan iten ngunuch, me epwe tumun ren anononun osufonoch. Mi pung ekkewe kapasen ewe konun Kinter: “Inisi ew tempel [ewe] a auchea an epwe tumun.” 3 Nupwen ewe Samon a pwa ngeni ekkewe Chon Nifai, A annuk ngenir, “oupwe tongeni enimenimochuno me ren ketiwen ewe Ngun mi Fel, pwe oupwe tongeni uta non nimenimoch me mwei.” 4 “Met sokkun aramas oupwe usun?” ewe Samon a apasa me pwan ponueni, “Usun chok Ngang.” 5 Ach sipwe “kefinita ngeni ewe Samon,” sipwe achocho ngeni ach sipwe ussun I.
Ua chemeni ai rongorong ngeni Presetent Howard W. Hunter non an aewin afanafan non mwichenapen mwichefen an ewe 14th Presetenin ewe Mwichefen. A apasa: “Ina anononun mwechenin netipei an meinisin chon ei Mwichefen repwe nimenimoch ar repwe tonong non ewe tempel. Epwe apwapwai ewe Samon ika meinisin mi mukono chon ei Mwichefen repwe nimenimoch—me uwei—echo taropwen mumutan non tempel.” 6 Upwe apachata ena ew oukukun aean mumuta epwe forata ew fatafatochun an fan iten nouch kewe sarafo mi auchea.
Presetent Russell M. Nelson a chemensefani anon Presetent Hunter: “Non ewe ran, June 6, 1994, ewe taropwen mumutan non tempel ewe sia uwei a winiti och mettoch mi sokono me non ai ewe pwes. Me mwen ena, a wewen pwe ina soponon. Inan ewe wewen ne mut ngeniei ai upwe tonong non ew imw mi pin imwen ewe Samon: nge mwirin a fori ena esinesin, a winiti pusin soponon. A winiti ai pachin anneasosich ngeni emon soufosun Kot.” 7
Ika kose mo angei noum taropwen mumuta ika noum ewe taropwen mumuta a wes manamanan, fiti ewe teten ren ewe asamen ewe pisop ussun chok ekkewe aramas mi pin me akkom ra teten ren ewe asamen ewe Nauvoo Tempel non 1846. 8 Mwirimwiri kewe ir mi nom nein ekkena mi nukuchar. Ra nikitano teninimwer kewe mi ningoch me ra feino ngeni notou, nge ra sinei pwe mi wor met a fis mi pin a utir non ewe tempel. Sarah Rich a mak seni ewe kitifoufoun an non Iowa, “Ika esap ren ewe nuku me wewe a nom wom non ena tempel … , am we sai epwe ussun … nge aupwe mwet non ewe kiroch.” 9 Iei met sipwe pwosuasini ika sia akanamon non ei manau nge ese wor ewe mwasangasang me kinamwe a pwon me non ewe tempel.
Poputani foforun ewe iei epwe winiti “kefinita ngeni ewe Samon” iwe pwe Ngunun we epwe nom rem feinfeino me nonomun epwe ngonuk “kinamwein memefin netipom.” 10
Noum ewe souemwenin sarafo, presetenin ewe mwichen elter, presetenin Relief Society, me fefin me mwan chon iamwir repwe anisuk ne amonata, me noum ewe pisop ika pranch preseten repwe emwenuk non tong.
Sia fen pin sinei ew fansoun nupwen ekkewe tempel ra kesip ika kouk aean. Ren Presetent Nelson me oukich ekkewe sia angang ren, ewe amwasangen ekiek an epwe kesip kewe tempel a men “ametek” me “awora anoninenin ekiek.” Presetent Nelson kapas eis, “Met ita upwe apasa ngeni ewe Soufos Joseph Smith? Met ita upwe ureni Bringham Young, Wiform Woodruff, me ekkewe ekkoch presetent, feita ngeni Presetent Thomas S. Monson?” 11
Iei, sia ekis me pwapwa ne suki sefani kewe tempel ren riri me endowment nge mi chok kouk fansoun.
