Sia Kapas usun Kraist
Usun ewe fonufan a kapas kukun usun Jises Kraist, sipwe anapano ach kapas usun I.
Upwe apasa ai tongeok, ami chiechiem achengicheng me chiechiach chon nuku. Ua men ingeitikemi ren ami nuku me pochokun non ekkewe maram rano, ren ei pandamic non unusen fonufan mi kan aweiresi manauach uweano chochon non famini mi auchea me atongeach.
Non ei fansoun weires, ua mefi ai ennetin kinisou mi sokoseni nomw ren ai sinei me weweiti pwe Jises i ewe Kraist. En mi mwo mefi ena sokkun? Mi wor riafou akon eriafou kich, nge iteiten mwach, ren umoumochun poun, ewe a tipetekison ne apasa, “Ngang ewe aan, ewe ennet, me ewe manau.”1 Nupwen sia nikitu ngeni ei fansoun sia towaw fesen seni ekkoch, a namot sisapw pwan atowawa manauach non ngun ren ach sisapw towaw seni I ewe a sopwei, ne tongei me kekerikich, “Feito rei.”2
Nge usun efou fuun emwen amen fatoch me fan nang, Jises Kraist a asarama kich. A feito ngeni fonufan non tipetekison. A manaueni ew manau mi unusoch. A echikara mi samau me amanawa mi mano. A chiechi ngeni ekkewe mi mwanecheno A aitikich sipwe fori mi pung, aneasosich, me tongfengen nefinach. A mano won ewe irapenges, manau sefanita mwirin unungat ran, a mut ngeni kich me ekkewe sia tonger ach sipwe manaw nuseni ewe peias. Ren An we umoumoch me kirekiroch, A fangeta Manauan fan iten ach kewe tipis me riafou, a omusakicheno ika sia aier me kinamwe non ewe weiresin manau. Sia tongei I. Sia pin ngeni I. Sia tapweno mwirin I. I ewe nongonongun ngunuch.
Amen Amwarar, nupwen ei ngunun ekesiwin a napono non kich, mi wor ekkoch non ewe fonufan ra sinei ekis usun Jises Kraist, me non ekkoch neni non fonufan Itan a ningeno non fite ier, nuku non Jises Kraist a kukununo. Ekkewe Souneng non Europe ra kuna ekkoch nuku mi kesip me non nenier ren mwirin engon ier.2 Ngawan, pwe ikei non ewe United States, nuku a kan kukkunitiw iei. Eu minefon kaeo a pwato pwe non ewe saingon engon ier ano 30 minion aramas non United States ra towaw seni ar nuku non ewe mwirinon Jises Kraist.3 Nengeni non unusen fonufan, eu kaeon osini pwe non ewe engon ier mwan nap seni fan ruu chommong repwe tou seni Souneng me resapw omochunuku.5
Ewer, Sia, awewe ngeni ach sipwe fori mi pung, ewer Samach won Nang a wesewesen apasa ei, “Iei nei At mi achengicheng: ausening ngeni.”6 Ua pwarata pwe ena ran epwe feito meinisin pwasuk repwe fotopwasuk me meinisin pekin kapas repwe sinei pwe Jises ii ewe Kraist.7
Met sipwe ne fori pokiten siwinin ewe fonufan? Nupwen ekkoch ra nipwakingaw non ar nuku, ekkoch ra kuta ewe ennet. Kich sia fen uwei iten ewe Samon won winikapach. Met sipwe tongeni fori?
Ewe Amonotan Preseten Russell M. Nelson
Ekkoch ponuwan me rech epwe feito ach sia ekieki usun an ewe Samon aiti ngeni Preseten Russell M. Nelson non ekkewe maram a auchea ngeni wisan ren Presetenin ewe Mwichefen. Kapas ngeni ekkewe serafo eu ier me mwen an we epwe koko ngeni wisan we, Preseten Nelson a tingorei kich sipwe kaeo fichi ekkewe 2,200 wewen ewe it Jises Kraist mi tetenitiw non ewe Topical Guide.8
Mwirin unungat maram, non ewe April mwichenapen mwichefen, a kapas usun, pwan non an we fansoun i emon chon kuno, ei anononun kaeo usun Jises Kraist a fokkun anisi. Punuwan, Sister Wendy Nelson a eisini usun auchean ngeni. A ponueni, “Ngang emon mwan mi sokono.” Ii emon mwan mi sokono? Ren ierin 92, emon mwan mi sokono? Preseten Nelson a awewei:
“Nupwen sia fangono ach fansoun ne kaeo usun ewe Chon Amanau me An we fangono manau, sia arap ngeni … I. …
“…Ach nongonong [epwe] nukuchar won ewe Chon Amanau me An kapas allim.”9
Ewe Chon Amanau a apasa, “Nengeniei non mettoch meinisin.”10
Non eu angangen fonufan, nuokus, me angang murino, a nonomw non netipach, ekiekich, me ngunuch won I ewe ach epinukunuk me manau ese much.
