Oupwe Mammasa O Oupwe Iotek Fansoun Meinisin
Ikenai, ua achouano ai kokko ren iotek ngeni meinisin aramas seni meinisin neni won unusen fonufan.
Pwi me fefinei achengicheng, non ewe omuchunon wiken an ewe angangen afanafan non fansoun an manau, Jises a aiti noun kewe chon kuno pwe repwe “mammasa o iotek fansoun meinisin, pun epwe wor remi ewe pochokun pwe oupwe tufich ngeni ekkei metoch repwe fis o ami oupwe uta me mwen ewe Noun Aramas.”1
Me nein ekkewe “mettoch repwe fakkun fis” mwen An ewe Oruen Niwinsefanito “maun … o pwan porousen maun[,] … nengita o chechchechin fonu epwe fisita ekis meinisin.” 2
Non ewe puken Doctrine and Covenants ewe Chon Amanau a apasa, Me mettoch meinisin repwe okurangarang; iwe nuokus epwe nom ren aramas meinsin.3
Ewer, kich sia nom non ei fansoun minne mettoch ra okurangarang. Chomong aramas ra nuokisiti fansoun mwach, me chommong netip ra kun seni ar nuku non Kot me Noun Ewe, Jises Kraist.
Porousen non repot ra masoweni repotun angangangaw. Ouchungun fosongaw fan iten ekkoch a fen nom won line. Nenien peias, fan, an chon Muslim nenien fan, imwen chufengen an chon Jews, me neni mi pin ra fen tano.
Ew efeiengawen samau a tori arapakan unusen pokukun ei foufan—minionen aramas a fen torir, puku ngorou ra fen mano. Ekkewe sochungio non kewe sukun, fan non kewe imwen fan, apupunu, angangen misineri, me ewe chon amonata ekkoch auchean mokutukutun non ei manau ra osukosuk. Pachenong, aramas ese nea ra akanamon me imuno seni meinisin.
Osukosuken pekin mwoni a efisata osukosuken chommong, akaewin ren ewe napanapen riaffou an noun Samach won Nang kewe.
Sia fen kuna aramas a wor ar pochokunen memefin anganga ar pung ne pwarano ar rese tipeew ngeni non kinamwe, me sia fen kuna mwichieichen aramas ra awosukosuka kinamwei.
Pwan non chok ei fansoun, sia soposopono ne kuna waten tipefesenin aramas non unusen fonufan.
Fan chommong ua ekieki ekana neimi mi riaffou ourek, nuokus, me mefi akanamon. Upwe wenechar ngenikemi pwe ewe Samon a sinei ami, iwe I a weweiti ami osukosuk me riafou, me I a tongekemi—non ew an a sineochu nonnomumi, won pusin winikapan, ren anononun me feinfeino.
Ew me ew pwin, nupwen uwa iotek, ua tingorei ewe Samon an epwe efeiochu ami meinisin ekewe ouwa chourek ren ami anononun weires, riafou, akanamon, me netipengaw. Ua sinei pwe ekkoch souemwenin mwichefen ra rong mwirifion ena chok pwan iotek. Netipach, imufesen me chufengen, ra no ngenikemi me ach iotek ra no ngeni Kot fan itemi.
Non ewe ier ua nom non ewe otiwenefenin kinikinin United States ren ekkoch ran ai upwe churi ekkewe chon Merika me ewe nenien uruon ei Mwichefen, fiti kewe mwich fiti nouch kewe misineri me kewe memper, me churi mun me sou emwenin kewe sopai.
October 20, non Raninifen, ua porous ngeni ew watten mwichen aramas, kan ngeni Boston, Massachusetts. Nupwen ai ua porous, ua mefi ai upwe apasa, “Ua tungor ngenikemi … pwe oupwe iotek fan iten ei fonu, fan iten nouch sou emwen, fan iten nouch aramas, me fan iten ekkewe famini ekkewe ra nom non ei auchean nenien aramas Kot a forata.”4
Ua pwan apasa pwe Merika me chommong ekkewe watten fonuen aramas won fonufan, nupwen non fansoun epwe feitto, repwe nom non pwan ew osukosuken keang fesenin kewe an me ra mochen ach iotek.5
Ai tungor ese nom non ai afanafan mi moneta. Ekkana kapas, a pusin feitto rei nupwen ua mefi amemefin ewe Ngun me ua tingor ngeni kana ouwa nom ami oupwe iotek fan iten nenier me nour kewe sou emwen.