Ach sipwe nimenimoch ne tonong non tempel, iwe ese kouno. Mut ngeniei upwe apasa auchean, ika en mi tongeni tonong non ew tempel ika apw, mi och epwe wor noum tarowen mumutan non tempel finata om kopwe pochokun won ewe anen pwon.
Ewe ier a no Sister Rasband me ngang am ouwa fori ew okuno non New Zealand am ouwa afanafan ngeni ew watten mwichen sarafo mi mukono rese pupunu. Ese wor ar tufichin repwe tonong non ewe tempel, ewe ew non Hamilton a for sefan, me ra chiwen awitiwiti wesin ewe tempel non Auckland. Iwe nge, uwa mefi ew memef ai upwe peseir ar repwe asofosefani ika angei nour taropwen mumuta ne tonong non tempel.
Ina mo ika rese tongeni etto ren ewe tempel, ra tongeni wato inisir mwen ewe Samon non nimenimoch me manota ne angang ngeni I. Om nimenimoch ren an epwe wor noum taropwen mumutan non tempel a tumunu kemi seni chon koum ngekemi, pokiten oua fen fori ew pochokunen pwon ngeni ewe Samon ussun manauemi, me ew pwon pwe ewe Ngun epwe nom remi.
Sia fori angangen non tempel nupwen sia kutta porousen ach kewe neuo me wanong iter ren ekkewe angangen non tempel. Nupwen ach kewe tempel ra kesip sia chok pwan tongeni kutta porousen ach kewe famini. Fiti ewe Ngunun Kot non netipach, sia, siwinir ne uta fan iter ar repwe “kefinita ngeni ewe Samon.”
Nupwen ai ua wisesni ewe wis Meinapen ewe ofesin Tempel uwa rong Presetent Gordon B. Hinckley an anneani ei wokisin a afanafan seni ewe Samon ussun ewe Nauvoo Tempel: “Mut ngeni ewe angangen ai tempel, me meinisin ekkewe angang minne uwa fen fini ngenikemi repwe soposopono nge resap kouno; me mut ngeni ami achocho me ami pochokun ne sopweno, me nikitu, me oupwe angei niwinin ami kewe angang me niwinin kewe resap tongeni poutuno, ewe Samon mi napanap a apasa.” 12
Ach angang non tempel a riri ngeni ach niffang ese much. A chok karan fisingenikich ewe tes. Ewe Samon a fen korikich pwe sipwe angang non ewe tempel fiti ach “tumunoch, … me achocho tiniken, me nikitu.” 13 Ach “kefinita ngeni ewe Samon” a tufich epwe wor ekana murinon mettoch. Sipwe fokkun achocho non ach manaueni ekkewe annuk, tiniken non ach tumunoch ngeni ach kewe pwonen non tempel, me kinisou ren met ewe Samon a sopweno ne aiti kich ussur me sipwe nikitu nupwen sia awitiwiti kewe tempel ar repwe suk sefan non unusochur.
Nupwen ewe Samon a korikich an epwe “sopweta” ach kewe tongeni, I a tingor pwe sipwe anapano non wenechar. Awewe chok, meni sipwe anapano ach kaeo ekkewe pukefen, kuten porousen ach kewe famini, me ach iotekin nuku pwe sipwe aporousa ach tongei imwen ewe Samon ewe ngeni ekana ra amonata ar repwe angei ewe taropwen mumutan non tempel, chon ach famini.
Ua pwon ngeni ami ussun emon Aposel noun ewe Samon Jises Kraist pwe nupwen kopwe achocho ne anapano om angang weires non wenechar, kopwe mefi minefosefan non om nukuchar ngeni Kot ewe Sam me Jises Kraist, kopwe mefi napenon an ewe Ngun mi Fel emwenuk, kopwe pwapwa ren om kewe angang mi pin, me kopwe mefi kinamwe om ka sinei pwe ka “kefinita ngeni ewe Samon.” Non iten Jises Kraist, amen.