![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fa4%2Fc9%2Fa4c94d90b57a3d8770fac10ad979da32fb666e72%2Fa4c94d90b57a3d8770fac10ad979da32fb666e72.jpeg/full/!250,/0/default)
Ewe Niffangen ewe Nau mi Wachemuk
Ren Jises Kraist sia tongeni suseni ach riaffou pokiten ach nipwakingau me poracho ach riaffou pokiten fofforun emon.
Nupwen ua anneani ewe Puken Mormon ren eu nessenin Feito Tapweno Mwiri non ewe fansoun pwichikar, an Alma poraus a ku netipei nupwen a wesewesen weweiti tipisin, “pwe ese tongeni wor mettoch a kon wachemuk me a kon kipwin usun chok [an] kewe metek.” 1 Upwe kapas wenechar pwe ua nenengeni an kapas usun metek wachemuk pokiten ai riaffou non ewe wik ren efou fau non ai faurupung mi fisu millimeter. Ese mwo wor emon a meffi “watte mettoch” nupwen efou “mettoch mi kukkun me mecheres” “ra fis [are tou].” 2
Ua pwan ekieki an Alma kapas pokiten napengeni sia aea ewe kapas exquisite, non ewe Puken Mormon non kapasen Merika, a kapas usun mettoch mi weswesen ning are amwarar. Ren awewe, Joseph Smith a makei pwe ufan Moronai ewe chon nang a wachemuken pwechepwech, pwechepwechan mi nap seni mettoch meinisin a fen kuna won fonufan. 3 Nge ewe kapas wachemuk a pwan tongeni wewengeni mettoch mi wesewesen ngau. Iwe Alma me puken kapas ra era pwe metek wachemuk mi usun nupwen emon a “metek,” me “riaffou tori ukukun wachemuk.” 4
An Alma poraus a awewe pwe non eu fansoun mi namwot sipwe mefi unusen ewe niamam mi metek ren tipisich meinisin. Mi namwot pwe epwe pung me Kot ese tongeni pwisin siwini. 5 Nupwen Alma a chechemeni tipisin “meinisin”—napengeni ekkewe ra ataino an aramas nuku—ita ese tongeni poracho ngeni an metek, me a uren “nuokus chapur” ren ewe ekiek pwe epwe uta me mwen Kot. A mochen pwe esap “chiwen fis non pekin ngun me inis.” 6
Nge, Alma a apasa pwe mettoch meinisin a siwin nupwen an “ekiek a komochuno” won ewe osini usun ewe “wareton ewe emon Jises Kraist … pwe epwe achasefani ekkewe tipisin founufan” me a “sio non [netipan]: O Jises, en Noun Kot, kopwe umoumoch woi.” Ren ena ekiek me ena tingor, Alma a ureno ren “ennetin” pwapwa “usun chok watten [an] metek.” 7
Mi namwot ach sisap monuki ewe popun aier pwe sipwe siwini riaffou ngeni ennetin pwapwa. Pokiten “kirekirochun Kot,” 8 inet chok sia feito ren Kraist—ren ach pwarata ach nuku non I me ach ennetin siwini netipach—choun tipisich repwe poputa ne paneno seni afarach me repwe nom won afaran. Mi chok tufich pokiten ese wor tipisin nge A riaffou ewe “mettek ese much me mi wachemuk” pokiten ekkewe tipis meinisin fan nang, ren forian kewe meinisin—An riaffou a watte iwe, cha a suk seni mononan meinisin. 9 Seni met a fis ngeni I pwisin, ewe Chon Amanau a pese ngenikich, non pukfel seni ei fansoun soponon, pwe sise weweiti ifa ukkukun “wachemukun” ach “riaffou” ika sise aier. Nge ren An ennetin umoumoch A afata pwe I, Kot, a fen weiresini ekkei metoch fan itan aramas meinisin, pwe resap riaffou nukun chok ika repwe Aier sefan aier 10 —ach aier a mut ngenikich ach sipwe “mefi” ewe “ennetin pwapwa” minne Alma a mefi. 11 Ren chok ei nongonong, “U ingeiti.” 12 Nge, a amwaramwar, Kraist a pwan ngenikich pwan och.
Fan ekkoch metek wachemuk ese feito seni tipis nge seni mwanino, fofforun emon, are mettoch sise tongeni siwini. Non ekkei fansoun, naman kopwe sio usun ewe chon makkei Konupin:
“Netipei a fakkun noninen o nuokusun mano a tori ei.
“… ua apwangapwang pun ua fakkun nuokus.