Ikenai, ua achouano ai kokko ren iotek ngeni meinisin aramas seni meinisin neni won unusen fonufan. Ina mo ika ifa ussun ami iotek me ion oua iotek fan itan, ouse mochen oupwe anganga ami nuku—inamo ika met sokkun ami namanam—me iotek fan iten neniom me fan iten noumi sou emwen meinisin. Ussun ua apasa non ewe October a no non Massachusetts, sia uta ikenai ren ew watten keang fesenin an non uruo, me ekkewe nenien aramas won fonufan ra wesewesen mochen mokutukutun memef me emwen. Ei esap ita ren politiks ika annuk. Ei ren kinamwe me ewe echikara a tongeni etto ngeni emon me emon pwan ussun chok ren aramasen ekkewe neni—ar kewe teninim, town, me sopw—seni ewe Kingen Kinamwe me ewe nenien echikara meinisin ewe Samon Jises Kraist.
Non ekkewe fitu maram ra no a wor ai we ekiek a toriei pwe ewe murinon anen ai upwe anisi nonomun ei fonufan iei ren an aramas meinisin repwe ounusa ar anonga won Kot me okunu netiper ngeni I ren tekisosonun iotek. Etekisona inisich me kuta mokutukutun memef ne achocho ika nemeni met mi nom mwach pwe pwe ach nenien eppet me ennetin anen ach sipwe mokutuno mwach non nukunuk ren ekkei fansoun osukosuk.
Ekkewe pukefen ra affata ekkewe iotek a kawor seni Jises pun ussun chok An kewe afanafan ussun iotek fansoun an ewe angangen afanafan won ei fonufan. Kopwe chemeni an ewe Samon ewe Iotek:
“Samach mi nonnom non nang, Itom epwe pin,
“Muum epwe feito, Netipom epwe pwonueta won fonufan usun chok non nang.
“Kopwe ngeni kem anem mongo ikenai.
“Kopwe omusano am tipis ren met am oua fori, ussun chok am oua omusano tipisin ekkewe ekkoch ngeni kem.
“Kosap kan sotuni kem, nge kopwe kan tuttumunu kem seni ewe Emon Mi Ngaw” Pun muum, me om manaman, me om ning, feinfeino chok. Amen.6
Ewe murinon iotek a enniwin fan fite ngeni unusen souneng, a fori an epwe fat pwe a tufich an epwe uwefochei tingor “Samach mi nonnom non nang” ren ponuen met a awosukosuka kich. Iwe, sipwe iotek ach sipwe angeni emwen seni nang.
Ua tingor pwe oupwe iotek fansoun meinisin.7 Iotek fan iten ami famini. Iotek fan iten ekkewe sou emwenin ekkewe neni. Iotek fan iten aramas mi porachou ekkewe ra nom fanimas non ewe moun ikenai ngeni ekkewe sokopaten osukosuken nonomun aramas, neni mun me namanam a awosukosuka aramas non unusen fonufan, ekkewe mi wouoch me ekkewe mi woungaw, ekkewe sarafo me ekkewe mi mukono.
Ewe Chon Amanau a aiti ngenikich ach sisap oukuku ion sia iotek fan itan. A apasa, “Oupwe tongei chon koum ngeni kemi oiotekir ekkewe mi eriaffou kemi.”8
Won ewe irapenges won Calvary, ikewe Jises a mano me ia ren ach kewe tipis. I a aea met a kaeo nupwen I a iotek. “Semei, kopwe omusareno! Rese sinei met ra fori.”9
Ennetin iotek fan iten ekkana repwe nikinikin pwe chon koum ngenikich pwarano napanapen ach nuku pwe Kot a tongeni siwini netipach me netipen ekkoch. Sokkun iotek epwe apochokuna ach pochokunen finata met ekkewe ekesiwin a mwirinno non pusin manauach, famini me neniach kewe.
Ina mo ika ia ka nom ian, met sokkun om kapas ka kapas non, ika ekkewe sossot ka mesengeni, Kot a rongorong me ponuenuk non pusin napanapan me non pusin an fansoun. Pokiten kich noun, sia feitto ren ach sipwe kutta aninis, kinamwe, me ew minefosefanin mochen ne fori sokofesen mi murinno non ewe fonufan.
Iotek fan iten anonnopok, kinamwe, ekkewe mi osupwang, me ekkewe mi samau napengeni ese naf. Mwirin sia fotopuku non iotek, a murinno sipwe utasinikich me fori met sia tongeni ne aninis—ne anisi pusin kich me ekkoch.10
Ekkewe pukefen ra ur ren minen awewe ren aramasen nuku ekkewe ra ochufengeni iotek me angangan ar repwe fori ew sokonon non pusin manauer me non manauen ekkoch. Non ewe Puken Mormon, wewe chok, sia annea ussun Enos. A fen pwano pwe “arapakan ru na unungatin noun ewe puk mi mwoch a awewei ew iotek, ika masowen kewe iotek, me anonopokun a apasa met a fori non pungunon ponuan kewe a angei.”11
A wor chommong minen awewe ren ifa ussun iotek a fori ew ekesiwin non pusin uruon ach Mwichefen, poputa ren an Joseph Smith ewe aewin iotek nein ewe potowen kan ngeni imwen saman me inan ewe imw ira non ewe 1820 non fansoun a pichiu chon ira. Kutta musono me emwen non pekin ngun, an Joseph iotek a sukano ekkewe nang. Ikenai, sia chon angei feiochun ewe Soufos Joseph me ekkoch aramas mi pin non fansoun soponon mwan me fefin mi nukuchar ekkewe ra iotek me anganga ne anisi forutan Ewe Mwichefenin Jises Kraist ren Aramas mi Pin non Fansoun Soponon.