Ika eu minefon kaeo usun ewe Chon Amanau a anisi ne amonata Preseten Nelson, esapwan tongeni aninisi ne amonakicheta?
Non auchean iten ewe Mwichefen, Preseten Nelson a aitikich: “Ika pwe … a wor ach tufich ngeni ewe manamanen ewe Achasefan an Kraist—epwe nimeti me echikara kich, epwe apochokuna me eningakicheno, me emweni kich ne etekiakicheta—pwe sipwe sineochu I pwe I ewe a ani ena manaman.”11 Preseten Nelson a aitikich pwe ika sia aea ewe it mi pung ren ewe Mwichefen, och mettoch epwe nikinikin kukun, esapw wesewesen kukun, me epwe eu nios mi watte non kan fansoun mwach.
Ew pwon fan iten omw amonata
Ua pwon ngonuk pwe nupwen sia amonakicheta, usun Preseten Nelson mi fori, en kopwe pwan sokono, ekipwichi usun ewe Chon Amanau, me kapas usun I iteitan fiti kukunun tipemwaramwar. Ren omw ka sinei me anononun tongei I, omw kapas epwe fokkun ngiech, usun chok ir ra fori nupwen ka kapas usun emon noum kewe semirit are usun emon chiechiom ka fokkun tongei. Ekewe ra rongorong ngonuk repwe mefi kukun tipemwaramwar ika ar resapw rong ngonuk me repwe mwochen kaeo sonuk.
En me ngang sia kapas usun Jises Kraist, nge meni sia chok tongeni fori ekis murino. Ika ewe fonufan a kukun an kapas usun I, ion epwe tongeni kakapas chok fan Itan? Kich! Fiti pwan ekkoch Souneng nukuchar!
Kapas usun Kraist non imwach kewe
Mi wor niosun ewe Chon Amanau non imwach kewe? Kich mi kapas itetan ngeni nouch kewe semirit usun an Jises kewe kapas monomon? “Ekkewe porousen Jises [ra] usun mwitirin eu asepwan a tori nenien nuku an nouch kewe semirit non netiper.”12 Nupwen noum kewe ra kapas eis ngonuk, iteitan kopwe ekieki ekkewe asukun mine ewe Chon Amanau afen aiti ngonuk. Ren awewe, ika noum we a eis, “Papa, pwata sikan iotek usun ach iotek?” Kopwe ponueni, “Eu kapas eis mi murino. En mi chechemeni nupwen Jises a iotek? Sipwe porous usun pwata A iotek me ifa usun An iotek.”
“Sia kapas usun Kraist, sia pwapwa non Kraist … pwe noum kewe repwe sinei ian repwe apinukunuk won ren omusomusen ar kewe tipis.”13
Kapas usun Kraist non Mwichefen
Ei uwekisin mi nono a kapacheta pwe sia “afanafan usun Kraist.”14 Non ach angangen aninis, sipwe fokkun onomu ach ekiek won ewe Chon Amanau Jises Kraist me ewe niffangen An we fangono manauan. Ei esapw wewen nge sise tongeni mefi me non pusin manauach are chiechi fengen won ekkoch ekiek ngeni ekkoch. Nupwen ach iwe itenap epwe usun famini ika angangen aninis ika tempel ika eu minefon misin, meinisin sia pin ngeni epwe fan iten ewe Samon Jises Kraist.
Inik ier ano, Preseten Dallin H. Oaks a porous usun echo taropwe a angei “seni emon mwan a apasa pwe a fiti [eu mwichen sakrament]me ausening ngeni an engon me fumon kapasen pwarata nge ese rong ar repwe kapas usun ewe Chon Amanau.”15 Preseten Oaks a maketiw, “Mi tufich pwe ena poruasa ese unusen pung [nge] uwa apasa usun pun a eu och achechem ngenikich meinisin.”16 Iwe a tingor ngeni kich sipwe kakapas chomong usun Jises Kraist non ach afanafan me kaeo. Ua nenengeni pwe sia kon ekieki chommong usun Kraist me non ach kewe mwichen Mwichefen. Sipwe fokkun achocho me sopwosopwono non ekkei angang mi murino.