“… Amo ita a wor pei ussun chok emon machchang, pwe upwe assino o kutta ai neenien asoso.” 13
Mettoch usun safei, aninis seni chon fonou, are kopung mi tongeni aninis ne awesano ach riaffou. Nge sipwe esina, niffang mi murinno meinisin—fiti ekkei niffang—ra feito seni ewe Chon Amanau. 14 Ese nifinifin pwata sia metek are netipechou, ewe popun chikar mi nonno chok: Jises Kraist. I chok mi wor ewe manaman me mettochen chikar mi tongeni apungano mettoch meinisin mi mwan, siwini mettoch meinisin mi ngau, echikara ach feingau meinisin, me efeiochukich ren ekkewe feioch meinisin mi mang. Usun chon pwarata me nom, ua pwarata pwe “ach we Sou-asor Mi Nap esap i emon ese tongeni mefi ach kewe apwangapwang,” 15 nge emon Chon Angasano mi tong mi feito fonufan seni an nenien motun king me nang me a “engino ngeni metek me riaffou me sokopaten sossot meinisin …, pwe i epwe tongeni sinei … ifa usun an epwe anisi noun kewe aramas.” 16
Ngeni ekkewe ikenai mi metek chapur are metek mi sokono pwe ka mefi pwe esap wor emon mi tongeni weweiti, naman ka ekkis pung. Naman esap wor emon chon om famini, chienemi, are chon emwenin ewe pristut—ina mwo ukukun ar menemenoch me mochen foforoch—mi sinei met ka mefi are mi tongeni apasa met epwe anisuk om kopwe chikar. Nge kopwe sinei: mi wor emon a weswesen weweiti met a fis ngonuk, “i a pochokun seni unusen ewe fonufan” 17 me i “mi tongeni fori mettoch meinisin nap seni met [ka] tongeni tingor are ekiekieta.” 18 Epwe fis non An napanap me non An fansoun, nge Kraist a ammonata fansoun meinisin an epwe unusen echikarok ren unusen om riaffou.
Nupwen ka mut ngeni I an epwe fori, kopwe kuna pwe ami riaffou esap nusmwan. Ren ai kapas usun riaffoun ekkewe aramas mi itefouno non ewe Paipen, ewe Aposel Paul a apasa “God a … amonnaa mettoch mi fakkun murinno ngeni kich. An mochen pwe repwe chiechi ngeni kich pwe repwe unusochuno.” 19 Nengeni, ewe napanapen Kot me popun manauach won fonufan pwe sipwe pwapwa, 20 nge sisap tongeni winiti aramas mi unusoch ren pwapwan nang chinon chok ika sia weri sossot, pwan mwo sossot mi namwot sipwe aea unusen ach pochokun ach sipwe pworacho ngeni. Paul a apasa pwe ewe Chon Amanau a Pwisin “aunusochueno … ren riaffou.” 21 Iwe kopwe tumunu pwe kosap tur ren ekkewe kapasen satan pwe ika ka emon aramasoch, esap namwot kopwe weri om sossot.
Kosap ekieki pwe pokiten ka riaffou pwe kese fiti noun Kot kewe mi kefin, ekkewe ita ra chok feioch fansoun meinisin. Nge, kopwe usun met John ewe Chon Pwarata a kuna non an pwarata usun ei fansoun soponon mi amwarar. Pun John a kuna “ew mich watte—ese wor emon aramas a tongeni anneani ekkewe aramas meinisin! Ra feito seni iteiten sokkun aramas, seni ekkewe einang, muu me sokkun kapas, iwe ra ukkuta me mwen ewe neenien mottun king me mwen ewe Appanen Siip me ra ufouf mangaku mi pwechepwech … Ra neuommong ne apasa, ‘Amanau a feito seni ach God.’” 22
Nupwen a kapas eis, “Io ekkei aramas ra ufouf mangaku mi pwechepwech o ra feito me ia?” John a angei punuwan: “Ikkei ir ekkewe ra fen ngaseno seni ewe nninni wachemuk. Ra nimeti ufer kewe o ra fori pwe repwe pwechepwech ren chchaan ewe Appanen Siip.” 23
Pwi me fefinei, oupwe chechemeni, ach riaffou non tupwen a ammonata en pwe kopwe emon noun Kot mi kefinita. Me nour kewe pwon epwe om kewe pwon. Ussun John a apasa, kosap “chuwen echik, are kaka. Ewe akkar are och sokkun mi pwichikar esap [kenuk]. Pun ewe Appanen Siip, ewe mi nom nukanapen ewe neenien mottun king epwe [noum] chon mmas, iwe epwe emwen [ngonuk] ekkewe konikin manau mi puwacheta. Iwe God epwe tonano chonun [mesom] meinisin.” 24
“Esap chuwen wor mano, esap chuwen wor netipeta, kechiw are metek.” 25
Ua pwarata ngonuk pwe pokiten kirekirochun Jises Kraist, me an Achesefan ese much sia tongeni pworacho ngeni ach riaffou pokiten ach nipwakingau me porach ach riaffou pokiten fofforun emon. Fan An emwen, kopwe tongeni weri pwapwa mi amwarar me sise tongeni awewei—eu pwapwa wachemuk me fan itom pwisin, ami pwisin riaffou epwe “nap seni mettoch meinisin won fonufan.” 26 Pwe kopwe mefi ei pwapwa iei me kopwe ur ren feinfeino, ua tingor ngonuk om kopwe fori met Alma a fori: kopwe kommochunnuk non ami ekiek won wachemuken ewe niffangen ewe Noun Kot usun mi pwarata ren An kapas allim non ei, An Mwichefen mi ennet me manau. Non iten Jises Kraist, amen.