Napengeni ua kan ekieki ekkewe iotek an ekkewe fefin mi nukuchar ussun Mary Fielding Smith ewe fiti an Kot aninis, porachou a emweni an ewe famini seni angangen eriaffou non Illinois ngeni non ei nemonun chuk mi kinamwe ikewe an ewe famini a nonnomoch non pekin ngun me inis Mwirin an iotek non ennetin won pwasukun, a angang weires an epwe okufu sosotun kewe me efeiochu an ewe famini.
Iotek epwe oukicheta me akana fengenikich ussun emon me emon, ussun famini ussun ew Mwichefen, me ussun ew fonufan. Iotek epwe pesei soutipachem (scientists) me anisir ar repwe kuna kewe safei epwe oukano ei osukosuken semwen. Iotek epwe ekinamwei ekana mi mano atongeer. Epwe emweni kich non ach sipwe sinei met sipwe fori ren pusin ach pekin epet.
Pwi me fefinei, ua pesekemi pwe oupwe anapano fan ruu ami mochen oupwe iotek. Ua pesekemi pwe oupwe iotek non ami kewe nenien pisek, non ami fetan iteitan, non imwemi kewe, non ami kewe wart, me iteitan non netipemi.12
Fan iten ekkewe sou emwenin Ewe Mwichefenin Jises Kraist ren Aramas mi Pin non Fansoun Soponon, ua kinisou ngenikemi ren ami kewe iotek fan itach. Ua pesekemi pwe oupwe sopweno ami iotek pwe sipwe angei ewe mokutukutun memef me pwarata epwe emweni ewe Mwichefen non ekkei fansoun weires.
Iotek a tongeni ekesiwini pusin manauach. Mwasangasang ren tekisosonun iotek, sia tongeni murinono me anisi ekkoch ar repwe pwan fori ena.
Ua sinei ewe manamanen iotek seni pusin ai sinei. Ekis fansoun a no ngang ua anamon non ai we ofes. Ua chok fen fori angangen safei ren pei ewe. A chon me araw, pwo, me a fokkun metek. Ai we ua mot ren ai ewe chepen, use tongeni upwe tumunoch won auchen me weiresin mettoch pun ewe metek a osukosukaei.
Ua fetupuku ne iotek ngeni ewe Samon an epwe anisiei ai upwe tumunoch pwe upwe awesi ai angang. Ua uta me niwiniti ewe chukutan taropwe won ai ewe chepen. Ese mo mang nge manaman me tumunoch a tori ai ekiek, me ua tufichin awesano ekkewe atapwanen angang me mwei.
An ewe fonufan kokotongawen osukosuk meni epwe nikinikin weires ach sipwe anganga nupwen sia ekieki ewe watten osukosuk me sossot. Nge iei ai kapasen pwarata pwe ika sipwe iotek me tingorei Samach non Nang ren an efeioch me emwen, sipwene sinei ifa ussun sia tongeni efeiochu ach kewe famini, chon oruch, chon ewe neni fen pwan ekkewe neni ikewe sia nom ian.
Ewe Chon Amanau a iotek me I a “fein fetan ekis meinisin, a fori an angang mi murinno”13 ren an amongoni ekkewe mi osupwang, awora porachou me aninis ngeni ekkewe mi mochen aninis, me a fori ew tufichin aninis ngeni kewe mi osupwang non tong, omusano, kinamwe, asoso ngeni meinisin io mi feitto ren I. A sopweno ne anisi kich.
Ua tingor meinisin chon ei Mwichefen ussun pwan chon oruch kewe me chiechiach non ekkewe ekkoch mwichefen unusen fonufan, sipwe fori ussun met ewe Chon Amanau a aani ourour ngeni Noun kewe chon kuno: “Oupwe mammasa o oupwe iotek fansoun meinisin ren kinamwe, ren ourur, ren epetin feiengaw, me ren tufichin ach sipwe anisi fengeni kich.14
A ifa me amwararan ewe manamanen iotek me ifa me auchean ach kewe iotekin nuku non Kot me Noun ewe Anamon non ei fonufan ikenai! Sipwene chechemeni me etiwa ewe manamanen iotek. Non iten Jises Kraist, amen.