Kapas usun Kraist ngeni ekoch
Ren ekkewe chon unukuch, sipwe fokkun suk, me mwasang ne kapas usun Kraist. Preseten Nelson a apasa, “Noun Jises Kraist ennetin chonkuno ra mochen repwe sokono, suk awer, me sokono seni aramasen non fonufan.”17
Fan ekkoch sia ekieki pwe an emon ekesiwin epwe pwa me non ar feito ngeni fan ika churi ekkewe misineri. Mut ngeni ewe Samon epwe emwenir usun ra mochen, nupwen sia ekiek chommong usun wisach ren ach sipwe ani An kapas, ekipwichi me suki usun ach nuku. Elter Dieter F. Uchtdorf a aitikich pwe nupwen emon a eisini kich usun ach wiiken, sipwe mwasang ne emwenimwen me apasa pwe sia tongei ach ausening ewe konun Kinter “I’m trying to be like Jesus.”18 Sipwe kirekiroch ne pwarata ach nuku non Kraist. Ika emon a kapas usun an osukosuk non manawan, sipwe tongeni apasa, “John, Mary, ka sinei pwe Ua nuku non Jises Kraist. Ua fen ekieki usun och mettoch A apasa pwe epwe anisuk.”
Kopwe fokkun esinei won social media non kapas usun om nuku non Kraist. Napengeni repwe meniniti omw nuku, nge ika emon ese sani nupwen ka kapas usun ewe Chon Amanau, kapas pochokun won An we pwon: “Feioch ir, nupwen aramas repwe eriafouk … fan itei. … Ren auchean kopwe angei niwinum me nang.”19 Sia kon ekieki usun ach sipwe Noun chon kuno nap seni ach sipwe usun pusin kich nouch chon kuno. Peter a aitikich: “Moneta iteitan kopwe ponueni [ren] ewe epinukunuk a nomw non en.”20 Sipwe kapas usun Kraist.
Ewe Puken Mormon a eu minen pwarata mi pochokun usun Jises Kraist. Napengeni meinisin peich ra pwarata usun ewe Chon Amanau me an we unusochun misin.21 Ewe weweiti usun An we Achasefan me umoumoch non an peich. A eu chienen ewe Testament Sofo, ewe Puken Mormon a anisi kich ach sipwe wewefichi pwata ewe Chon Amanau a feito angasa kicheno me ifa usun ach sipwe ennetin feito ngeni I.
Ekkoch chiechiach Chon nuku non Kraist, fan ekkoch, rese sinei usun ach nuku me nuokus usun ach mokutukut. Sipwe fitir ne pwapwa non ach sipwe chiechifengen ren ach nuku non Jises Kraist me non ewe Pukefen Testament sofo sia kon sani. Non ekan ran mwach, ekkewe ra nuku non Jises Kraist a auchea repwe chiechiefengen ne aninis fengen nefiner.22
Usun ewe fonufan a kapas kukun usun Jises Kraist, sipwe anapano ach kapas usun I. Ren wesewesen ennetin onuwach usun Noun chon kuno ra pwarata, chommong chon oruch repwe moneta ar repwe ausening. Nupwen sia chiechi fengen won ewe saram sia angei seni, An saram me An aninisin tumunun epwe asarama ngeni ekkewe ra wesen mochen repwe suki netiper. Jises a apasa, “Ua … feito [usun] eu saram non fonufan.”23
Ekiata ach mwochen kapas fan iten Kraist
Ese wor met epwe omochu ai mochen kapas usun Kraist nap seni ai upwe anchangei An niwinsefan. Nupwen sise mwo sinei inet epwe feito, ewe fansoun nupwen epwe niwinsefanito epwe isois non netipach! Epwe feito non kuchuun nang non ningan me muun fiti meinisin Noun chon nang mi pin. Esapw chok ekkoch chon nang, pwe meinisin Noun chon nang. Ekkei esapw niosun ewe cherry-cheeked cherubim chunganien Raphael, sia kuna won nouch kewe cartun Valentine. Ikkei ir ekkewe chon nangin ekkewe fonu, ekkewe chon nang ra eto pwe repwe kumano awen ekkewe naion,20 repwe suki asamen kanapus,21 repwe aporousa usun ewe fansoun nakatan an awitiwiti uputiwan,22 repwe oururu I me non Ketsemeni,27 repwe anisi ekkewe chon kuno non An nenien tumun,28 me repwe suki ewe amwararen niwinsefaniton ewe kapas allim.29
Komwan kopwe anchangei om ita fen Churi, ikei ika ewe epekin ewe mwangaku?30 Ina An we pwon ngeni ekkewe mi nukuchar. Ei foffor mi amwarar epwe esisina non ngunuch fefeino chok.
Nonon ach kinisou ren nouch we achengicheng soufos, Preseten Russell M. Nelson, ion a mochen epwe tongei ewe Chon Amanau me esinefetanei An we angang. Ngang emon chon pwarata ngeni poun ewe Samon woi me niffangen pwarata a emweni. Preseten Nelson, sia ennetin witi om kapas pesepes.
Chiechiei achengicheng non unusen fonufan, mut ngeni kich sipwe kapas usun Kraist, sipwe fit an ewe Chon Amanau we amwararen pwon: “Io … epwe pwaraeita mwen mesen aramas, ngang upwe pwan pwarata … mwen mesen Semei.”31 Ngang uwa pwarata pwe I ewe Noun Kot. Non iten Jises Kraist, amen.